ކުޅިވަރާއި ހަށި ހެޔޮކަމާ ބެހޭ ވުޒާރާގައި ތިބި ސިޔާސީ މުވައްޒަފުން ރަނގަޅަށް މަސައްކަތް ކުރާ ކަމަށް، ކުޅިވަރު ވަޒީރު ޢަބްދުﷲ ރާފިޢު (ރާއްޕެ) ވިދާޅުވެއްޖެ އެވެ.

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުގެ އެންމެ ބޮޑު އެއް ވައުދުފުޅަކީ ސިޔާސީ މުވައްޒަފުންގެ އަދަދު މަދު ކުރުމަށެވެ. އެގޮތުން އެމަނިކުފާނު ވިދާޅުވެފައި އޮތީ ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުވާނެ ކަމަށެވެ. ނަމަވެސް، ސަރުކާރުގައި ތިބި ސިޔާސީ މުވައްޒަފުންގެ އަދަދު އެއަށްވުރެ އިތުރު ކަމަށް އެކި އެކި މަސްދަރުތަކުން އެނގެން އޮވެ އެވެ.

ސަރުކާރުގެ ވުޒާރާ ތަކުގެ ތެރެއިން ސިޔާސީ މުވައްޒަފުން އެންމެ ގިނަ އެއް ވުޒާރާ އަކީ ކުޅިވަރު ވުޒާރާ އެވެ. މީގެ ކުރިން ކުޅިވަރު ވުޒާރާ އާއި ޒުވާނުންގެ ވުޒާރާ ހިންގަމުން އައީ އެއް ވުޒާރާއެއްގެ ގޮތުގަ އެވެ. ނަމަވެސް، ރައީސް މުޢިއްޒު ވަނީ ދެ ވުޒާރާ ވަކި ކުރަން ނިންމަވައި، ކުޅިވަރު ވުޒާރާ އަދި ޒުވާނުންގެ ވުޒާރާ އުފައްދަވައިފަ އެވެ.

މީގެ ތެރެއިން ކުޅިވަރު ވުޒާރާގައި ތިބި ސިޔާސީ މުވައްޒަފުންގެ އަދަދު ހުރީ 150 އިން މަތީގަ އެވެ. އެއީ ވަޒީރުގެ އިތުރުން، ކޮމިޝަނަރ އޮފް ސްޕޯޓްސް، ވަޒީރުގެ ޕާސަނަލް އެސިސްޓެންޓް، ތިން ސްޓޭޓް މިނިސްޓަރުން، 12 ނައިބު ވަޒީރުން، 38 ސީނިއާ ޕޮލިޓިކަލް ޑިރެކްޓަރުން، 25 ޕޮލިޓިކަލް ޑިރެކްޓަރުން، 12 އެސިސްޓެންޓް ޕޮލިޓިކަލް ޑިރެކްޓަރުން އަދި 98 ޔޫތު އެސޯސިއޭޓުންނެވެ.

އެކަމާ ގުޅޭ ގޮތުން ބުދަ ދުވަހު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި "ރާއްޖެ ޓީވީ" އިން ސުވާލު ކުރުމުން ކުޅިވަރު ވަޒީރު ރާފިއު ވިދާޅުވީ، ކުޅިވަރު ވުޒާރާ އަކީ ރާއްޖޭގެ ހުރިހާ ރަށެއްގައި ވެސް އެ ވުޒާރާގެ މުވައްޒަފުން ތިބޭ ވުޒާރާއެއް ކަމަށެވެ. ވަޒީރު ވިދާޅުވީ 187 ރަށް އޮތްއިރު، ގިނަ ރަށްރަށުގައި އެ ވުޒާރާގެ މުވައްޒަފުން ތިބޭނެ ކަމަށެވެ. އެހެންކަމުން މުވައްޒަފުން ވެސް ގިނަ ވާނެ ކަމަށާއި، ކުޅިވަރާ ގުޅުން ހުރި ކަންކަމުގައި އެ ވުޒާރާގެ މެންޑޭޓު ވެސް ވަރަށް ފުޅާ ވެފައިވާ ކަމަށް ވަޒީރު ވިދާޅުވި އެވެ.

