ރައީސް ޑރ.މުހައްމަދު މުއިއްޒު އަކީ ދިވެހި ރައްޔިތުންނަށް ބަލަދު އަރާ ބޭފުޅެއް ނޫން ކަމަށާއި ޤައުމު ހިންގަން ނޭނގޭ ނަމަ ރަނގަޅުވާނީ އެއްފަރާތަށް ޖެހިވަޑައިގަތުން ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން ވިދާޅުވެއްޖެއެވެ.
ބުރާސްފަތި ދުވަހުގެ ރޭ ބޭއްވި އެމްޑީޕީގެ ހަރުގެ ޖަލްސާގައި ރައީސް ޑރ.މުހައްމަދު މުއިއްޒުގެ ވެރިކަމަށް ފާޑު ވިދާޅުވެ އިކްރާމް ވަނީ ވާހަކަދައްކަވާފައެވެ. ރައީސް މުއިއްޒު ވެރިކަމަށް ވަޑައިގަތުމަށް ވީ ވައުދުތައް ވަރަށް ސާފުކޮށް އާއްމުންނަށް އެނގޭ ކަމަށާއި އޭގެ ތެރެއިން ފުރަތަމަ ކަމަކީ ވެރިކަމަށް ވަޑައިގެން ކުރީގެ ސަރުކާރަކުން ރައްޔިތުންނަށްޓަކާ ކޮށްދެއްވި އެއްވެސް ކަމެއް ބޮލާލާ ނުޖައްސާނެކަމަށް ވިދާޅުވެ ވެވަޑައިގެންނެވި ވައުދު ކަމަށް އިކްރާމް ވަނީ ވިދާޅުވެފައެވެ. އެހެންނަމަވެސް އެ ވައުދުތައް ބޮލާލާ ޖަހާ ރައްޔިތުންނަށް ނިކަމެތިކަން ދެމުންދާ ކަމަށް އިކްރާމް ވިދާޅުވިއެވެ. ހަމައެހެންމެ ފައިސާ ލިބެން އެބަ ހުރި ކަމަށާއި އިގްތިސާދު ނަގާ ކޮޅަށް ޖަހާނެކަމަށް ބުނެ ރައީސް މުއިއްޒު ދެއްކި ވާހަކަތަކުގެ ހަގީގަތަކީ ކޮބައިތޯ މިއަދު ސުވާލުކޮށްލަން ޖެހޭ ކަމަށް އިކްރާމް ވިދާޅުވިއެވެ. އަދި އިންޑިއާ އާއި އެކު ރާއްޖެ އިން ބާއްވަމުން އައި ޑިޕްލޮމެޓިކް ގުޅުމަށް ބުރޫ އަރާ ގޮތަށް ރައްޔިތުންނަށް ވަރަށް ބޮޑަށް ރައީސް މުއިއްޒު ވަނީ އޮޅުވާލައްވާފައި ކަމަށް އިކްރާމް ވިދާޅުވިއެވެ. މާލީ ޙާލަތު ގޯސްވަމުން ދާއިރު އެކަމުގެ ގެއްލުމާއި ކުރިމަތިލާން ޖެހެނީ ދިވެހި އާއްމު ރައްޔިތުން ކަމަށް އޭނާ ވަނީ ވިދާޅުވެފައެވެ. އަދި މިހާރު އާއްމުން ތިބީ ދިިރިއުޅުމުގެ އާއްމު ކަންކަން ކުރުމަށް ދަތިވެފައި ކަަމަށް އޭނާ ވަނީ ވިދާޅުވެފައެވެ. މި ސަރުކާރުން މިހާރު މިދާ މިސްރާބަށް ގައުމު ގެންދާ ކަމަށް ވާނަމަ ޤައުމު ހޯދާ ނުފެންނާނެ ކަމަށާއި އެއީ ރައްޔިތުން ހަގީގަތުގައި ވެސް ކަންބޮޑުވާން ޖެހޭ ކަމެއް ކަމަށް އޭނާ ވަނީ ވިދާޅުވެފައެވެ.
