ތުރުކީން އިޒްރޭލާ އެކު އޮންނަ ހުރިހާ ގުޅުމެއް ކަނޑާލައިފި ކަމަށް އެ ގައުމުގެ ރައީސް އިއުލާނު ކުރައްވައިފިއެވެ.
ތުރުކީގެ ރައީސް ރަޖަބް ޠައްޔިބް އަރްދޮޣާން ވިދާޅުވެފައިވަނީ ޣައްޒާގައި އިޒްރޭލުން ހިންގަމުންދާ ނަސްލު ނައްތާލުމުގެ ހަނގުރާމަ އާއި ލުބުނާނުގައި އިޒްރޭލުން ކުރަމުންދާ ހަނގުރާމައާ ގުޅިގެން ތުރުކީ ސަރުކާރުން އިޒްރޭލާއެކު ހުރިހާ ގުޅުމެއް ކަނޑާލައިފި ކަމަށެވެ.
"ތުރުކީ ސަރުކާރުން އިޒްރޭލާއެކު ގުޅުން ކުރިއަށް ނުގެންދާނެ އަދި ގުޅުން ބަދައްސެއް ވެސް ނުކުރާނެ،" އުރުދުޣާން ބުދަ ދުވަހު ސަޢޫދީ އަރަބިއްޔާ އަދި އަޒަރްބައިޖާނަށް ކުރެއްވި ދަތުރުފުޅަކަށްފަހު މަތިންދާބޯޓުގައި ނޫސްވެރިންނާ ވާހަކަފުޅު ދައްކަވަމުން ވިދާޅުވިއެވެ.
"[ވެރިކަންކުރާ އިއްތިހާދުން] އިޒްރޭލާއެކު ގުޅުން ކަނޑާލުމަށް ނިންމު ނިންމުމުގައި ސާބިތުވެ ދެމި ތިބޭނަން، އަދި މުސްތަޤްބަލުގައިވެސް މި ސްޓޭންޑް ދަމަހައްޓާނަން." އުރުދުޣާން ވިދާޅުވިއެވެ.
ތުރުކީގެ އަނަދޮލު ނިއުސް އޭޖެންސީން ބުނެފައިވާ ގޮތުން، ފަލަސްޠީނުގައި އިޒްރޭލުން ހިންގަމުންދާ ޖަރީމާތަކަށް ތުރުކީން އެންމެ ވަރުގަދަ ރައްދު ދީފައިވާކަން އުރުދުޣާން ވަނީ ފާހަގަ ކުރައްވާފައެވެ.
ނަސްލު ނައްތާލުމުގެ ކުށަށް އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ޖަވާބުދާރީ ކުރުވުމަށް ކުރެއްވެން ހުރި ހުރިހާ ކަމެއް ކުރައްވާނެކަމަށް އުރުދުޣާން ވަޢުދުވެވަޑައިގަތެވެ.
އިޒްރޭލަށް ހަތިޔާރު ޝިޕްމަންޓުތައް ފޮނުވަމުންދާތީ ކަންބޮޑުވުން ފާޅުކުރައްވަމުން އުރުދުޣާން ވިދާޅުވީ، "ހަތިޔާރު ފޮނުވުން ކުރިއަށް ދާހާ ހިނދަކު، އިޒްރޭލު އިތުރަށް އަނިޔާވެރިވާނެ، އިޒްރޭލު ނުހުއްޓުވޭ ނަމަ ހަމަ ކޮންމެ ދުވަހަކު، ފަލަސްޠީނާއި ލުބުނާންގެ ހާލަތު ގޯސްވަމުންދާނެ" ކަމަށެވެ.
