ފާއިތުވި 2024 ވަނަ އަހަރު ވެލިދޫ ދާއިރާގެ ރަށްތަކުގެ ރައްޔިތުންނަށް އޭނާގެ ޖީބުން 1.1 މިލިއަނަށް ވުރެ ގިނަ ރުފިޔާ ޚަރަދު ކުރެވިއްޖެ ކަމަށް ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެއެވެ.

އައްބާސް ވަނީ އެކްސް ގައި ކުރެއްވި ޕޯސްޓެއްގައި ހުސްވި އަހަރު ވެލިދޫ، ފޮއްދޫ، ޅޮހި ދާއިރާގެ ރައްޔިތުންގެ މަޖިލީސް މެމްބަރަކަށް ވީފަހުން ކުރެވުނު ޚަރަދު ތަފްޞީލް ހާމަ ކުރައްވާފައެވެ.

އެ ގޮތުން  ދާއިރާގެ ތިން ރަށުގެ ރައްޔިތުން ކޮންމެ 15 ދުވަހަކުން ޑޮކްޓަރަށް ދައްކަން ރ. އުނގޫފާރަށް ފޮނުވުމަށް ލޯންޗް ދަތުރުތަކަށް 276,000 ރުފިޔާ ޚަރަދު ކުރެއްވި ކަމަށާއި، ތިން ރަށުގެ ރައްޔިތުންގެ ތެރެއިން މާލެއިން ބޭސްފަރުވާ ކުރުމަށް އައިސް ތިބި ފަރާތްތަކަށް އެހީގެ ގޮތުގައި 119,250 ރުފިޔާ ހޭދަ ކުރެއްވިކަން އޭނާ ފާހަގަ ކުރައްވާފައިވެއެވެ.

އޭގެ އިތުރުން އެ ތިން ރަށުގެ ރައްޔިތުންގެ ތެރެއިން ރާއްޖެއިން ބޭރުން ބޭސްފަރުވާ ކުރުމަށް 189,480 ރުފިޔާ ހޭދަ ކުރެއްވި ކަމަށާއި، ކުޅިވަރު ސްޕޮންސަރ ކުރުމަށް 65,000 ރުފިޔާ ހޭދަ ކުރެއްވި ކަމަށާއި، ތަޢުލީމީ މަރުކަޒުތަކުން ހިންގި ޙަރަކާތްތަކަށް އެހީގެ ގޮތުގައި 49,000 ރުފިޔާ ދެއްވި ކަމަށް އައްބާސް ވިދާޅުވިއެވެ.

އޭނާ ކުރެއްވި ޚަރަދުތަކުގެ ތެރޭގައި  ނ. ޅޮހީގައި ހިނަވާގެ އެއް ބިނާ ކުރުމަށް ހޭދަ ކުރެއްވި 478,342 ރުފިޔާ ހިމެނެއެވެ.

އައްބާސް ވިދާޅުވީ،  ފާއިތުވީ 8 މަސްދުވަހުގެ ދާއިރާގެ ރައްޔިތުންގެ މަޖިލީސް މެމްބަރެއްގެ މުސާރައިގެ ގޮތުގައި ލިބުނީ ޖުމްލަ 615,200 ރުފިޔާ ކަމަށާއި، އެހެން ނަމަވެސް ތިން ރަށުގެ ރައްޔިތުންނަށް އެ މުއްދަތުގެ ތެރޭގައި އޭނާގެ އަތުން 1,177,072 މިލިއަން ރުފިޔާ ޚަރަދު ކުރަން ޖެހުނު ކަމަށެވެ.

އައްބާސް އިތުރަށް ވިދާޅުވީ، ރައްޔިތުންގެ މަޖިލީސްގެ މެމްބަރުންގެ ޒިންމާ އޮޅިގެން، ނުވަތަ ނޭގިގެން އުޅެނީ ދާއިރާތަކުގެ ރައްޔިތުން ކަމުގައެވެ.