ގައުމީ ތަރައްގީ ޕްލޭނަށް ރައްޔިތުންނާއި ޕާޓީތަކާއި ކައުންސިލްތަކުގެ މަޝްވަރާ ހޯއްދަވާނެކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އާބަން ސެންޓަރުތައް ކަނޑައެޅީ ކައުންސިލްތަކާއި މަޝްވަރާކުރުމެއް ނެތި ކަމަށް ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވެއްޖެއެވެ.
ދަ ޑިމޮކްރެޓްސްގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވީ މިދިޔަ އަހަރެއްހާ ދުވަހުގެ ތެރޭގައި ކަންބޮޑުވާ ކަންތައްތަކެއް ސަރުކާރުންކޮށްފައިވާ ކަމަށެވެ. އެގޮތުން ރައްޔިތުންނަށް ވިއްކި ސިޔާސަތު ނުވަތަ މެނިފެސްޓޯ އަދި ރައްޔިތުން ކައިރީގައިވި ވައުދުތައް ފުއްދަންޖެހޭނެ ކަމަށެވެ. އަދި ލާމަރުކަޒީ ނިޒާމުގެ ތެރެއިން ރައީސް ޑރ. މުހައްމަދު މުއިއްޒު މާލެ ސިޓީގެ މޭޔަރުކަމުގައި ހުންނަވައިގެން ލާމަރުކަޒީ ނިޒާމުގައި ހުރި ދަތިތަކާއި ގޮންޖެހުންތަކާއި ގުޅިގެން ލައްކަ ވާހަކަތައް ދެއްކެވި ކަމަށެވެ.
އަދި ވޯޓު ހޯއްދަވަން ވެވަޑައިގެންނެވި ވައުދުގެ ތެރެއިން އެންމެ ބޮޑު އެއް ވައުދަކީ ލާމަރުކަޒީ ނިޒާމުގެ ޗެމްޕިއަނަކަށް ވެވަޑައިގެންނަވާނެ ވައުދު ކަމަށާއި، ނަމަވެސް ވެރިކަމަށް ވަޑައިގެން އަހަރެއް ވެގެންދިޔަ އިރު ފެނިގެންދަނީ ބޮކްސިންގ ބޭގެއްގައި ތަޅާހެން ލާމަރުކަޒީ ނިޒާމުގައި ތަޅާ ޗެމްޕިއަނަކަށްވާން މަސައްކަތްކުރައްވާތަން ކަމަށް ވައްޑެ ވިދާޅުވިއެވެ.
ވައްޑެ ވިދާޅުވީ އާބަން ސެންޓަރު ހެދުމުގެ ނަމުގައި ރަށްތަކެއް އިއުލާންކުރުމުގެ އެއްދުވަސްކުރިން ގައުމީ ދުރު ރާސްތާގެ ޕްލޭނެއް އެކުލަވާލުމަށްޓަކައި ބޭއްވި ބައްދަލުވުމުގައި ވިދާޅުވެފައިވަނި ސިޔާސީ ޕާޓީތަކާއި ރައްޔިތުންގެ ހިޔާލާ މަޝްވަރާތައް ބޭނުންވާ ކަމަށެވެ. ނަމަވެސް އާބަން ސެންޓަރުތައް ކަނޑައެޅުމުގައި އެއްވެސް މަޝްވަރާއެއް ނުކުރާ ކަމަށެވެ.
