ޓުވެންޓީ20 ކްރިކެޓް ވޯލްޑްކަޕް އަންނަ ބުރާސްފަތި ދުވަހު ފަށާނެ އެވެ. މިއީ އެއް ދުވަހުގެ 50 އޯވަރުގެ މެޗުތައް ދިގުކަމުން، ފޫއްސަކަށްވުމުން، ކުރުކޮށް ނިންމާލާން އިނގިރޭސިން ގެނައި ހިޔާލެކެވެ. އަދި މިއީ ކްރިކެޓްގެ އަރަމުން އަންނަ ޖީލުތަކަށް ހުނަރު ދައްކާލަން ހުޅުވާލި ފުރުސަތެކެވެ. ނަމަވެސް ކްރިކެޓްގެ ޒަމާންވީ ވާދައިގެ ތެރެއިން މުބާރާތުގެ ތަށި ކޮންމެ ގައުމަކަށް ވެސް ހޯދަން ވަނީ މަޖުބޫރުވެފަ އެވެ. މި މުބާރާތް ފުރަތަމަ ބޭއްވީ 2007 ވަނަ އަހަރު އެވެ.

ޓުވެންޓީ20 މުބާރާތް ކުޅެނީ 20 އޯވަރަށެވެ. މުބާރާތް ބާއްވަނީ ކޮންމެ ދެ އަހަރުން އެއް އަހަރު އެވެ. މި ފަހަރުގެ މުބާރާތަކީ މިހާތަނަށް އެންމެ ގިނަ ޓީމުތައް ބައިވެރިވާ މުބާރާތެވެ. ޖުމުލަ 20 ގައުމަކުން މުބާރާތުގައި ކުޅޭއިރު ގަދަ އަށްކަށްދާނީ ކޮންމެ ގްރޫޕަކުން ވެސް އެންމެ ގަދަ ދެ ގައުމެވެ. މިފަހަރުގެ މުބާރާތް ބާއްވަނީ އެމެރިކާ އާއި ވެސްޓް އިންޑީޒްގަ އެވެ. މި ދެ ގައުމު ގުޅިގެން ހުށަހެޅި ބިޑް އިންޓަނޭޝަނަލް ކްރިކްޓް ކައުންސިލުން ގަބޫލުކުރީ ކްރިކެޓްގެ އާއިލާގެ ތެރެއަށް އެމެރިކާގެ ބިޔަ އާބާދީ ވެއްދުމުގެ ބޭނުމުގަ އެވެ.

މުބާރާތުގެ ގްރޫޕް އޭގައި ހިމެނެނީ ކުރީގެ ދެ ޗެމްޕިއަނުން ކަމަށްވާ އިންޑިޔާ އާއި ޕާކިސްތާން އަދި އަޔަލޭންޑާއި ކެނެޑާގެ އިތުރުން އެމެރިކާ އެވެ. ގްރޫޕް ބީގައި ހިމެނެނީ އެންމެ ފަހުގެ ޗެމްޕިއަން އިނގިރޭސިވިލާތާއި ދުނިޔޭގެ ޗެމްޕިއަން އޮސްޓްރޭލިޔާ އާއި ނެމީބިއާ އަދި ސްކޮޓްލޭންޑާއި އޮމާނެވެ. ގްރޫޕް ސީގައި ހިމެނެނީ ވެސްޓް އިންޑީޒާއި އަފްގާނިސްތާނާއި ނިއުޒީލޭންޑް އަދި ޕަޕުއާ ނިއުގިނީ އާއި ޔޫގެންޑާ އެވެ. ގްރޫޕް ޑީގައި ހިމެނެނީ ސައުތު އެފްރިކާ އާއި ބަންގްލަދޭޝް އަދި ސްރީލަންކާ އާއި ނެދަލޭންޑްސްގެ އިތުރުން ނޭޕާލެވެ. ނިސްބަތުން އެންމެ ވާދަވެރިވާނެ ކަމަށް ބެލެވެނީ ގްރޫޕް ޑީ އާއި ސީ އެވެ. މުބާރާތުގެ ފައިނަލް ކުޅޭނީ ޖޫން 29 ވަނަ ދުވަހު ވެސްޓް އިންޑީޒްގެ ކެންސިންގްޓަން އޯވަލް ސްޓޭޑިއަމުގަ އެވެ.

މުބާރާތުގެ އެމްބެސެޑަރުންގެ ގޮތުގައި ހަމަޖައްސާފައިވަނީ އިންޑިޔާގެ ކުރީގެ ކުޅުންތެރިޔާ ޔުވަރާޖް ސިންގް އާއި ޖެމެއިކާގެ ކުރީގެ ކުޅުންތެރިޔާ ކްރިސް ގޭލް އާއި އޮލިމްޕިކް ޗެމްޕިއަން އަދި ބާރު ދުވުންތެރިޔާ އުސައިން ބޮލްޓެވެ. މުބާރާތުގެ ތަށި 15 ގައުމަކަށް ގެންގޮސް ކުރީގެ ކުޅުންތެރިންނާއި މުބާރާތުގެ އެމްބެސެޑަރުންނާއި ސަޕޯޓަރުންގެ ބައިވެރިވި ހާއްސަ އިވެންޓްތައް ބާއްވާފައިވެ އެވެ.

މި ފަހަރުގެ މުބާރާތް ކުޅޭނީ ވެސްޓް އިންޑީޒްގެ ހަ ދަނޑެއްގަ އާއި އެމެރިކާގެ ތިން ދަނޑެއްގަ އެވެ. އެމެރިކާގެ އެންމެ ބޮޑު ދަނޑަކީ ފްލޮރިޑާގެ ސެންޓްރަލް ބްރޮވާޑް ޕާކެވެ. މިތަނަށް 40000 މީހުނަނަށް ވަދެވޭނެ އެވެ. ކްރިކެޓަށް މަޝްހޫރު ވެސްޓް އިންޑީޒްގައި ކުޅޭ އެންމެ ބޮޑު ދަނޑަކީ 28000 މީހުންނަށް ވަދެވޭ ބާބަޑޯސް ކެންސިންގްޓަން އޯވަލް ސްޓޭޑިއަމެވެ. މުބާރާތުގައި ޖުމުލަ 55 މެޗު ކުޅޭނެ އެވެ.

މުބާރާތެއްގެ އެންމެ ހާއްސަ އެއް ކަމަކީ އިނާމުގެ ގޮތުގައި ލިބޭ އެއްޗެކެވެ. މި މުބާރާތުގެ  ޗެމްޕިއަން ޓީމަށް ކަނޑައަޅާފައިވަނީ ވާދައިގެ ތައްޓާއެކު 4 މިލިއަން އެމެރިކާ ޑޮލަރެވެ. ރަނަރަބް ޓީމަށް 2 މިލިއަން އެމެރިކާ ޑޮލަރެވެ.