ޓޫރިޒަމް ވިޔަފާރިތަކާއި ޑޮލަރުން އާމްދަނީ ލިބޭ ބޮޑެތި ވިޔަފާރިތަކުގެ އާމްދަނީން ބައެއް މާރުކުރަން މަޖުބޫރުކުރި ފަހުން މިހާތަަނަށް 150 މިލިއަން ޑޮލަރު ބޭންކުތަކަށް މާރުކޮށްފައިވާ ކަމާއި އެ ސިޔާސަތުގެ ނަތީޖާ ރަނގަޅު ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް، ޑޮލަރުގެ ކަޅު ބާޒާރަށް އެއްވެސް ބަދަލެއް ނާންނަ ކަމަށް އާންމުން ބުންނަ ފަށައިފި އެވެ.

އެމްއެމްއޭއިން ޑޮލަރު ވިއްކާ ރަސްމީ ރޭޓަކީ 15.42ރ. ކަނޑައަޅާފައި ވީ ނަމަވެސް ފާޅުކަން ބޮޑުގޮތެއްގައި ހިނގާ ޑޮލަރުގެ ކަޅު ބާޒާާރުގައި މިހާރު ވެސް ޑޮލަރު ރޭޓު އުޅެނީ 19ރ. އިން މަތީގައި ކަމަށް ގިނަ ބަޔަކު ދަނީ ބުނަމުންނެވެ.

ޑޮލަރު މާރުކުރުމުގެ ސިޔާސަތުން ކަޅުބާޒާރުގައި ޑޮލަރު އަގުދައްވާނެ ކަމަށް ބުނެ، ޓޫރިޒަމް ވިޔަފާރިތަކާއި ޑޮލަރުން އާމްދަނީ ލިބޭ ބޮޑެތި ވިޔަފާރިތަކުގެ އާމްދަނީން ބައެއް މާރުކުރަން މަޖުބޫރުކުރުވި ނަމަވެސް ރައީސް މުއިއްޒުގެ ޑޮލަރު މާރުކުރުމުގެ މި ސިޔާސަތުގެ ސަބަބުން ކަޅު ބާޒާރަށް އެއްވެސް ލުޔެއް އައިސްފައި ނުވާ ކަމަށް ވިޔަފާރިވެރިން ވެސް އަންނަނީ ބުނަމުންނެވެ.

ރައީސް މުއިއްޒުގެ މި ޑޮލަރު މާރުކުރުމުގެ މި ސިޔާސަތުގެ ދަށުން ޑޮލަރު މާރުކޮށްގެން ފައިދާ އެއް ކިރިޔާވެސް ލިބެނީ ސަރުކާރާއި ސަރުކާރުގެ ކުންފުނިތަކަށް ކަމަށާއި އެހެން ނަމަވެސް އާންމު މީހާ އަށް އަދިވެސް ޑޮލަރު ލިބެނީ ބޮޑު އަގުގައެވެ.

މިހެން މިކަން އޮއްވައި ދާދި ފަހުން ރައީސް އޮފީހުން މުޅިން އަލަށް ފެށި "ރައްޔިތުންނާ އެކު" ޕޮޑްކާސްޓުގައި ނިިމިގެން ދިޔަ ހަފުތާގައި ރައީސް މުއިއްޒު ވިދާޅުވީ, މި އަހަރުގެ ޖެނުއަރީ މަހުން ފެށިގެން މިހާތަނަށް 150 މިލިއަން ޑޮލަރު ބޭންކުތަކަށް މާރުކޮށްފައިވާ ކަމަށާއި މިއީ ކުރީގައި ބޭންކުތަކަށް ޑޮލަރު މާރުކުރާ މިންވަރަށް ވުރެ 40 އިންސައްތަ އިތުރު އަދަދެއް ކަމުގައި އެވެ.

ޑޮލަރުގެ މައްސަލައަށް އަލިއަޅުއްވާލައްވާ ރައީސް ވިދާޅުވީ މައްސަލައަށް ހައްލު ހޯދުމުގެ މަސައްކަތް ފެށީ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކަށައެޅި ގަވާއިދެއްގެ ދަށުން ކަމަށާއި އެފަހުން ޑޮލަރު މާރުކުރުމާ ބެހޭ ގާނޫނެއް އެކުލަވާލައި މިދިޔަ ޖެނުއަރީ މަހުގެ ފުރަތަމަ ދުވަހުން ފެށިގެން ތަންފީޒުކުރަން ފަށާފައިވާ ކަމަށެވެ.

ޑޮލަރު މާރުކުރުމުގެ ސިޔާސަތާ ގުޅިގެން ދެއްކެވި ވާހަކައިގައި ރައީސް ވަނީ މި ސިޔާސަތުގެ ކާމިޔާބީ ފާހަގަކުރައްވަމުން, އެ ސިޔާސަތަށް ގިނަ ބަޔެއްގެ އެއްބާރުލުން ލިބެމުންދާކަމަށް ވިދާޅުވެފަ އެވެ.

ގޮތުގައި ގާނޫނުގެ ދަށުން ބޭންކުތަކަށް ޑޮލަރު މާރުކުރަން ޖެހޭ ފަރާތްތަކުގެ ތެރެއިން ގާތްގަނޑަކަށް 95 އިންސައްތަ ފަރާތުން ޑޮލަރު މާރުކުރަމުންދާ ކަމުގަ އާއި އަދި ބާކީ ފަސް އިންސައްތަ ވެސް މީގެތެރެއަށް ވެއްދުމަށް އެމްއެމްއޭއިން އެ ފަރާތްތަކާ އެކު މަސައްކަތް ކުރަމުންދާ ކަމުގައި އެމަނިކުފާނު ވިދާޅުވިއެވެ.

ބޭންކަށް ޑޮލަރު މާރުކުރުމަށް ވަރަށް ބޮޑު އެއްބާރުލުމެއް ލިބެމުން އަންނަކަން ފާހަގަކުރައްވައި ރައީސް ވިދާޅުވީ އެކަމުގެ ނަތީޖާއަކަށް ވާނީ ފަތުރުވެރިކަމުގެ ދާއިރާ ފުޅާވަމުންދާ ވަރަކަށް އެ ދާއިރާއިން ލިބޭ އާމްދަނީ ކުރިއަށް ވުރެ އިތުރުވެ، އޭގެ މަންފާ އާންމުންނަށް ކުރުން ކަމަށެވެ.

އެގޮތުން ރާއްޖޭން ބޭރަށް ފުރާ ދިވެހީންނަށް މިހާރު ބޭންކު ރޭޓުގައި ދޫކުރާ 500 ޑޮލަރުގެ ބަދަލުގައި އެ އަދަދު 1،000 ޑޮލަރަށް ވުރެ އިތުރުކުރުމާއި ކްރެޑިޓް ކާޑުގެ ލިމިޓް ދެގުނައަށް ބޮޑުކުރުމާ އަދި ޓީޓީ ހެދުމަށް އިތުރަށް ފުރުސަތު ފުޅާވެގެންދާނެ ކަމުގައި އެމަނިކުފާނު ފާހަގަކުރެއްވި އެވެ.