ޕީއެންސީއަށް މީހުން ވެއްދުމަށް ވަގު ފޯމް ހުށަހަޅައި ހިންގި ހިޔާނާތުގައި އިލެކްޝަން ކޮމިޝަން (އީސީ)ގެ ބައިވެރިވުން އޮތް ކަމަށް ތުހުމަތުކުރެވޭ ކަމަށް އެމްޑީޕީގެ ގާނޫނީ ކޮމިޓީގެ މެންބަރު އަލްއުސްތާޛް އަޙްމަދު މައުރޫފް ވިދާޅުވެއްޖެއެވެ.

ވަގު ފޯމް ހުށަހަޅައި ޕީއެންސީއަށް އެމްޑީޕީގެ މެންބަރުން ހިމެނޭ ގޮތަށް ގިނަ އަދަދެއްގެ އާއްމު ރައްޔިތުން އެޕާޓީއަށް ވައްދާފައިވާ މައްސަލައާ ގުޅިގެން ބުރާސްފަތި ދުވަހު ހެނދުނު އެމްޑީޕީގެ މެންބަރުން ވަނީ އިލެކްޝަން ކޮމިޝަނަށް ހާޒިރުވެ، މިކަންބޮޑުވުން އިލެކްޝަން ކޮމިޝަންގެ މެންބަރުންނާ ހިއްސާކުރައްވާފައެވެ.

މި މައްސަލައާ ގުޅޭގޮތުން ރާއްޖެއެމްވީއަށް މައުރޫފް ވިދާޅުވީ ވަގު ފޯމާއެކު ޕީއެންސީއަށް ގިނަ ބަޔަކު ވެއްދިކަމުގެ ގިނަ ޝަކުވާތަކެއް ލިބިފައިވާ ކަމަށެވެ. ވަޒީފާގެ ބިރުދައްކައިގެން ވެސް މަޖުބޫރުން ޕީއެންސީއަށް ބައެއް މީހުން ވައްދާފައިވާއިރު، އެމްޑީޕީގެ ދަފްތަރުގައި ތިބި ޕާޓީގެ މެންބަރުންނާއި، އެއްވެސް ޕާޓީއެއްގައި ނެތް މީހުން ވެސް ޕީއެންސީއަށް ވަގު ފޯމާއެކު ވައްދާފައިވާ ކަމަށް އޭނާ ވިދާޅުވިއެވެ.

ގިނަ ޝަކުވާތަކާއެކު އީސީގެ މެންބަރުންނާއި ބައްދަލުކުރައްވައި އެމައްސަލަތަކަށް ސަމާލުކަމަށް ގެނެސްފައިވާކަން ފާހަގަކުރައްވައި މައުރޫފް ވިދާޅުވީ މިޝަކުވާތަކަށް ބެލުމެއްނެތި ޕާޓީތަކުގެ ދަފްތަރު އާއްމުކޮށްފައިވާ ކަމަށާއި، މިއީ ބަލައިގަނެވޭނެ ކަމެއް ނޫން ކަމަށެވެ. ފޯމުތަކުގެ ސައްހަކަން ކަށަވަރުނުކޮށް އެމައުލޫމާތު ހާމަކުރުމުން އެކަމާއި ސުވާލު ކުރި ނަމަވެސް އިސީގެ މެންބަރުން އެއްވެސް ޖަވާބެއް ދެއްވާފައިނުވާ ކަމަށް މައުރޫފް ވިދާޅުވިއެވެ.

މައުރޫފް ވިދާޅުވީ މިމައްސަލާގައި އީސީން އަމަލުކުރި ގޮތުން މިހާރު އެކޮމިޝަނަށް އިތުބާރު ނެތް ކަމަށެވެ. އަދި ޕީއެންސީއާއެކު މިހިޔާނާތް ހިންގުމަށް އީސީން ވެސް ބައިވެރިވެފައިވާކަމަށް ތުހުމަތު ކުރެވޭ ކަމަށް މައުރޫފް ވިދާޅުވިއެވެ.