މޯލްޑިވްސް ފުޑް އެންޑް ޑްރަގް އޮތޯރިޓީން ނެރުނު ކާބޯތަކެތި އިޝްތިހާރު ކުރުމާ ބެހޭ ޤަވައިދާއި ދެކޮޅަށް ކާނިވާ ސަރަހައްދުގައި ގިނަ އަދަދެއްގެ އާންމުން އެއްވެ އިހުތިޖާޖު ކޮށްފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީން ފެބުރުއަރީ މަހުގެ 20 ވަނަ ދުވަހު އާންމު ކުރި ކާބޯތަކެތި އިޝްތިހާރު ކުރުމުގެ ގަވައިދުގައި ވާ ގޮތުން ރެސްޓޯރެންޓް ތަކުން ރޯދަ މަހަށް ނެރޭ ކާބޯތަކެތީގެ މެނޫތައްވެސް ހުއްދަ ނެތި އިޝްތިހާރު ނުކުރެވޭނެއެވެ.

އެހެން ނަމަވެސް ކާބޯތަކެތި އިޝްތިހާރު ކުރުމާ ބެހޭ މި ގަވައިދަށް އާންމުންގެ ފާޑުކިޔުން ބޮޑުވުމުން ސޯޝަލް މީޑިއާ ގައި ކުރާ ކާބޯތަކެތީގެ ޕޯސްޓްތައް އިޝްތިހާރުގެ ގޮތުގައި ނުބެލެވޭނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ވަނީ ބުނެފައެވެ.

މާރިޗު އެއްވަނަ ދުވަހު އެމްއެފްޑިއޭ އިން ނެރުނު ނޫސް ބަޔާނެއްގައި ބުނީ، ގަވައިދުގައި އެ އޮތޯރިޓީ އަށް ހުށަހަޅައިގެން ހުއްދަ ހޯދަން ބަޔާން ކޮށްފައިވަނީ ކާބޯތަކެތި ނުވަތަ ކާބޯތަކެތި އުފެއްދުމަށް ބޭނުން ކުރާ ބާވަތެއް ނުވަތަ އެއްޗެއްގެ މަގުބޫލު ކަން އިތުރުކުރުމުގެ މަގްސަދުގައި ހިންގާ ހަރަކާތަށް ކަމަށެވެ.

އެހެން ނަމަވެސް މިގޮތައް ކޮށްފައިވާ ޕޯސްޓްގައި ހިމެނޭ ކާބޯތަކެއްޗަކީ ދެވަނަ އެއް ނެތް ނުވަތަ އެހެން ކާބޯއެއްޗަކާ އަޅާ ކިޔުން ފަދަ އިބާރާތެއް ނުވަތަ ފޮޓޯ އެއް ބޭނުން ކުރާ ނަމަ ހުއްދަ ނުނަގާ ބޭނުން ކުރުމަކީ މަނާ ކަމެއް ކަމަށްވެސް ބުނެފައިވެއެވެ.

މި ކަމާއި ގުޅިގެން ގިނަ ބައަކު އެއްވެއް ކާނިވާ ސަރަހައްދުގައި އިހުތިޖާޖު ކުރިއިރު، އިހުތިޖާޖުގެ ބައިވެރިން ބުނަމުން ދިއައީ މޯލްޑިވްސް ފުޑް އެންޑް ޑްރަގް އޮތޯރިޓީން ހަދާފައިވާ މި ޤަވައިދަކީ ކުދި އަދި މެދުފަންތީގެ ވިޔަފާރިތަކަށް ބޮޑެތި ގެއްލުންތަކެއް ލިބިގެންދާނޭ ގަވާއިދެއް ކަމަށާއި އަދި މިއީ ގަސްތުގައި ވިޔަފާރިތަކަށް ގެއްލުމެއް ދީނުމަށް ކުރިކަމެއް ކަމަށެވެ.

