އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އަށް އެއްބާރުލުން ދޭން އީރާނުން ތައްޔާރަށް އޮތް ކަމަށް، އެ ޤައުމުގެ ފޮރިން މިނިސްޓްރީގެ ޑެޕިއުޓީ މިނިސްޓަރު ޚަޒެމް ޣަރިބާބާދީ ވިދާޅުވެއްޖެ އެވެ.

އޭނާ މިހެން ވިދާޅުވީ އައިއޭއީއޭގެ އިސްވެރިޔާ ރަފައެލް ގްރޮސްއާ އެކު ބޭއްވެވި ބައްދަލުވުމަށް ފަހު، ސޯޝަލް މީޑިއާގެ އެކްސްގައި ކުރެއްވި ޕޯސްޓެއްގަ އެވެ. 

ޣަރީބާބާދީ ވިދާޅުވެފައި ވަނީ އޮސްޓްރިއާގެ ވެރި ރަށް ވިއެނާ ގައި ބޭއްވުނު މަޝްވަރާތަކަކީ "ސީދާ އަދި އުފެއްދުންތެރި" މަޝްވަރާތަކެއް ކަމަށެވެ.

އޭނާ އިތުރަށް ވިދާޅުވީ، އީރާނުގެ ޤައުމީ ސަލާމަތާއި މަސްލަހަތު ރައްކާތެރި ކުރުމާއެކު، އައިއޭއީއޭގެ ސޭފްގާޑްސް އޮބްލިގޭޝަންގެ ތެރެއިން އެޖެންސީއާއެކު އެއްބާރުލުން ދިނުމަށް ތައްޔާރަށް ތިބި ކަމަށެވެ.

މި ބައްދަލުވުމަކީ، ޣަރީބާބާދީ ބެއިޖިން ގައި، ރަޝިޔާ އަދި ޗައިނާގެ އިސްވެރިންނާ ބައްދަލު ކުރެއްވުމަށް ފަހު، ބޭއްވުނު ބައްދަލުވުމެކެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަޣާއީ ވިދާޅުވީ، އީރާނުގެ ނިއުކްލިއަރ ވަސީލަތްތަކަށް އޮތް ނުރައްކާ އިތުރުވެފައި ވާތީ، އައިއޭއީއޭ އާއެކު މަޝްވަރާތައް އިތުރު ކުރުމަކީ އާދައިގެ ކަމެއް ކަމަށެވެ.

މާޗު މަހުގެ ހަތް ވަނަ ދުވަހު އެމެރިކާގެ ރައީސް ޑޮނަލްޑް ޓްރަމްޕް، އީރާނުގެ ރޫޙާނީ ލީޑަރު އަލީ ޚާމަނާއީ އަށް ފޮނުއްވި ސިޓީއެއްގައި، އީރާނުގެ ނިއުކްލިއަރ ޕްރޮގްރާމާ ގުޅޭ ގޮތުން އަލުން މަޝްވަރާތައް ފެށުމަށް ގޮވާލައްވާފައިވެ އެވެ.

އަދި އެކަމަށް އިންކާރުކޮށްފި ނަމަ، ހަނގުރާމަވެރި ފިޔަވަޅުތައް އަޅަން ޖެހިދާނެ ކަމުގެ އިންޒާރު ވެސް ދެއްވާފައިވެ އެވެ. ނަމަވެސް، އެމެރިކާ އާއެކު މަޝްވަރާ ކުރުމަށް ދެކޮޅު ހަދާ ކަމަށް އީރާނުން ވަނީ ހާމަކޮށްފަ އެވެ.

މީގެ ކުރިން 2015 ގައި ވެވުނު ނިއުކްލިއަރ އެއްބަސްވުމުން އެމެރިކާ ވަކިވުމަށް ފަހު، އީރާނުން ޔުރޭނިއަމް އެންރިޗް ކުރުން 60 ޕަސެންޓަށް އިތުރު ކޮށްފައިވެ އެވެ.

މިއީ ނިއުކްލިއަރ ހަތިޔާރު އުފެއްދުމަށް ބޭނުންވާ 90 ޕަސެންޓާ ގާތް މިންވަރެކެވެ. މިހާރު އީރާނުން ވަނީ އިނގިރޭސިވިލާތް، ފްރާންސް އަދި ޖަރުމަނާ އެކު އެއްބަސްވުން އަލުން ހަރުދަނާ ކުރުމަށް މަސައްކަތް ތަކެއް ފަށާފައި އެވެ.