ރައީސް ޑރ. މުހައްމަދު މުޢިއްޒު ސަރުކާރުގެ ކެބިނެޓަށް އައްޔަނުކުރެއްވި 22 ބޭފުޅުންގެ ވަޒީރުކަމުގެ ޝަރުތު ހަމަވާ ކަމަށާއި އެހެންކަމުން މަޖިލީހުގެ ތަޅުމުގައި ވަކިވަކިން އެ ބޭފުޅުންނަށް ރުހުން ދިނުމަށް ވޯޓަށް އެހުމަށް މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ފާސްކޮށްފި އެވެ.
އާދިއްތަ ދުވަހު ބޭއްވި މި ކޮމިޓީ ބައްދަލުވުމުގައި ވަޒީރުންގެ ޝަރުތުތައް ހަމަވުމުގައި ބެއްލެވީ ތިން ކަމަކަށެވެ. އެއީ ކުށުގެ ރިކޯޑު، ސާބިތު ދަރަނި އަދި އެހެން ގައުމެއްގެ ރައްޔިތުކަން އޮތްތޯ ބެލުމެވެ. އެ ތިން ކަމުގެ ތެރެއިން އެއްވެސް ކަމެއްގައި ވަޒީރުންގެ މައްސަލައެއް ނެތް ކަމަށް މެންބަރުން ކޮމިޓީގައި ނިންމެވިއެވެ.
އެގޮތުން އެ ކޮމިޓީން އެކަން ބަލަން ޖެހުނީ ހައުސިން މިނިސްޓަރުކަމަށް އައްޔަނުކުރެއްވި ޑރ. އަލީ ހައިދަރު އަދި ހަޔަރ އެޑިއުކޭޝަން މިނިސްޓަރު ޑރ. މަރިޔަމް މާރިޔާގެ އެހެން ގައުމެއްގެ ރައްޔިތުކަން އޮތްތޯ ބެލުމަށް މެންބަރުން އެދުމާ ގުޅިގެންނެވެ.
އެކަމާ ގުޅިގެން އެ ކޮމިޓީގެ މުގައްރިރުކަން ކުރައްވާ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވަނީ ރައީސް މުއިއްޒު ހުވާކުރެއްވުމުގެ ކުރިން އެ ދެ ބޭފުޅުން ވެސް ބޭރުގެ ރައްޔިތުކަން ދޫކުރައްވާފައިވާ ކަން ޔަގީން ކޮށްދެއްވާފަ އެވެ.
އެގޮތުން މިނިސްޓަރު ހައިދަރު މިދިޔަ މަހުގެ 15 ގައި އިނގިރޭސިވިލާތުގެ ރައްޔިތުކަން ދޫކުރައްވާފައިވާއިރު، މިނިސްޓަރު މާރިޔާ ނިއުޒީލެންޑުގެ ރައްޔިތުކަން ދޫކުރައްވާފައިވަނީ މިދިޔަ އޮކްޓޯބަރު މަހުގެ 31 ގައި އެވެ.
އެއާ އެކު އެ ވަޒީރުންނަށް ރުހުން ދިނުމަށް މަޖިލީހުގެ ތަޅުމަށް ހުށަހަޅާނެ ގޮތަކާ މެދު މަޝްވަރާ ކުރެވުނެވެ. އެ މަޝްވަރާގެ ތެރެއިން ރައީސް މުއިއްޒުގެ ވެރިކަން ނިސްބަތްވެވަޑައިގަންނަވާ ޕީޕީއެމް-ޕީއެންސީގެ ލީޑަރޝިޕްގައި ހިމެނިވަޑައިގަންނަވާ މަހިބަދޫ ދާއިރާގެ މެންބަރު އަޙްމަދު ތޯރިގު ހުށަހެޅުއްވީ އެ 22 ވަޒީރުންނަށް އެއް ފަހަރާ ރުހުން ދިނުމަށް ފާސް ކުރުމަށެވެ.
އެހެން ނަމަވެސް ވަޒީރުންނަށް ވަކިވަކިން ރުހުން ދިނުމަށް ތަޅުމަށް ހުށަހެޅުމަށް އެމްޑީޕީގެ ފަރާތުން އިހަވަންދޫ ދާއިރާގެ މެންބަރު މުހައްމަދު ޝިފާއު ކޮމިޓީ އަށް ހުށަހެޅުއްވުމާއެކު، މެންބަރު ތޯރިގުގެ ހުށަހެޅުން އަނބުރައި ގެންދެވިއެވެ.
މެންބަރު ޝިފާއުގެ ހުށަހެޅުން ކޮމިޓީން ފާސްކުރީ އެ ކޮމިޓީގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.
ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީން އެގޮތަށް ފާސްކޮށްފައިވާއިރު، އިދިކޮޅުގައި އޮތް މަޖިލީހުގެ މެޖޯރިޓީ ޕާޓީ އެމްޑީޕީގެ މެންބަރުން ގެންދަވަނީ ބައެއް ވަޒީރުންނަށް ރުހުން ނުދެއްވާނެ ކަމަށް ވިދާޅުވަމުންނެވެ. އޭގެ ތެރޭގައި ހައުސިން މިނިސްޓަރު އަލީ ހައިދަރު، ފަތުރުވެރިކަމާ ބެހޭ މިނިސްޓަރު އަދި ޕީއެންސީގެ ޗެއާޕާސަން އަދި ރައީސް މުއިއްޒުގެ ސްޕެޝަލް އެޑްވައިޒަރު އަބްދުއްރަހީމު އަބްދުﷲ (އަދުރޭ) ގެ ދަރިކަލުން އިބްރާހީމް ފައިސަލްގެ އިތުރުން، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުގެ ނަންފުޅު ވެސް ހިމެނެއެވެ. އެހެން ނަމަވެސް ސަރުކާރުން ބުނަމުން ދަނީ މަޖިލީހުން ހުރިހާ ވަޒީރުންނަށް ރުހުން ދޭނެކަމުގެ ފުރިހަމަ ޔަގީންކަން އެބައޮތް ކަމަށެވެ.