އިހުތިޖާޖުގެ ބައިވެރިން ބުނީ ކާބޯތަކެތި އިސްތިހާރު ކުރުމަށް ޤަވައިދެއް ހެދިފައި އޮތުމަކީ މައްސަލައެއް ނޫން ކަމަށާއި ނަމަވެސް މިކަން މިހާރު ކޮށްފައި މިއޮތީ ކަމުދާ ގޮތަކަށް ނޫންކަމަށެވެ. އެގޮތުން ކޮންމެ ފަހަރަކު އެޕްރޫވަލް ހޯދަން ލާރި ދޭން ޖެހޭ ގޮތަކަށް އޮތުމަކީ މިއީ ކަންބޮޑުވާ ކަމެއް ކަމަށް ވެސް މި އިހުތިޖާޖުގައި ބައިވެރިވި ބައިވެރިން ވަނީ ބުނެފައެވެ.

މީގެ އިތުރުން ކާބޯތަކެތި އިސްތިހާރުކުރުމަށް ކޮންމެ ފަހަރަކު އެޕްރޫވަލް އެއް ހޯދަން ލާރި ދޭން ޖެހުމަކީ ސީދާ ރައްޔިތުންގެ އަތުން ކުރެވޭ ވައްކަމެއް ކަމަށް އިހުތިޖާޖުގެ ބައިވެރިން ބުނެފައިވެއެވެ.

މިދިއަ ފެބްރުއަރީ މަހުގެ 20 ވަނަ ދުވަހު މޯލްޑިވްސް ފުޑް އެންޑް ޑްރަގް އޮތޯރިޓީން އާންމު ކުރި ކާބޯތަކެތި އިޝްތިހާރު ކުރުމުގެ ގަވައިދުގައިވާ ގޮތުން މޯލްޑިވްސް ފުޑް އެންޑް ޑްރަގް އޮތޯރިޓީގެ ހުއްދަ ނެތި އެއްވެސް ބާވަތެއްގެ ކާބޯތަކެތި އިޝްތިހާރު ކުރުމަކީ މަނާ ކަމެކެވެ. އަދި ހުއްދަ ލިބިފައިވާ އިޝްތިހާރެއް ބަދަލު ކުރުމަކީ ވެސް މަނާ ކަމެކެވެ.

އެގޮތުން އެ އޮތޯރިޓީގެ ގަވައިދާ ޚިލާފު ވާ ފަރާތްތައް ފުރަތަމަ ފަހަރު 10،000ރ ގެ ޖުރިމަނާ އެއް އަދި ދެވަނަ ފަހަރު 100،000 ރުފިޔާގެ ޖުރިމަނާ އެއް އަދި ތިންވަނަ ފަހަރު 300،000ރ އިން ޖުރިމަނާ ކުރުމުގެ އިތުރުން ތިން ފަހަރަށް ވުރެ އިތުރުވާ ކޮންމެ ފަހަރަކު 500،000ރ އިން ޖުރިމަނާ ކުރާނެ ކަމަށް ވެސް ގަވައިދުގައި ވެއެވެ.

މީގެ އިތުރުން އެ ގަވައިދު އޮތް ގޮތުން ކާބޯތަކެތީގެ އިޝްތިހާރެއް ފާސް ކުރުމަށް ކޮންމެ ފަހަރަކު 1،500ރ ގެ ފީއެއް ދައްކަން ޖެހޭނެ އެވެ. މީގެ އިތުރަށް ބުނެފައިވަނީ އެނަރޖީ ޑްރިންކްސް ނުވަތަ ކާބޮނޭޓެޑް ޑްރިންކެއްގެ އިޝްތިހާރު ފާސް ކުރުމަށް 3000ރ ގެ ފީއެއް ދައްކަން ޖެހޭނެ ކަމަށެވެ. އަދި އިޝްތިހާރަކަށް ބަދަލެއް ގެންނަ ކޮންމެ ފަހަރަކުވެސް ހުއްދަ ހޯދަން ޖެހޭނެއެވެ.