ޒުވާންޖީލު މިހާރު އޮތީ ގެލުން ނުވަތަ އެބްރެވިއޭޝަން ތެރޭގަ ކަމަށާއި، އެމީހުންނާއި މުޚާތަބުކުރެވޭނީ އެކަން ދަނެގެން ކަމަށް ދިވެހިބަހަށް ގިނަ ޚިދުމަތްތަކެއް ކުރައްވާފައިވާ މުހައްމަދު ސަލީމް ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީގެ ޓްރެއިނިން އެކެޑެމީގެ ހަރަކާތްތަކުގެ ތެރެއިން، ބުދަ ދުވަހުގެ ރޭ ބޭއްވި ވާހަކަ ދެއްކުންތެރިކަމުގެ ހުނަރު ދަސްކޮށްދޭ ކޯސް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
ޒުވާނުންނަކީ އެބްރެވިއޭޝަން ނުވަތަ ބަސްތަކުގެ ކުރު ފޯރމްތައް ބޭނުންކުރާ ބަޔަކަށް ވުމުން އެ މީހުން މުއާމަލާތު ކުރާ ގޮތް ވަރަށް ތަފާތުކަމަށް ސަލީމް ވަނީ ފާހަގަކުރައްވާފައެވެ. އެކަމުގެ ސަބަބުން ޒުވާނުން ޖަލްސާ އަށް ދިޔަކަމުގައި ވީ ނަމަވެސް އެ ޖަލްސާގައި ދައްކާ ވާހަކަ އެ ކުދިންނަށް ފަހުމް ނުވާ ކަމަށް އޭނާ ވިދާޅުވިއެވެ. ވާހަކަދައްކާ އިރު އޯޑިއަންސް އަށް ވާހަކަ ފޯރުކޮށްދިނުމުގެ މުހިންމުކަމާއި އެކަމުގެ ވައްޓަފާޅިއަށް ސަލީމް ވަނީ އަލިއަޅުވާލައްވާފައެވެ.
13 ވަރަކަށް އަހަރު މެދު ނުކެނޑި ކިޔަވާދެމުންދާ މީހެއްގެ ހައިސިއްޔަތުން އެނގިވަޑައިގަންނަވާ ކަމަކީ މިހާރުގެ ޒުވާނުން ނުވަތަ ޖެންޒީންނާއި ދެން އޮތް ޖީލާއި ވާހަކަދެއްކެވުމުގައި ހުރި ފަރަގުތައް ކަމަށް އޭނާ ފާހަގަކުރެއްވިއެވެ. އެހެންކަމުން އެ މީހުންނާއި ވާހަކަ ދައްކަން އާއްމުކޮށް ޕޯޑިއަމްތަކަށް އަރާ މީހުން ބޭނުންކުރާ ބަހުރުވަ އާއި ވަރަށް ތަފާތުކަމަށާއި އެއީ ދެ ދުނިޔެއެއްގައި އުޅޭ ބައެއްކަމަށް ސަލީމް ވަނީ ފާހަގަކުރައްވާފައެވެ. ސަލީމް ވަނީ ވޯޓުލުމުގެ އާބާދީ އަދި މުޖުތަމައުގެ ބޮޑުބައެއް ހިއްސާކުރާ ޒުވާނުންގެ ބަސްމޮށުންތެރިކަމާއި އާއްމުކޮށް ވާހަކަދައްކާ ގޮތާއި ހުރި ތަފާތު ހިއްސާކުރައްވާ، އެކަމުގެ ސަބަބުން އެ މީހުންނަށް ވާހަކަތައް ވާސިލްކޮށްދިނުމުގައި ދިމާވާނެ ގޮންޖެހުންތައް ވެސް ސާފުކޮށްދެއްވާފައެވެ.
