"ސްކީލާން" ޑޮކިއުމަންޓްރީ މައްސަލައިގައި މޯލްޑިވްސް މީޑިއާ ކައުންސިލް (އެމްއެމްސީ) ހާޒިރުކުރި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ ސިއްރުކޮށްފިއެވެ.
މޯލްޑިވްސް މީޑިއާ ކައުންސިލް (އެމްއެމްސީ) މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށް ހާޒިރުކުރީ ހެނދުނު 11:30 ގައެވެ. މީޑިއާ ކައުންސިލް ހާޒިރުކޮށްފައިވަނީ ރައްޔިތުންގެ މަޖިލީހަށް ހުށަހަޅާފައިވާ މައްސަލަތަކާ ގުޅިގެންނެވެ. މީގެ ތެރޭގައި ރައީސް ޑރ. މުހައްމަދު މުއިއްޒުގެ ދޮން މަންމަ، ޖީ ސްކީލާން ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒު މައްޗަށް ކުރާ ތުހުމަތުތަކުގެ މައްޗަށް ބިނާކޮށް ހަދާފައިވާ ތަހުގީގީ އުފެއްދުން "ސްކީލާން" އަށް އެވޯޑް ލިބުނު މައްސަލަ ހިމެނެއެވެ.
މީޑިއާ ކައުންސިލް ހާޒިރުކުރި ކޮމިޓީ ސިއްރުކުރަން ހުށަހެޅީ ކޮލަމާފުށީ ދާއިރާގެ ޕީއެންސީގެ މެމްބަރު އިބްރާހިމް ދީދީއެވެ. އަދި އެ ހުށަހެޅުއްވުމަށް ތާއިދުކުރެއްވީ ފުވައްމުލަކު ދެކުނު ދާއިރާގެ ޕީއެންސީގެ މެމްބަރު އިބްރާހިމް ހުސައިންއެވެ.
ކޮމިޓީ ސިއްރުކުރަން ހުށަހެޅުއްވީ، ކޮމިޓީގައި މަސްލަހަތު ފުށުއަރާ މައްސަލަތަކެއް ހުރުމުންނެވެ. ކޮމިޓީ ސިއްރުކުރުމަށް މެންބަރުންގެ ވޯޓަށް އެހުމުން ކޮމިޓީގައި ތިއްބެވި މެންބަރުންގެ އިއްތިފާގުން ވަނީ ކޮމިޓީ ބައްދަލުވުން ސިއްރުކުރުމަށް ފާސްކޮށްފައެވެ.
"އަދަދު" ނޫހުގެ ތަހުގީގީ ޑޮކިއުމެންޓްރީ "ސްކީލާން" އަށް އެވޯޑް ލިބުނު މައްސަލައިގައި ސަރުކާރުން އަންގައިގެން އެންޓި ކޮރަޕްޝަން ކޮމިޝަން (އޭސީސީ) އިން ވެސް މީޑިއާ ކައުންސިލަށް ވަދެފައިވެއެވެ.
