މިވަރުން ދަންޏާ ރައްޔިތުންގެ މަޖިލީހަށް ވެސް ރައީސް ރައީސް ޑރ.މުހައްމަދު މުއިއްޒުގެ މެމްބަރުން އައްޔަންކުރާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން ސަރުކާރުން ވަނީ މި ހަފްތާގައި މަޖިލީހަށް ހުށަހަޅާފައެވެ. އޭސީސީ އަދި އީސީގެ ރައީސާއި ނައިބު ރައީސް އެ ކޮމިޝަނުތަކުގެ މެންބަރުންގެ މެދުގައި ނަގާ ވޯޓަކުން އައްޔަން ކުރާ ގޮތައް އޮންނަ އޮތުން ބަދަލުކޮށް، ކޮމިޝަނުގެ ރައީސާއި ނައިބު ރައީސް އައްޔަން ކުރައްވާނީ އެ ކޮމިޝަނުގެ މެންބަރުންގެ ތެރެއިން ރައީސުލްޖުމްހޫރިއްޔާ ކަމަށް ސަރުކާރުން ހުށަހެޅި އިސްލާހުގައި ވަނީ ބުނެފައެވެ. އެކަމަށް އިޝާރާތްކުރައްވާ ރައީސް ޔާމީން ވަނީ އެކަން ކުރަނީ އޭސީސީ އާއި އީސީ ކޮންޓްރޯލްކުރަން ކަމަށް ސިފަކުރައްވާފައެވެ. އަދި ރަދުންގެ ޒަމާނުގައި މެމްބަރުން މަޖިލީހަށް އައްޔަންކުރި ފަދައިން މަޖިލީހަށް ވެސް ރައީސް އައްޔަންކުރައްވާ ބަޔަކު ލާން ރައީސް މަސައްކަތްކުރައްވާފާނެ ކަަމަށް އެ މަނިކުފާނު ވަނީ ވިދާޅުވެފައެވެ. ރައީސް ޔާމީން ވަނީ ރައީސް މުއިއްޒު އަށް ޑިމޮކްރަސީ ވެސް ނޭނގޭ ކަމަށް ވިދާޅުވެފައެވެ. އަދި މިއަދު މަޖިލީހުގެ މެމްބަރުންވެސް ސަރުކާރު ޖަވާބުދާރީކުރުވަން ނޫޅޭ ކަމަށް އެ މަނިކުފާނު ވަނީ ވިދާޅުވެފައެވެ.

ކުރީގެ ރައީސް ޔާމީން ވަނީ ސަޕްލިމެންޓްރީ ބަޖެޓެއް ހުށަހަޅާ އިރު ސަރުކާރުން ބަޖެޓް ހޭދަކުރި ގޮތް ނޭނގޭތީ އެކަމަށް ފާޑު ވިދާޅުވެފައެވެ. ސަޕްލިމެންޓްރީ ބަޖެޓް ހުށަހަޅާ އިރު މަދުވާ ފައިސާ ހޯދަން ޖެހޭ ސަަބަބު ވަރަށް ސާފުވާންޖެހޭ ކަމަށް އެ މަނިކުފާނު ވިދާޅުވިއެވެ. މަޖިލީހުގެ ކޮމިޓީ އަށް ވެސް އެކަން ހާމަކުރަން ދެކޮޅު ހެދުމުން، އެކަމާއި މެދު އެ މަނިކުފާނު ވަނީ ކަންބޮޑުވުން ފާޅުކުރައްވާފައެވެ.