އިމާރޖެންސީ ނަމްބަރަކަށް 911 ކަނޑައެޅީ އެނގޭ ދަންނަ ނަންނަބަރަކަށް ވުމާއި އެކު އެ ނަމްބަރު ފަސޭހައިން ޕްރޮމޯޓް ކުރެވޭނެތީކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
އިހުސާން އެފަދައިން ވިދާޅުވީ ބުރާސްފަތި ދުވަހު 911 ނަމްބަރު އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
މިނިސްޓަރ ވަނީ އެފަދަ ނަމްބަރެއްގެ މުހިންމުކަމަށް އަލިއަޅުވާލައްވާ ވާހަކަފުޅުދައްކަވާފައެވެ. މި ނަމްބަރު ތައާރަފްކުރުމާއި އެކު ކުއްލި ޙާލަތްތަކުގައި ހަރަކާތްތެރިވާ ހުރިހާ އިދާރާތަކަކަށް އެއް ނަންބަރަކުން ގުޅޭނެ އިންތިޒާމް ހަމަޖެހިގެންދާނެ ކަމަށް ވަޒީރު ވިދާޅުވިއެވެ، އެއާއި އެކުމައްސަލަތައް ހައްލުކުރުން އަވަސްވެ، ހިދުމަތްދިނުން ވެސް އަވަސްވެގެންދާނެކަމަށް އިހުސާން ވަނީ ފާހަގަކުރައްވާފައެވެ. އެ ޚިދުމަތް ފެށުމާއި އެކު އެއްފަހަރާ އެމްބިއުލާންސް، ފުލުހުން، އެމްއެންޑީއެފްގެ ފަޔަރ އެންޑް ރެސްކިއުގެ އިތުރުން ކޯސްޓްގާރޑްގެ ސަމާލުކަމަށް ކަންކަން ގެނެވޭނެ ކަމަށް ވަޒީރު ވިދާޅުވިއެވެ.
އިހުސާން ވިދާޅުވިގޮތުން މި ޚިދުމަތް ބަލަހައްޓާނީ ފުލުހުންގެ ޚިދުމަތުންނެވެ. އިހުސާން ވަނީ 911 އަށް ގުޅާ މަޢުލޫމާތު ހިއްސާކުރުމުން ދެންހުރި ހުރިހާ އިދާރާތަކަށްވެސް އެ މަޢުލޫމާތު ފޯރުކޮށްދެވޭނޭކަމަށް ވިދާޅުވެފައެވެ. މީގެ ކުރިން ކުއްލި ޙާލަތެއް ދިމާވުމުން ގުޅަންވީ ނަންބަރު ނޭނގުމުގެ މައްސަލަ ދިމާވާ ކަމަށާއި އެންމެ އެކަށީގެންވާ ޚިދުމަތް ފޯރުކޮށްދިނުމަށް ދަތިތަކާއި ދިމާވި ކަމަށް އިހުސާން ވިދާޅުވިއެވެ. އަދި އެއް ހާދިސާއަކާއި މެދު އެކި ވަގުތުގައި އިދާރާތަކަށް މައުލޫމާތު އެނގުމަކީ ވެސް ކުރިން ދިމާވާ މައްސަލަ އެއް ކަމަށް އިހުސާން ވަނީ ވިދާޅުވެފައެވެ.
ކުރިއަށް އޮތްތަނުގައި މި ޚިދުމަޔް އިތުރަށް ފުޅާކުރާނެ ކަމަށް އިހުސާން ވަނީ ވިދާޅުވެފައެވެ.
