ރައްޔިތުންގެ މަޖިލީހުން ގާނޫނުއަސާސީއަށް ގެނައި އިސްލާހުތައް އެއީ ބާތިލް އިސްލާހް ތަކެއް ކަމަށް ކަނޑައަޅައި ދިނުމަށް އެދި ސުޕްރީމް ކޯޓަށް ހުށަހެޅި ދުސްތޫރީ މައްސަލަ އެ ކޯޓުން މިއަދު ބަލައިގެންފި އެވެ.

ގާނޫނީ ވަކީލު އަދި ކެންދޫ ދާއިރާގެ ކުރީގެ މެމްބަރު ހުށަހެޅުއްވި މައްސަލައިގެ ތެރެއަށް އެމްޑީޕީ އާއި ދަ ޑިމޮކްރަޓްސް ވެސް ތަދައްޚުލް ވުމަށް މިހާރު ވަނީ ނިންމާފައެވެ.

މައްސަލަ ހުށަހެޅީ އެ އިސްލާހް ތަކަކީ ގާނޫނުއަސާސީއާ ހިލާފު އަދި ގާނޫނުއަސާސީގެ އަސާސީ އޮނިގަނޑާ ވެސް ހިލާފަށް ކަމަށްވާތީ އެވެ.

ގާނޫނުއަސާސީ އަށް ވަރަށް ކުއްލި ގޮތަކަށް ސަރުކާރުން ހުށަހެޅި އިސްލާހްތައް މަޖިލީހުން ފާސް ކުރުމަށް ހޭދަ ކޮށްފައިވަނީ ގާތްގަނޑަށް ނުވަ ވަރަކަށް ގަޑީއިރުއެވެ.

ގިނަ ބައެއްގެ ފާޑުކިޔުން އަމާޒުވި ކުއްލި އިސްލާހް ތަކާ ބެހޭ ގޮތުން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް ބުދަ ދުވަހު ކުއްލި ގޮތަކަށް ގެނެވުނު އިޞްލާޙުގައި، "އެންޓި ޑިފެކްޝަން"އާ ގުޅޭގޮތުން އަލަށް ގާނޫނޫ އަސާސީގައި ކަނޑައަޅައިފައިވާ ނައްޞު ތަކަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 4 ވަނަ މާއްދާގައި ކަށަވަރުކޮށްދީފައިވާ "ރައްޔިތުންގެ ބާރު" ނުވަތަ "ރައްޔިތުންގެ ސިޔާދަތު" ގެއްލޭގޮތަށް ފަރުމާކުރެވިފައިވާ ނައްޞުތަކެއް ކަމަށް ރާއްޖޭގެ ކުރީގެ އުއްތަމަ ފަނޑިޔާރު ޑރ. އަބްދުﷲ ދީދީ ވަނީ ވިދާޅުވެފައެވެ.

އޭގެ އިތުރުން އޭނާ ވިދާޅުވީ، ދިވެހިރާއްޖޭގައި "އެންޓި ޑިފެކްޝަން" ގެ އުޞޫލުތަކެއް މިގެނެވުނު ދުސްތޫރީ އިޞްލާޙުގައި ބަޔާން ކުރެވިފައިވާ ގޮތަށް ކަނޑައެޅިގެން ދިއުމުން، ރައްޔިތުންގެ މަޖިލީހަކީ އެމަޖިލީހާ ޤާނޫނުއަސާސީން މަތިކޮށްފައިވާ އިޚްތިޞާޞްތައް ފުރިހަމަޔަށް އަދާކުރާ ބާރެއްގެ ގޮތުގައި އޮންނަ އޮތުން ނިމުމަކަށް އައިސް، އެ މަޖިލިސް"ޑިސްފަންކްޝަނަލް" ބާރަކަށް ބަދަލުވެގެން ދިއުމުގެ އިޙުތިމާލު ވަރަށް ވެސް ބޮޑު ކަމަށެވެ.

މަޖިލީހުގައި ގާނޫނު އަސާސީ އަށް އިސްލާހު ގެނައުމުގެ ބިލުގެ މަސައްކަތް އަވަސް އަރުވާލައިގެން ކުރިއަށް ގެންދިއުމާއި، އަދި އެހާމެ އަވަހަށް ރައީސް މުއިއްޒު އެ ބިލު ތަސްދީގު ކުރެއްވުން "ހަރުކަށި އިބާރާތުން ކުށްވެރިކުރާ ކަމަށް" ރާއްޖޭގައި މަސައްކަތް ކުރާ 11 މަދަނީ ޖަމްއިއްޔާ އަކުން ވަނީ ބުނެފައެވެ.

