ރާއްޖޭގައި ތިބި އިންޑިއާގެ ސިފައިން މާޗު މަހުގެ 15ގެ ކުރިން ބޭލުމަށް, ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެންފިއެވެ.
އާދިއްތަ ދުވަހު ކުރިއަށް ގެންދިޔަ ނޫސްވެރިންގެ ބައްދަލުވުމުގައި, ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވީ، އިންޑިއާ ސިފައިން ފޮނުވާލުމާ ގުޅޭގޮތުން 11 ބައްދަލުވުމެއް ކުރިއަށްގެންދެވިފައި ވާކަމަށެވެ.
ނާޒިމް ވިދާޅުވީ، މާޗުގެ 15ގެ ކުރިން އިންޑިއާ ސިފައިން ފޮނުވާލުމަށް ރައީސް ބޭނުންފުޅުވާ ކަމަށާއި، އެކަން ހުށަހަޅުއްވައި، އެކަމާ ގުޅޭގޮތުން މިހާރު މަޝްވަރާ ކުރެވެމުންދާކަމަށެވެ. އަދި އެކަމާ ގުޅޭ 12 ވަނަ ބައްދަލުވުން އާދިއްތަ ދުވަހުން ފެށިގެން ކުރިއަށްދާ ކަމަށް ނާޒިމް ވިދާޅުވިއެވެ.
އިންޑިއާ ސިފައިން ފޮނުވާލުމާ ގުޅޭގޮތުން މަޝްވަރާކުރުމަށް ދެ ގައުމުން ވަނީ މަތީ ފަންތީގެ ކޯ ގްރޫޕެއް އެކުލަވާލާފައެވެ.
އެކި އަސްކަރީ އެއްބަސްވުންތަކުގެ ދަށުން ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ރާއްޖޭގައި ތިބި ސިފައިންގެ އަދަދާ ގުޅޭގޮތުން އެންމެފަހުން ސަރުކާރުން ބުނެފައިވަނީ، ރާއްޖޭގައި އިންޑިއާގެ 88 ސިފައިން ތިބި ކަމަށެވެ.
