ރައީސް ޑރ މުޙައްމަދު މުއިއްޒު ހުވަދު އަތޮޅަށް ކުރެއްވި ދަތުރުފުޅުގައި ގދ. ވާދޫ އަށް ވަޑައިގެން ދެއްކެވި މަޖާ ވާހަކަފުޅުތަކެއް ކަމަށް ޖަލްސާ ބެލި މީހަކު އަޅުގަނޑަށް ކިޔާދިނެވެ. އޭނާ ބުނީ ރައީސްގެ ވާހަކަފުޅު އަޑުއަހާފައި ހީހީ ހަލާކުވެއްޖެ ކަމަށެވެ. ފަހުން ދެރަވެސް ވި ކަމަށް އޭނާ ކިޔައި ދިނެވެ. އޭނާ ބުނީ ރައީސްގެ ވާހަކަފުޅުގައި ވާދޫއަށް ތައުރީފްކުރައްވަން ފެއްޓެވި އިރު، ރައީސަށްވުރެ ބޮޑަށް ވާދޫގެ ތާރީޚު އިނގޭ މީހަކު ނުހުންނާނެއޭ ހިތަށް އެރި ކަމަށެވެ. ސްކޫލަކީ ވާދޫ އަށް ޚާއްސަ ތަނެއް ކަމަށާއި، ސަބަބަކީ ވާދޫ އަކީ ވާދޫ ދަންނަކަލޭގެފާނުގެ ރަށް ކަމުގައި ވާތީ ކަމަށް ރައީސް ވިދާޅުވި ކަމަށް އޭނާ ކިޔައިދިނެވެ.

ކަން މިހެން އޮތުމުން ވާދޫގެ ތައުލީމަށް މި ސަރުކާރުން ވެސް ޚާއްސަ އިސްކަމެއް ދޭ ކަމަށާއި، އަދި ހުރިހާ ސަރުކާރަކުން ވެސް އެހާ އިސްކަން ދޭންޖެހޭނެ ކަމަށް ރައީސް ވިދާޅުވީމާ އޭނާ ހީކުރީ ވާދޫގެ ތައުލީމީ ކަންކަން އޮންނާނީ ވަރަށް ފުރިހަމަވެފައި ކަމަށެވެ. ނަމަވެސް ދެން ރައީސް ވިދާޅުވި އެއްޗަކުން އޭނާއަށް ކުރެވުނު ހީ ކުށް ހީއަކަށް ބަދަލުވީއެވެ. ރައީސް ވިދާޅުވީ އެހެންވެގެން ވާދޫގައި މަސައްކަތް ކުރިއަށް ނުގޮސްފައި ހުރި މަލްޓިޕާޕަސްހޯލާ ސްކޫލަށް އިތުރު ކުރެވޭ ކްލާސްރޫމްގެ މަސައްކަތް ވީ އެންމެ އަވަހަކަށް ކުރިއަށް ގެންގޮސްދެއްވާނެ ކަމަށެވެ. ރައީސް މިހެން ވިދާޅުވި އިރު، ރައީސްގެ ވެރިކަމަށް އަހަރަކާ ދެމަސްވެއްޖެއެވެ. ވާދޫގެ ތައުލީމަށް އިސްކަންދެވޭނީ މިވަރަށޭ ހިތައް އެރިކަމަށް އޭނާ ބުންޏެވެ.

މިވާހަކަތަކަށްފަހު ރައީސް ދެން ދެއްކެވީ އަދި މާ ބޮޑު ވާހަކައެކެވެ. އެއީ ވާދޫ އަށް ދިވެހި ޓީޗަރެއް ހޯދަން ޖެހިގެން އުޅޭ ވާހަކައެވެ. ސަލާމް ކުރެއްވި ސަފުގައި ތިބި ބެލެނެވެރިންނާ ތުއްތު ކުދިންނާ ޕްރިންސިޕަލްއާއި ކައުންސިލްގެ ރައީސް ވެސް އެކަމަށް އެދުނު ވާހަކައެވެ. އަދި މިދިއަ އެއް އަހަރުގެ ތެރޭގައި އެޑިއުކޭޝަން މިނިސްޓްރީން އެކަމަށް ވަރަށް މަސައްކަތް ކުރަމުންދާ ވާހަކައާއި، ވޭޖް އުސޫލުން ވިއަސް، ވަގުތީ ގޮތުން ވިއަސް ރިސޯސް މީހަކަށް ވިއަސް ކޮންމެވެސް ގޮތަކުން ދިވެހި ޓީޗަރެއް ވާދޫއަށް ހޯދުމަށް 100 ޕަސެންޓް އެއްބާރުލުން ސަރުކާރުން ދޭނެ ކަމަށެވެ.

ދިވެހި ޓީޗަރެއް ހޯދާ ނުދެވިގެން އަހަރު ދުވަސް ހޭދަވި ސަރުކާރެއްގެ ވާހަކަ އަޑު އިވުނު މިއީ ފުރަތަމަ ފަހަރެވެ. ސަރުކާރަކުން އެރަށެއްގެ ތައުލީމަށް އެންމެ ބޮޑު އިސްކަމެއް ދޭންޖެހޭ އެއް ރަށަކީ ވާދޫ ކަމަށް ރައީސް ވިދާޅުވި ރަށުގެ ހާލު ނަމަ ދެން އެހެން ރަށްރަށާއި މެދު ކަން ހިނގާނީ ކިހިނެއްބާވައެވެ.

ރައީސްގެ މިވާހަކަފުޅު ނިންމަވާލައްވަމުން ވާދޫ އަށް ދިވެހި ޓީޗަރެއް ހޯދުމުގެ މަސައްކަތުގައި އެންމެން ގުޅިގެން އެކީއެކަތިގަނޑެއްގެ ގޮތުގައި މަސައްކަތް ކޮށްދިނުމަށް ރައީސް އެދިވަޑައިގެންނެވުމުން ދެން ތައުލީމީ ދާއިރާގެ އެހެނިހެން ތަރައްގީގެ ވާހަކަ މި ސަރުކާރުން ދެއްކުމުގެ ބޭނުމެއް އެބަ އޮތްބާވައޭ ހިތަށް ނާރާވަރެއް ނޫނެވެ. ރައީސް މި ވިދާޅުވީ އެންމެން ގުޅިގެން އެއް އަޒުމެއްގައި ނުކުމެ ވާދޫ އަށް ދިވެހި ޓީޗަރެއް ހޯދަންވީ ކަމަށެވެ. ކޮންމެ އަކަސް ރައީސް އަތޮޅު ތެރޭގެ ރަށްރަށަށް މިކުރައްވާ ދަތުރުފުޅުތަކުގައި ދައްކަވަމުންގެންދަވާ ވަހަކަފުޅުތައް އަޑު އަހާ ގިނަމީހުން ތިބެނީ ވާނުވާގައެވެ. ރައީސް ވިދާޅުވާން އުޅުއްވަނީ ކޮން އެއްޗެއް ކަމެއް، ވެވަޑައިގަންނަވަން ބޭނުންފުޅުވަނީ ކޮން ވައުދުފުޅެއް ކަމެއް، ހައްދަވަން އުޅުއްވަނީ ކޮންއެއްޗެއް ކަމެއް އިނގޭ މީހަކު ނެތް އިރު ޚުދު ރައީސަށް ވެސް މިކަންކަން އެނގިވަޑައިގަންނަވާ ހެނެއް ހިޔެއް ނުވެއެވެ.