ކުރިން ކަނޑައެޅި އުސޫލަށް ބޮޑެތި ބަދަލުތަކެއް ގެނެސް ބޭރު ފައިސާއާ ބެހޭ ބިލު ރައްޔިތުންގެ މަޖިލީހަށް ހޯމަ ދުވަހު ހުށަހަޅައިފި އެވެ.

ރައްޔިތުންގެ މަޖިލީހަށް ހުށަހެޅި މި ބިލުގައި ވާގޮތުން "ކެޓެގަރީ އޭ" ގެ ޓޫރިޒަމް އެސްޓެބްލިޝްމަންޓުތަކުން ރިސޯޓުތަކަށް ޑޮލަރު މާރުކުރަން ދެ ގޮތެއް އިޚުތިޔާރު ކުރަން ހިމަނާފައިވެއެވެ. އެގޮތުން އަންނަ ކޮންމެ ޓުއަރިސްޓަކަށް 500 (ފަސްސަތޭކަ) ޑޮލަރުގެ ރޭޓުން މާރުކުރުން، ނުވަތަ މަހެއްގެ ތެރޭގައި ލިބޭ އާމްދަނީގެ 20 އިންސައްތަ މާރުކުރަން ވަނީ ކަނޑައަޅާފައެވެ.

މީގެ އިތުރުން ކެޓަގަރީ-ބީ ގައި ހިމެނޭ ޓުއަރިސްޓް އެސްޓެބިލިޝްމަންޓަތަކުން، އިޚްތިޔާރު ކުރާ ގޮތެއްގެ މަތިން ކަނޑައެޅޭ އަދަދެއްގެ ބޭރު ފައިސާ އެ އެސްޓެބިލިޝްމަންޓް ހިންގާ ފަރާތުން، ބޭންކަކަށް، ރުފިޔާއަށް މާރުކުރަން ޖެހެއެވެ. އެގޮތުން ކެޓަގަރީ ބީގެ ގޮތުގައި ހިމެނޭ ޓޫރިސްޓް ގެސްޓްހައުސްތަކާއި މީހުން ދިރިއުޅޭ ރަށްރަށުގައި ހިންގާ ހޮޓާ ފަދަ ތަންތަނަށް ވެސް މަހެއްގެ ތެރޭގައި ލިބޭ އާމްދަނީގެ 20 އިންސައްތަ މާރު ކުރުމުގެ އިޚްތިޔާރު ލިބިގެންވާ ކަމަށް ބިލުގައި ބުނެފައިވެއެވެ.

ބިލުގައި މިހެން އޮތް އިރު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކުރިން އާންމު ކުރި ބޭރު ފައިސާ އާ ބެހޭ ގަވައިދުގައި ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ހޮޓާތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ ރޭޓުން މާރުކުރަން ޖެހޭ ގޮތައް އޮތީ އެއްވެސް އިސްތިސްނާ އެއް ނެތި މަޖުބޫރު ކޮށްފައެވެ.

ކެޓަގަރީ އޭ ގެ ގޮތުގައި ހިމެނެނީ ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ރިޒޯޓް ހޮޓާތަކާއި، ހޮޓާތަކާއި، ޓޫރިސްޓް އުޅަނދުތަކާއި، އެނޫންވެސް އެފަދަ ތަންތަނެވެ. އަދި ކެޓަގަރީ ބީގެ ގޮތުގައި ހިމެނެނީ ޓޫރިސްޓް ގެސްޓްހައުސްތަކާއި މީހުން ދިރިއުޅޭ ރަށްރަށުގައި ހިންގާ ހޮޓާ ފަދަ ތަންތަނެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ހޮޓާތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ ރޭޓުން ބޭންކަކަށް ރުފިޔާއަށް މާރުކުރަން ޖެހޭ ގޮތައް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލި ގަވައިދާ ގުޅިގެން ވިޔަފާރިވެރިން ފޮނުއްވި ކަންބޮޑުވުންތަކުގެ ސިޓީތަކަށް ރަސްމީ ޖަވާބެއް ނުދެއްވާ ރައީސުލްޖުމްހޫރިއްޔާ ވަނީ ސިޔާސީ ހަރަކާތެއްގައި ހުންްނަވައިގެން ގަވައިދު ބަދަލު ނުކުރައްވާނެ ކަމަށް ވިދާޅުވެފައެވެ. އަދި އޭގެ ފަހުން އެމްއެމްއޭގެ ގަވަރުނަރު އަހްމަދު މުނައްވަރު ވެސް ވަނީ އެ ވާހަކަ ތަކުރާރު ކުރައްވާފައެވެ. ނަމަވެސް ރައީސް ބަދަލު ނުކުރައްވާނަމޭ ވިދާޅުވި ގަވައިދަށް ގާނޫނެއްގެ ސިފަ ޖެއްސުމުގެ މަސައްކަތް މިވަނީ ފަށާފައެވެ.