ގައުމީ ތަރައްގީގެ ސިޔާސަތުތަކާއި ޕްލޭންތައް އެކުލަވާލުވުމުގެ ބާރު، ހަމައެކަނި ރައީސުލްޖުމުހޫރިއްޔާ އަށް ލިބިދޭ ގޮތަށް ގާނޫނު އަސާސީ އަށް މާއްދާއެއް އިތުރުކޮށް، ގެނެވުނު އިސްލާހަކީ ވެސް ޖަމްޢިއްޔާތަކުން ނުހަނު ކަންބޮޑުވާ ކަމެއް ކަމަށް ވަނީ ބުނެފައެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ޕްލޭން އެކުލަވާލުމުގައި ކައުންސިލްތަކުގެ ދައުރު ލާޒިމް ކުރެވިފައިވަނީ، ލާމަރުކަޒީ އުސޫލުން ގިނަ ރައްޔިތުންގެ ބައިވެރިވުމާއި މަޝްވަރާއާއި އެކު ތަރައްގީގެ ކަންކަން ނިންމުމުގެ ނިޔަތުގައިކަން ފާހަގަ ކުރަމުން، ބަޔާނުގައި ބުނެފައިވަނީ "ރައީސުލްޖުމްހޫރިއްޔާ އަށް އެކަނި ގައުމީ ތަރައްގީގެ ސިޔާސަތުތަކާއި ޕްލޭންތައް އެކުލަވާލުމުގެ ފުރިހަމަ ބާރު ލިބިގެން ދިއުމަކީ ދިމިގްރާތީ އުސޫލުތަކުން ބާރުއަޅާ ބާރުތައް ވަކި ކުރުމުގެ އުސޫލުތަކާއި ބީރައްޓެހި އަދި ރާއްޖޭގެ ދިމިގްރާތީ ތަރައްގީ އަދި ދަތުރުގައި މުހިންމު ދައުރެއް އަދާކުރި ލާމަރުކަޒީ ނިޒާމެއް ބައްޓަން ކުރުމަށް އެކި ސަރުކާރުތަކުން ކުރެވިފައިވާ މުހިންމު މަސައްކަތްތަކާއި ދުރަށް ދިއުން،" ކަމަށެވެ.

ޖަމްއިއްޔާތަކުން ވަކިން ކަންބޮޑުވާ އިސްލާހެއްގެ ގޮތުގައި ރައްޔިތުންގެ މަޖިލީހުގެ މެންބަރަކު އިންތިހާބުވި ސިޔާސީ ޕާޓީން އިސްތިއުފާ ދީފިނަމަ ނުވަތަ ވަކިކޮށްފި ނަމަ އެ މެންބަރެއްގެ ގޮނޑި ގެއްލޭނެ ކަމަށް އޮތުމާއި، މިނިވަން މެންބަރަކު ސިޔާސީ ޕާޓީއަކާ ގުޅިއްޖެނަމަ އެ މެންބަރެއް ގޮނޑި ގެއްލޭނެ ކަމަށް ފާސްކުރުން ވަނީ ފާހަގަ ކޮށްފައެވެ.

ބުދަ ދުވަހު ރައްޔިތުންގެ މަޖިލީހަށް ހުށަހަޅާ، ބަހުސް ކޮށް، ބިލު ބަލައިގަނެ، ކޮމިޓީ މަސައްކަތް ނިންމާ، މުޅި މަޖިލީހަށް ހުށަހަޅާ، މަޖިލީހުން ފާސްކޮށް، އެއާއެކު ބުދަ ދުވަހު ރައީސް މުއިއްޒު ތަސްދީގު ކުރެއްވި، ދިވެހިރާއްޖޭގެ ޖުމްހޫރިއްޔާގެ ޤާނުނުއަސާސީއަށް 6 ވަނަ އިޞްލާޙު ގެނައުމުގެ ބިލުން ޤާނޫނުއަސާސީ އަށް ވަނީ މައިގަނޑު ފަސް ބަދަލެއް ގެނަސްފައެވެ.

ސަރުކާރުގެ ފަރާތުން ގާނޫނުއަސާސީ އަށް ގެނައި އިސްލާހްތައް ހުށަހެޅުއްވީ ހުޅުދޫ ދާއިރާގެ ޕީއެންސީގެ މެންބަރު މުހައްމަދު ޝާހިދު އެވެ.