އެއްވެސް މީހެއް ކައިރި އަހާލުމެއް ނެތި އާބަން ސެންޓަރުތަކެއްގެ ގޮތުގައި ވަކި ރަށްތަކެއް ކަނޑައަޅަން ނިންމެވީ. ދެވަނަ ކަމަކަށް އާބާދީ މަދު ރަށްރަށް ހުސްކުރައްވާ ވާހަކަ އެބަދައްކަވާ. މިއީ ވަރަށް ބިރުވެރި ވާހަކައެއް. ހުސްކުރާ ވާހަކަ މާނަކުރެވެނީ އަނިޔާވެރިކަމެއްގެ ގޮތުގައި. 21 ވަނަ ގަރުނުގައި އަތްނުލެވޭނެ ކަންތައްތަކެއް ހުންނާނެ. އެ ހައްގުތައް އެހެން މީހަކު ގަދަކަމުން އަރައިގަންނަ ނަމަ އެއީ ކަންބޮޑުވާކަމެއް. އައު ބަޖެޓުގައި ފެނެނީ ލަމަރުކަޒީ ގާނޫނާއި ހިލާފަށް ބަޖެޓް ތައްޔާރުކޮށްފައިވާތަން. ހަތަރުވަނަކަމަށް ލާމަރުކަޒީ ގާނޫނަށް ބަދަލު ގެންނަ ވާހަކަ. ގާނޫނަށް އިސްލާހު ގެންނަން ޖެހޭނީ ކުރިން އޮތްގޮތަށްވުރެ ރަނގަޅު ގޮތަށް އެކަންކުރުން. ފަސްވަނަ ކަމަކަށް ވަރަށް ބޮޑަށް ރޭވި އިންތިޒާމްވެގެން މަޖިލީހުގެ ނުފޫޒުގަދަ މެންބަރުން ބޭނުންކޮށްގެން، ކަތީބުންގެ ޒަމާން މާ ރަނގަޅުކަމަށް ދޭހަވާގޮތަށް ނެރޭޓިވް ކުރިއަށް ގެންދަވާ.ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ)
ނެޝަނަލް އެސެމްބްލީ މެންބަރު ޝުޖާއު އަލީ ވިދާޅުވީ އެއްއަހަރު ދުވަހުގެ ތެރޭގައި ފެނިގެންދަނީ ލާމަރުކަޒުކުރުމާއި އިދިކޮޅަށް ކަންކަންކުރަމުންދާތަން ކަމަށެވެ. އަދި ކައުންސިލްގެ ބައިވެރިވުން ނެތި ސަރުކާރުން ކަންކަން ނިންމަވަމުން ގެންދަވާ ކަމަށާއި، އާބަން ބިލަކީ ކައުންސިލްތަކާއި މަޝްވަރާކުރުމެއް ނެތި ކުރަމުން ގެންދާކަމެއް ކަމަށް ޝުޖާއު ވިދާޅުވިއެވެ.
މުޅި ސަރުކާރުގެ ތެރެއިން ފެންނަނީ ރޭވުންތެރިކަމާއެކު، ކައުންސިލްގެ ނިޒާމަކީ މުޅި ދައުލަތަށް އޮތް ބުރައެއް ތަކުލީފެއްކަމަށް ދައްކަވާތަން. ހާއްސަކޮށް ކައުންސިލް ބްލޮކްގްރާންޓް އެހީއަކީ ދައުލަތުގެ މާލީ ބުރައެއްކަމަށް ވިދާޅުވަނީ. ދައުލަތުން ދޭ ގްްރާންޓް ހަރަދުކުރެވެނީ ރަށެއްގައި ދިރިއުޅޭ ރައްޔިތުންގެ ހުރިހާ ހިދުމަތްތައް ބަލަހައްޓަން ދޭ އެހީއެއް. މަޖިލީހުގެ މެންބަރުންގެ ވާހަކައިން ފާހަގަކުރެވެނީ މިއީ ކައުންސިލް މެންބަރުންނަށްދޭ މުސާރަކަމަށް ދޭހަވާގޮތަށް. އެއީ މައުލޫމާތު ހޯދައިގެން ކުރާކަމެއް ނޫން.ނެޝަނަލް އެސެމްބްލީ މެންބަރު ޝުޖާއު އަލީ
ޝުޖާއު ވިދާޅުވީ ކައުންސިލްތަކަށް ކުރާ ހަރަދަކީ ބުރައެއްނަމަ، ރަށްރަށުގެ މަގުތައް ސާފުކުރުމުގެ މަސައްކަތްވެސް ހުއްޓާލަންޖެހޭ ކަމަށެވެ. މިސްކިތްތައް ދިއްލާ ސާފުކުރުން ހުއްޓާލުމާއި، ކައުންސިލް މުވައްޒަފުން ވަޒީފާއިން ކަނޑާ ގެއަށް ފޮނުވާލަންޖެހޭ ކަމަށެވެ. އަދި މި ކަންކަމަކީ މާލީ ބުރައެއްކަމަށް ދެކޭއިރު، ސަރުކާރުން ދައްކާ ވާހަކައާއި ހަގީގަތާއި ދިމާނުވާ ކަމަށް ވެސް ޝުޖާއު ވިދާޅުވިއެވެ.
