2024ގައި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ޓިކެޓްގައި މަޖިލީހަށް ވާދަކުރަން ބޭނުންވާ ފަރާތްތަކަށް އެ ފުރުސަތު މާދަމާ ހުޅުވާލަން ނިންމާފައިވާ ކަމަށް އެ ޕާޓީން ބުނެފިއެވެ.

އެމްޑީޕީން ބުނީ 2024ގައި ބާއްވަން ހަމަޖެހިފައިވާ މަޖިލިސް އިންތިޚާބުގައި ވާދަކުރަން ޝައުގުވެރިވާ ފަރާތްތައް ދެނެގަތުމަށް ހޮނިހިރު ދުވަހު ފުރުސަތު ހުޅުވާލާނެ ކަމަށެވެ. އެމްޑީޕީން ބުނީ މަޖިލީސް އިންތިޚާބުގެ ޕްރައިމަރީގައި ވާދަކުރަން އެދި ހުށަހެޅުމުގެ ފުރުސަތު މި މަހުގެ 25 ވަނަ ދުވަހާއި ހަމައަށް ހުޅުވާލާނެ ކަމަށެވެ. އަދި އެއަށް ފަހު ޕްރައިމަރީ ބާއްވަންޖެހޭ ތަންތަނުގައި ޕްރައިމަރީ ބޭއްވުމުގެ މަސައްކަތް ކުރިއަށް ދާނެ ކަމަށް ވެސް އެ ޕާޓީން ބުނެފައިވެއެވެ.

އެގޮތުން ޕްރައިމަރީ އޮންނާނީ އަންނަ ޖެނުއަރީ މަހުގެ 20 ނުވަތަ 27ގައި ދެ ބަޔަކަށް ބަހާލައިގެން ކަމަށް ވެސް އެ ޕާޓީން ބުނެފައިވެއެވެ. ޕްރައިމަރީގައި ބައިވެރިވުމުގެ ފުރުސަތު ލިބޭނީ ޑިސެމްބަރު މަހުގެ 25ގެ ނިޔަލަށް އެޕްލައިކުރާ ފަރާތްތަކަށް އެކަންޏެވެ.