އިޒްރޭލު ޕާސްޕޯޓު މަނާ ކުރުމުގެ މަސައްކަތް ލަސްވެފައިވާކަމަށް ޤަބޫލު ނުކުރައްވާކަމަށް އިސްލާމިކް މިނިސްޓަރ ޑރ މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

ޝަހީމް އެހެން ވިދާޅުވީ ބުދަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޝަހީމް ވިދާޅުވީ، އެއީ މަޖިލީހުން ކުރާ މަސައްކަތަކަށްވާތީ މާ ގިނަ ވާހަކަތަކެއް އެކަމާ ނުދައްކަވާނެ ކަމަށެވެ. ނަމަވެސް އެ މައްސަލަ ލަސްވެފައިވާކަމަށް ޤަބޫލު ނުކުރައްވާކަމަށް ޝަހީމް ވިދާޅުވިއެވެ.

ޝަހީމް އެހެން ވިދާޅުވެފައިވާއިރު، އިޒްރޭލު ޕާސްޕޯޓު މަނާ ކުރުމުގެ ބިލު ކޮމިޓީގައި "ތާށިވެފައި އޮންނަތާ" 100 ދުވަސް ވަނީ ވެފައެވެ. އެގޮތުން އިޒްރޭލު މީހުން ރާއްޖެ އަށް އެތެރެވެވޭ ގޮތަށް އޮންނަ އޮތުން ބަދަލުކުރަން ގާނޫނު އިސްލާހު ކުރަން ސަރުކާރުން ނިންމައިފިކަން އިއުލާން ކުރީ 2 ޖޫން 2024 ގައެވެ.

އޭގެ ފަހުން އިޒްރޭލު ޕާސްޕޯޓު މަނާ ކުރުމުގެ ބިލު މަޖިލީހަށް ބަލައިގަނެ 241 ކޮމެޓީއަށް ފޮނުވީ ޖޫން 10 ވަނަ ދުވަހުއެވެ.  އޭގެ ފަހުން ސަރުކާރުން ބޭނުންވެގެން ބިލުތައް ފާސް ކުރުމަށް ދައުރުން ބޭރުގައި ޖަލްސާތައްވެސް ބޭއްވި ނަމަވެސް، ކޮމިޓީގައި ބިލުގެ މަސައްކަތް ކުރިއަށް ގެންގޮސްފައެއް ނުވެއެވެ.

ނުވިތާކަށް އިޒްރޭލުން ހިންގަމުންދާ ޤަތުލުއާންމުގައި ކޮންމެ ދުވަހަކުވެސް އެތައް ބަޔަކު ޝަހީދު ކުރަމުންދާއިރު، މިހާތަނަށް 40،000ށް ވުރެ ގިނަ މީހުން ވަނީ ޝަހީދު ކޮށްލާފައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.