ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ސްޕޮންސަރ ހަރަދުތައް އިންތިހާއަށް އިތުރު ކަމަށާއި، ރައްޔިތުންގެ ދިރިއުޅުމުގެ ހާލަތު ރަނގަޅު ކުރުމަށް އިސްކަންނުދޭ ކަމަށް އެމްޑީޕީގެ ގާނޫނީ ކޮމިޓީގެ މެންބަރު އަލްއުސްތާޛް އަޙްމަދު މައުރޫފު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މައުރޫފު ވިދާޅުވީ މުޅިރާއްޖޭގެ ތަރައްގީގެ މަޝްރޫއުތައް ހުއްޓިފައިވާ ކަމަށާއި، ސަރުކާރަށް އަހަރެއްގެ ވެގެންދިޔައިރު ރައްޔިތުން ބޭނުންވާ ތަރައްގީގެ މަޝްރޫއެއް ކުރިއަށް ގެންދެވިފައިނުވާ ކަމަށެވެ.
މައުރޫފު ވިދާޅުވީ ތަރައްގީގެ މަޝްރޫއުތައް ކުރިއަށް ގެންދާ ކުންފުނިތައް ކަމަށްވާ އެމްޓީސީސީ ފަދަ ކުންފުނިތަކުން މަޝްރޫއުތައް ހުއްޓާލާފައިވަނީ ފައިސާ ނެތިގެންނާއި، މަޝްރޫއަށް ބޭނުންވާ ސާމާނާއި، އާލަތްތައް ނެތުމާއި، ވެހިކަލްތަކަށް އަޅާނެ ތެޔޮ ނެތިގެން ކަމަށެވެ. ސަރުކާރުގެ ހިއްސާ އޮންނަ ކުންފުނިތަކާއި، މިނިސްޓްރީތަކުން މަޝްރޫއުތައް ކުރިއަށް ނުގެންދިޔަ ނަމަވެސް ސަރުކާރު ޕްރޮމޯޓް ކުރުމަށް ސްޕޮންސަރގެ ނަމުގައި ގިނަ އަދަދެއްގެ ފައިސާ ކޮންމެ މަހަކު ހަރަދުކުރާ ކަމަށެވެ. އަދި ސަރުކާރުގެ އިވެންޓްތަކަށް ވެސް ބޮޑު ހަރަދެއް ކުރާ ކަމަށް އޭނާ ވިދާޅުވިއެވެ.
މައުރޫފް ވިދާޅުވީ މިސަރުކާރުގެ އަމަލުތައް ހުރި ގޮތުން، ރައްޔިތުން ހާލަތު ރަނގަޅު ކުރުމަށް އިސްކަން ނުދޭކަން ހާމަވާ ކަމަށެވެ.
މިދެންނެވި ކުންފުނިތަކުން ސަރުކާރުގެ އެސްއޯއީތަކުން އެބަހުރޭ ނޫސްތަކަށް އެނގޭތޯ އަޅުގަނޑު އެހައި ނޫސް ކަމަކަށް ދަންނަވާކަށް ބޭނުމެއް ނޫން. އެއީ ވެބްސައިޓެއް ހަދައިގެން ހިންގިޔަސް އަދި ނޫހަކަށް ނުވޭ ތެދެއްތޯ ބަޔަކު އެ ނުކިޔާ ކަމަށް ވެއްޖެއްޔާ. މަދު ބަޔަކު މިއެއްޗެހި ކިޔާފައި ހުންނަނީ. އޭގެ ޚަބަރެއް ރިޕޯސްޓް ވެސް ކޮށްލާފައި އޮންނަނީ. މިހެން ގޮސް ބައިވަރު ކުދިކުދި ބަޔަކަށް އެބަހުރޭ ބައިވަރު ސްޕޮންސަރގެ ނަމުގައި ފައިސާދީފައި. މިއީ ހަމަ ގައިމު ވެސް ކޮންމެ މަހަކު ކޮންމެ މަހަކު ހިނގާނެ ހަރަދެއް. މި ދެންނެވި ޕްރޮޖެކްޓް ހިންގުމަށް ބޭނުންވާ ފައިސާ ނުވަތަ އެމަސައްކަތުގައި ގެންގުޅޭ މީހުންނަށް ކާން ދިނުމާއި، ވެހިކަލަށް ތެޔޮ އެޅުމާއި، މިކަންކަން ނުކޮށް އެކަންކަން ހުއްޓިފައި އޮތްއިރުގައި ސްޕޮންސަރ އެބަ ދެއްވާ. ސަރުކާރުގެ އިވެންޓްތަކަށް ރައީސް މުއިއްޒުގެ ނުވަތަ އަނބިކަބަލުންގެ ބައެއް އިވެންޓްތަކަށް ސްޕޮންސަރ އެބަ ދެއްވާ އެކަމަށް އެބަ ހަރަދުކުރައްވާ. އެހެންޏާ އޮންނަވަރަށް ވުރެ ގިނަ އިވެންޓްތައް އިންތިޒާމު ކުރައްވާ. އެހެންވީމަ މީގެން އެބަ އެނގޭ މިބޭފުޅުންގެ ޕިއޮރިޓީސް ނެތްކަން.އެމްޑީޕީގެ ގާނޫނީ ކޮމިޓީގެ މެންބަރު އަލްއުސްތާޛް އަޙްމަދު މައުރޫފް
މައުރޫފު ވިދާޅުވީ އަސާސީ ޚިދުމަތްތައް ގާއިމްކޮށް، މިހާރު ލިބޭ ޚިދުމަތްތަކުގެ ފެންވަރު ރަނގަޅު ކުރުމުގެ ބަދަލުގައި ސަރުކާރުން ދަނީ ބޭކާރު ހަރަދުކުރަމުން ކަމަށެވެ. އަދި ނަތީޖާއެއް ގޮތުން މިއަދު ގައުމަށް ބޭނުންވާ ތަރައްގީއާއި، ރައްޔިތުންނަށް ބޭނުންވާ ޚިދުމަތްތައް ނުލިބި ނިކަމެތިވެގެން ދަނީ ރައްޔިތުން ކަމަށް އޭނާ ވިދާޅުވިއެވެ.