ރާއްޖެއިން ބޭރު ބަޔަކު ނާންނާނެ ގައުމާ ހަވާލުވާކަށް. މިއީ ޑިމޮކްރަސީ އެއް އަޅުގަނޑުމެން މި މައްސަލަ ހައްލުކުރަން ޖެހޭނީ. ދިވެހި ރައްޔިތުންގެ ޤައުމެއް މި ޤައުމަކީ. ވޯޓު ހޯދުމުގަ ކަނޑައެޅިގެން ވަނީ އޮޅުވާލާފަ. ވިދާޅުވެފަ އެބަހުއްޓޭ އަނެއްކާ އޭރު ވާހަކަ ދެއްކީ މަޤާމަށް އަންނަންށޭ. މި މަޤާމަކީ ރައްޔިތުންގެ މަޤާމެކޭ. ހައްލު ހޯދަން ރައްޔިތުން ބޭނުންވީ. މިއަދު އުންމީދެއް ފެނޭތޯ؟ ހައްލެއް ގެންނަން ވެރިއަކަށް ވަނީ. ދިވެހި ރައްޔިތުންގެ މައްޗަށް ބަލަދު އަރާ މީހެއް ނުހުންނާނެ. އެއީ ރައްޔިތުންގެ މަޤާމެއް. އެންމެ ރީތި ގޮތަކީ ނުކުރެވޭ ނަމަ ދުރަށް ވަޑައިގަތުން ނޫންތޯ؟ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް
އިކްރާމް ވަނީ ވެރިކަމުގައި ނެތް ނަމަ އާއްމުންގެ ފަރާތުން ފާޑުކިޔުން އަމާޒު ނުވާނެ ކަމަށް ވިދާޅުވެފައެވެ. މިއަދު ގައުމުގެ ހާލަތު އޮތް ގޮތުން ދެރަވާ ކަމަށް ވެސް އޭނާ ވިދާޅުވިއެވެ. ގައުމުގެ ހުރިހާ އާރަކާއި ބާރެއް މި ވަގުތު އޮތީ ރައީސް މުއިއްޒުގެ އަތްޕުޅުގައި ކަމަށް އިކްރާމް ވިދާޅުވިއެވެ. އެހެންކަމުން އެ މަނިކުފާނަށް ޤައުމު ނުހިންގެނީ ކަންކަން ކުރަން ނޭނގޭތީ ނޫންތޯ އިކްރާމް ސުވާލު އުފެއްދެވިއެވެ. އިކްރާމް ވަނީ ކުރިން ވެރިކަމަށް ވަޑައިގަންނަވަން ދެއްކެވި ވާހަކަ އާއި އެއްގޮތަށް ޢަމަލުކުރުމަށް ގޮވާލައްވާފައެވެ. އެކަން ނުކުރެވޭނަމަ އެންމެ ރީތި ގޮތަކީ މަޤާމުން އެކަހެރިވުން ކަމަށް އޭނާ ވަނީ ވިދާޅުވެފައެވެ.
އިކްރާމް އެފަދައިން ވިދާޅުވެފައި މި ވަނީ ވެރިމަށް އައުމަށް ސަރުކާރުން ދެއްކި ވާހަކަތައް ދިމާނުވާތީ އާއްމުން ވެސް ސަރުކާރަށް ފާޑުކިޔަމުންދާ ދަނޑިވަޅެއްގައެވެ. އެގޮތުން ތަރައްޤީގެ މަޝްރޫޢުތައް ހިނގަމުން ނުދިއުމާއި، ސިޔާސީ މަޤާމުތައް ގިނަ ވުން ފަދަ ސަބަބުތަކާއި ހުރެ އާއްމުން ދަނީ ސަރުކާރަށް ފާޑުކިޔަމުންނެވެ.