ޖެންޒީއަކީ އެކްރެނިމް ފޯމޭޝަނެއްގަ އުޅޭ ބައެއް. އެ މީހުން ސޯޝަލް މީޑިއާގަ 8 ގަޑި އިރު، 6 ގަޑި އިރު ބައެއް ފަހަރު 13 ގަޑި އިރު ހޭދަކުރޭ. އެ މީހުން ދުވާލަކު ބަލާ 60 ވީޑިއޯ. ބަލަނީ 60 ސިކުންތުގެ ވީޑިއޯ. މިއީ އެ މީހުންގެ ދުނިޔެ. އެ މީހުން ބޭނުން ކުރަނީ ހަތަރު ފަސް ލަފްޒު އެއްކޮށްލާފަ ވޯޑެއް. އެބްރެވިއޭޝަންސް ބޭނުންކުރަނީ. ޓީބީއެޗް، އޭގެ މާނައަކީ ޓުބީ ހޮނެސްޓް، މިހެން ބުނަން ވަރަށް ފަޔަރ ވާނެ. ފަޔަރގެ މާނައަކީ އެ މީހުންގެ ބަހުން ކޫލްވުން. އަޅުގަނޑުމެން މި ތިބެނީ ހޫނުވެފަ. މިއީ ކެޕްއެއް ނޫން މިއީ ނޯކެޕް. މާނައަކީ ޓްރޫތް. ދެ ދުނިޔެއެއްގައި އުޅޭ ދެބައި މީހުން މިއީ. މިއީ ވޯޓު ލުމުގެ ބޮޑު ޗަންކެއް. ދެން މި ބުނަނީ އެ މީހުންނަށް ރީޗްވެއްޖެއްޔާ އެލް އެއް ނުވާނެ. މާނައަކީ ލޮސް. ވާނީ ޑަބްލިއު. އެއީ ވިން.ދިވެހިބަހަށް ގިނަ ޚިދުމަތްތަކެއް ކުރައްވާފައިވާ މުހައްމަދު ސަލީމް
މީގެ އިތުރުން ރިޔާސީ އިންތިޚާބާއި އަދި އެހެނިހެން އިންތިޚާބުތަކުގައި މީހުން ތަމްރީންކުރުމުގައި އެމްޑީޕީ އާއި އެކު މީގެ ކުރިން ވެސް މަސައްކަތްކުރައްވާފައިވާނެ ކަމަށް ފާހަގަކުރައްވާ، އެމްޑީޕީގެ މޫނުތަކަކީ އާ މޫނުތަކެއް ނޫންކަމަށް އޭނާ ވިދާޅުވިއެވެ. އަދި ވާހަކަދައްކާ އިރު ދައްކާ ވާހަކަ އަކީ ސިކުނޑީގައި ފޮރުވިފައި އޮންނަ ކަމެއް ކަަމަށާއި އެ ވާހަކަ ޝުއޫރެއްް ގޮތުގައި ބޭނުން ކުރެވެނީ ދުލުގެ ޒަރިއްޔާއިން ކަމަށް އޭނާ ވިދާޅުވިއެވެ. އެ އަސަރު ނެރުމަށް ބޭނުންވާ ޖަޒުބާތާއި ލަފުޒުތަކާއި ބީރައްޓެހިވުމުން ސިކުނޑީގަ ހުންނަ ޚިޔާލުތައް ހާމަކުރަން އުނދަނގޫވާ ކަމަށް އޭނާ ވިދާޅުވިއެވެ.
ދެން ދިމާވާ މައްސަލަ އަކީ ތިމާއި އާއި އޯޑިއަންސްގެ ބޮޑީ ލެންގުއެޖް ދެނެނުގަނެވުން ކަމަށް އޭނާ ވިދާޅުވިއެވެ. މިސާލަކަށް އޯޑިއަންސްގައި ތިބި މީހުން ބުމަ ގޮށްޖަހާނަމަ އެއީ ވާހަކަދައްކާ މީހާ އޯޑިއަންސް އަށް ކަމު ނުދާކަން އެނގޭ ކަމެއް ކަމަށް އޭނާ ފާހަގަކުރެއްވިއެވެ. ވާހަކަދައްކާ އިރު އެ ވާހަކަދައްކާ މީހާގެ އަޑަކީ ހިތްގައިމު މިއުޒިކަކަށް ވާން ޖެހޭ ކަމަށް އޭނާ ވަނީ ވިދާޅުވެފައެވެ. އަދި ވާހަކަދައްކަދެއްކުންތެރިން ވާހަކަދައްކަންވާނީ ބަސްކޮށާރު ރަނގަޅުކޮށްގެން އަބަދުވެސް ތިމާއަށް ވުރެ އެހެންމީހުން މޮޅު މީހުން ކަމަށް ވިސްނައިގެން ކަމަށް އޭނާ ވިދާޅުވިއެވެ.
