އެމްޑީޕީ ޒުވާނުންގެ ހިތްވަރުގެ ނައިބު ރައީސް އަހުމަދު މައިމޫން މުހައްމަދަށް ފަސް ތުހުމަތެއް ކޮށްފައިވާ ކަމަށާއި، މުޒާހަރާ ކުރުމަކީ ޖިނާއީ ކުށަކަށް ފުލުހުން ހަދާ ނިންމާފައިވާ ކަމަށް ގާނޫނީ ވަކީލު އައިކު އަހުމަދު އީސާ ވިދާޅުވެއްޖެއެވެ.

އޭނާ ފުލުހަށް ހާޒިރުކޮށްފައިވަނީ ބުދަ ދުވަހުގެ މެންދުރުފަހު 1:00ށް މާފަންނު ޕޮލިހަށެވެ. އޭނާ ހާޒިރުކުރީ ސަރުކާރާއި ދެކޮޅަށް މަގުމަތީގައި މުޒާހަރާކުރާތީއެވެ. މައިމޫނަށް ފޮނުވި ޗިޓްގައި ބުނެފައިވަނި މާޗް 11 ވަނަ ދުވަހުގެ ރޭގަނޑު ވަގުތުގައި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާއި ހިލާފަށް މާލޭގެ އެކި ސަރަހައްދުތަކަށް އެއްވެ މުޒާހަރާކޮށް އަޑުގަދަކޮށް އާންމު ދަތުރުފަތުރަށް ދަތިވާނެހެން ހަރަކާތްތެރިވެ ފުލުހުންގެ ދައުރު އަދާކުރުމަށް ހުރަސްއަޅައި މަގުބަންދު ކުރުމަށް ފުލުހުން ޖަހާފައިވާ ބެރިކޭޑްތައް ހުރަސްކޮށް ފުލުހުން ބަންދުކޮށްފައިވާ ސަރަހައްދަށް ވަދެފައިވާތީކަމަށް ތުހުމަތުކުރެވޭތީއެވެ.

ފުލުހުންނަށް ޖަވާބުދާރީވުމަށްފަހު، ނުކުމެ އެސަރަހައްދުގައި ހުންނަވައި، އޭނާގެ ގާނޫނީ ވަކީލު އައިކު ވިދާޅުވީ ކޮށްފައިވާ ހުރިހާ ތުހުމަތުތަކަށް ފުރިހަމައަށް ޖަވާބުދާރީވެފައިވާ ކަމަށެވެ. ކޮށްފައިވާ ސުވާލުތަކުން މުޒާހަރާ ކުރުމަކީ ޖީނާއީ ކުށަކަށް ފުލުހުން ހަދާފައިވާކަން އެނގޭ ކަމަށް އޭނާ ވިދާޅުވިއެވެ.

މައިމޫނުގެ އިތުރުން އެމްޑީޕީގެ މުޒާހަރާތަކުގައި އިސްކޮށް ހަރަކާތްތެރިވާ ފަރާތްތައް ދަނީ ޕޮލިހަށް ހާޒިރު ކުރަމުންނެވެ.