ބިންވެރިޔާ ސްކީމްގެ ދަށުން ގުޅީފަޅުން ދޫކުރެވިފައިވާ ގޯތި ލިބިފައިވާ މީހުންގެ ގުރުއަތުލުން އަންނަ އަންގާރަ ދުވަހު ކުރިއަށްދާނެ ކަމަށް މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓުން ބުނެފިއެވެ.
ހައުސިން މިނިސްޓްރީން ބުނީ "ގުޅީފަޅުގެ ލޭންޑް ޔޫސް ޕްލޭން"ގެ ދަށުން އައިސްފައިވާ ބަދަލާގުޅިގެން، ކުރިން ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބިފައިވާ މީހުންގެ ގޯތީގެ ލޮކޭޝަނަށް ބަދަލު އައިސްފައިވާ ކަމަށެވެ.
މި ބަދަލާއި ގުޅިގެން ގޯތިތަކުގެ ވެރިފަރާތްތަކާއި މިހާތަނަށް ގުޅީފަޅުން ގޯތި ހަވާލުކޮށްފައިވާ މީހުންގެ އިތުރުން ގިރާވަރު ފަޅުން ލިބިފައިވާ ގޯތިތައް ގުޅީފަޅަށް ބަދަލު ކުރުމަށް އެދުނު މީހުންގެ މެދުގައި 4 ޖޫން 2024 ގައި ނެގުނު ގުރުއަތުން، ގުޅީފަޅަށް ގޯތި ބަދަލުވެފައިވާ މީހުންގެ މެދުގައި ގުރުނެގުން 29 އޮކްޓޫބަރު 2024 ވާ އަންގާރަ ދުވަހުގެ ދަރުބާރުގެ ރަންނަބަނޑޭރި މާލަމްގައި ބޭއްވުމަށް ނިންމާފައިވާ ކަމަށް މިނިސްޓްރީން ބުނެއެވެ.
ގުޅީފަޅުން ދޫކުރާ ގޯތީގެ އަދަދާއި ބޮޑުމިނުގެ ތަފްސީލް
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
މިނިސްޓްރީން ބުނީ އަންގާރަ ދުވަހުގެ ހެނދުނު 9:00 ގައި ގުރުނެގުން ފަށާއިރު، ގުޅީފަޅުގެ ބިން ލިބޭ މީހުންގެ ގުރުނެގުމުގެ ކަންކަން ކުރިއަށް ގެންދާނީ މިނިސްޓްރީން އެކުލަވާލާފައިވާ ލިސްޓުގައިވާ ތަރުތީބުން، އެކަމަށް ކަނޑައަޅާފައިވާ މިނސްޓްރީގެ މުވައްޒަފުން ކަމަށެވެ.
މީގެ އިތުރުން ހައުސިން މިނިސްޓްރީން ބުނީ ގުޅީފަޅުން ބިން ލިބޭ މީހުންގެ ގުރުނެގުމަށް ހަމަޖެހިފައިވާ މާލަމަށް ވަދޭވޭނެ އިންތިޒާމު ހަމަޖެހިފައިވާ ކަމަށެވެ. އަދި ބިން ލިބޭ މީހުންގެ ބަދަލުގައި އެހެން މީހަކު ހާޒިރުވާން ބޭނުންނަމަ، ބިން ލިބޭ މީހާގެ އިއުތިރާޒެއްނެތް ކަމުގެ ލިޔުމަކާ އައި.ޑީ.ކާޑްގެ ކޮޕީ އަކާއެކު ހާޒިރުވުމަށް ވަނީ އެދިފައެވެ.
ގޯތިލިބޭ މީހުންގެ ގުރުނަގާ ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ މީހުންނާއެކުވާ އެއްބަސްވުން ތަކާއިގުޅޭ މައުލޫމާތު ފަހުން ހިއްސާކުރާނެ ކަމަށް މިނިސްޓްރީން ބުނެފައިވެއެވެ.
ބިންވެރިޔާ ސްކީމްގެ ދަށުން ގުޅީފަޅުން ދޫކުރެވިފައިވާ ގޯތި ލިބިފައިވާ މީހުންގެ ގުރުއަތުލުން އަންނަ އަންގާރަ ދުވަހު ކުރިއަށްގެންދާނެ ކަމަށް ހައުސިން މިނިސްޓްރީން ބުނެފައިވާއިރު، ކުރީ ސަރުކާރުގައި ދޫކޮށްފައިވާ ގޯތިތަކާއި، ފްލެޓުތައް ދޫކުރުމުގައި މިސަރުކާރުން އިހުމާލުވަމުންދާ ކަމަށް ބުނެ ސިލްސިލާ މުޒާހަރާތަކެއް އާއްމު ރައްޔިތުން ދަނީ ކުރަމުންނެވެ. އަދި ފްލެޓު ލިސްޓް ވެސް މިމަހުގެ ތެރޭގައި ހާމަ ކުރާނެ ކަމަށް ސަރުކާރުން ބުނި ނަމަވެސް އިތުބާރެއްނެތް ކަމަށާއި، ފްލެޓު ލިސްޓް ވެސް ގަޑުބަޑު ކުރުމަށް މަސައްކަތް ކުރަމުންދާ ކަމަށް ބައެއް އާއްމުން ދަނީ ތުހުމަތު ކުރަމުންނެވެ.