ވުޒާރާގެ މެންޑޭޓް ފުޅާވެފައިވާއިރު، އެކަމަށްޓަކައި ކުރިއަށް ގެންދަން ޖެހޭ އިންޓާނަލް ތަމްރީނުތައް ކުރިއަށް ދާ ކަމަށް ވަޒީރު ވަނީ ވިދާޅުވެފަ އެވެ. އެ ތަމްރީނުތައް ކުރިއަށް ގެންގޮސް ނިންމާލެވުމާއެކު، އެ ބޭފުޅުންގެ ބޭނުން އެންމެ ފުރިހަމަ ގޮތުގައި ހިފޭނެ ކަމަށް ޤަބޫލު ކުރާ ކަމުގައި ވެސް ވަޒީރު ރާފިއު ވިދާޅުވި އެވެ. އެހެންކަމުން ސިޔާސީ މުވައްޒަފުންގެ ގޮތުގައި 190 މީހުން ތިބި ނަމަވެސް، ނުވަތަ 200 މީހުން ތިބި ނަމަވެސް، ވަޒީރު ދެކިލައްވާ ގޮތުގައި އެ މީހުންގެ ބޭނުން ވުޒާރާ އިން ދަނީ ކުރަމުންނެވެ. އެކަން ފާހަގަ ކުރައްވައި ވަޒީރު ވިދާޅުވީ ވުޒާރާ ގައި ތިއްބެވި ސިޔާސީ ބޭފުޅުން ވެސް އަދި ރަށް ރަށުގައި ތިއްބެވި ސިޔާސީ ބޭޅުންގެ ބޭނުން ވެސް އެންމެ ރަނގަޅު ގޮތުގައި ކުރެވެ އެވެ.

މީގެ އިތުރުން ކުޅިވަރު ވުޒާރާ އިން މައުލޫމާތު ދީފައިވާ ގޮތުގައި ރަށް ރަށުގައި ތިބޭ ސިޔާސީ މުވައްޒަފުންގެ އެންމެ ބޮޑު އެއް މަސައްކަތަކީ، އެ ވުޒާރާ އިން ރަށް ރަށުގައި ކުރިއަށް ގެންދާ ކުޅިވަރު މަޝްރޫއުތަކުގެ އެންމެ ފަހުގެ މައުލޫމާތާއި، މަސައްކަތް ކުރިއަށްދާ ގޮތް ވުޒާރާ އަށް ހިއްސާ ކުރުމެވެ. އަދި އެކަން އެގޮތުގައި ކުރުމުގެ މައިގަނޑު މަޤުސަދަކީ، ރަށު ކައުންސިލުތަކުން ކޮންމެ ފަހަރު ވުޒާރާ އަށް ގުޅައި، އެ މައުލޫމާތު ހޯދުމުގެ ބަދަލުގައި، އެކަން ކުރުމަށް ފަސޭހަ ނިޒާމެއް ޤާއިމު ކުރުން ކަމަށް ވެސް އެ ވުޒާރާ އިން ބުނެފައިވެ އެވެ.

ސިޔާސީ މުވައްޒަފުންގެ އަދަދު އިތުރުވެފައިވާއިރު، ރަށް ރަށުގައި ކުޅިވަރު ވުޒާރާގެ ސިޔާސީ މުވައްޒަފުން ތިބެ އެވެ. ރަށް ރަށުގައި ހުންނަ ޒުވާނުންގެ މަރުކަޒު އަދި ކުޅިވަރުގެ ތަންތަން ބެލެހެއްޓުމާއި، އެ ތަންތަނުގައި މަސައްކަތް ކުރުމަށް ސިޔާސީ މަޤާމުތަކަށް ބޭފުޅުން ޢައްޔަން ކުރައްވަ އެވެ. ނަމަވެސް، ޒުވާނުންގެ މަރުކަޒު ޤާއިމު ކޮށްފައި ނެތް ރަށް ރަށުގައި ވެސް، ޒުވާނުންގެ މަރުކަޒު ބެލެހެއްޓުމުގެ ނަމުގައި ވެސް ސިޔާސީ މުވައްޒަފުން އައްޔަންކޮށްފައިވެ އެވެ.