އިޓާލިއަން ލީގުގައި ލާޒިއޯއާ ދެކޮޅަށް ކުޅުނު މެޗުން ރޯމާ މޮޅުވެއްޖެ އެވެ.

ރޯމާގެ އަމިއްލަ ދަނޑުގައި ލާޒިއޯއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި ރޯމާ އިން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ.

މެޗު ފަށައިގެން 10 ވަނަ މިނެޓުގައި ރޯމާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ލޮރެންޒޯ ޕެލެގްރިނީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އެލެކްސިސް ސަލަމައެކާސް އެވެ. އޭގެ އަށް މިނެޓު ފަހުން މެޗުގައި ރޯމާގެ ދެ ވަނަ ލަނޑު ޖެހީ ސަލަމައެކާސް އެވެ. އޭގެ ފަހުން މެޗުގައި ލަނޑު ޖަހާނެ ފުރުސަތުތަކެއް ލާޒިއޯ އިން ވެސް ތަނަވަސްކުރި އެވެ. ނަމަވެސް އެ ޓީމަށް އެ ފުރުސަތުތައް ނިންމާލެވޭ ގޮތެެއް ނުވި އެވެ.

މެޗުން މޮޅުވެ، ތިން ވަނައިގައި އޮތް އިންޓަރ މިލާންއާ ދެމެދު ފަރަގު ކުޑަ ކުރުމުގެ ފުރުސަތު ލާޒިއޯ އަށް އޮތް ނަމަވެސް، މެޗުން ބަލިވެ ވަނީ އެ ފުރުސަތު ގެއްލިފަ އެވެ. ލީގު ތާވަލްގެ ހަތަރު ވަނައިގައި ލާޒިއޯ އޮތީ 19 މެޗުން 35 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން 10 ވަނައިގައި ރޯމާ އަށް ލިބެނީ 23 ޕޮއިންޓެވެ.