ގާޒާ ވަށައިގެން އިޒްރޭލުން ހަމަލާތައް ދެމުންގެންދާއިރު، އިޒްރޭލަށް ލުބުނާނުގެ ޙަމާސް ޖަމާއަތުގެ ފައުޖީން ގެންދަނީ ބޯޑަރު ހުރަސްކޮށް ރޮކެޓު ހަމަލާތައް ފޮނުވަމުންނެވެ. ލުބުނާނަށްވީ ފަޅީގެ ބޯޑަރުގައި އިޒްރޭލުން ހަރުކޮށްފައިހުރި ފާރަވެރި ކެމެރާތަކަށް ހިޒްބުﷲއިން ހަމަލާދީ ގޮއްވާވެސް ލައިފިއެވެ. އަމިއްލަ ނަފްސުގެ ދިފާޢުގައި، ހަމާސްގެ ވަސް ފުހެލަންކަމަށްބުނެ، އިޒްރޭލުން ގާޒާއަށް ދެމުންގެންދާ ޙަމަލާތަކުގައި، ގާޒާގެ ޢާންމު ރައްޔިތުންގެ ތިންހާހަށްވުރެން ގިނަ މީހުން ޝަހީދުކޮށްފިއެވެ. 

ރިޕޯޓުތައް ބުނާގޮތުގައި އިޒްރޭލަށް ހަމާސް ޖަމާއަތުން ދިން ކުއްލި ޙަމަލާގައި، އިޒްރޭލުގެ 1500އަށްވުރެން ގިނަ މީހުންވަނީ މަރާލައި، 200 އެއްހައި އިޒްރޭލު ރައްޔިތު ރަހީނު ކޮށްފައެވެ. ދެފަރާތުން ބަދަލުކުރަމުން އަންނަ ޙަމަލާތަކުގައި، އިޒްރޭލުގެ ބައެއް ރައްޔިތުންނަށް ހާނީއްކަވަމުން ދާއިރު، އިޒްރޭލުން މެދުކެނޑުމެއްނެތި ގާޒާއަށް ދެމުން އަންނަ ޙަމަލާތަކުގައި،މިހާތަނަށް ތިންހާހަށްވުރެން ގިނަ ރައްޔިތުން ޝަހީދުވެ، ގާޒާގެ 500އަށްވުރެން ގިނަ ގެދޮރު ބިމާހަމަވެ،150،000ށްވުރެން ގިނަ ރައްޔިތުން މަގުމަތިވެ،  14 ހާހާ ގާތްކުރާހާ މީހުންނަށް އެކިވަރުގެ ޒަޚަމްތައް ލިބިފައެވެ. 

 އިޒްރޭލުން، ގާޒާގެ ހޮސްޕިޓަލްތަކަށް ޙަމަލާދީ، ގާޒާ ހިސޯރުކޮށް، ފެނާއި ކަރަންޓު ކަނޑާލުމުން، ގާޒާގެ ރައްޔިތުން، މި ވޭތުވެދިޔަ 10 ވަރަކަށް ދުވަހުގެ ތެރޭގައިވަނީ އިންސާނީ ކާރިސާއަކަށް ހުށަހެޅި ގޮތްހުސްވެ، ހަތަރު އުދަރެސް ފެނުޖެހިފައެވެ 

މި ޙާލަތަށް ގާޒާ ދިޔައިރު، އދ.ގެ ފަރާތުން ފޯރުކޮށްދޭ އިންސާނީ އެހީގެ ވެހިކަލްތައް، އަދިވެސްވަނީ ގާޒާއަށް ވަނުމުގެ ހުއްދައިގެ އިންތިޒާރީގައެވެ.ގާޒާގެ ހަމާސް ޖަމާއަތް ނެތިކޮށްލަން، އިޒްރޭލުން ގާޒާއަށްދޭ ޙަމަލާތަކުގައި،ހަމާސް ޖަމާއަތަށް މަދަދު ދިނުމުގައި ލުބުނާނުގެ ބޯޑަރުގެ އަނެއްފަޅީގައިތިބިބަޔަކީ، ލުބުނަނުގެ ހިޒްބުﷲ ޖަމާޢަތެވެ.

 މިހާތަނަށް ވޭތުވެދިޔަ ނުވަ ދުވަހުގެ ތެރޭގައި ހަމާސް ޖަމާއަތުން، ބޯޑަރު ހުރަސްކޮށް އިޒްރޭލަށް ފޮނުވަމުން ގެންދާ ރޮކެޓުތައް ވަނީ އިތުރެވެފައެވެ. މިދިޔަ ހޮނިހިރު ދުވަހު، ހިޒްބުﷲ އިން ބުނެފައިވާ ގޮތުގައި، އެ ޖަމާއަތް އޮތީ، ފަލަސްޠީނުގެ ހަމާސް ޖަމާއަތާ ދެކޮޅަށް، އިޒްރޭލުން ކުރާ ހަނގުރާމައިގައި ހަމާސްއަށް ވާގިވެރިވެ ދިނުމުގެ ގޮތުން، ހަނގުރާމައިގައި ބައިވެރިވާން، ފުރިހަމައަށް ތައްޔާރު ވެފައެވެ. އެހެން ކަމުން ރަނގަޅު ވަގުތުގައި، އެމީހުން ހަނގުރާމައިގެ ތެރެއަށް ވަންނާނެއެވެ.

"އަމަލީ ބައިވެރިވުމުގެ ވަގުތު ޖެހުމާއެކު، އަހަރެމެން، ހަނގުރާމައިގައި ޢަމަލީގޮތުން ބައިވެރިވާން މިތިބީ ތައްޔާރަށް. މި ތިބީ ރަނގަޅު ވަގުތައްބަލަބަލަ" ހިޒްބުﷲ ގެ ޑެޕިއުޓީ ޗީފް ގަސަމް ވިދާޅުވެފައިވެއެވެ.

ހިޒްބުﷲ ޖަމާޢަތާ ދެކޮޅަށް ހަނގުރާމައެއް ކުރުމަކީ، އިޒްރޭލުގެ ޝައުގުވެރިކަން މިވަގުތައް އޮތް ކަމެއް ނޫންކަންވަނީ ހާމަކޮށްފައެވެ. 2006 ވަނަ އަހަރު، ހިޒްބުﷲއާއި ދެކޮޅަށް އިޒްރޭލުންކުރި ހަނގުރާމަ އެއްމަސް ދުވަހަށް، ޙަމަލާތައް ދިގުލައި ދިޔައިރު، އެއްވެސް ފަރާތަކަށްވަނީ ކުރިއެރުމެއް ނުލިބިފައެވެ. އެހެން ނަމަވެސް، މި ވޭތުވެދިޔަ މުއްދަތުގެ ތެރޭގައި ހިޒްބުﷲވަނީ އަސްކަރީގޮތުން އިތުރު ގާބިލުކަންއަނެއްކައި ވެސްހޯދައި، އެމީހުންގެ ފައުޖު އެއްލައްކައަށް ބޮޑުކޮށްފައެވެ. ހިޒްބުﷲގެ ލީޑަރު ސައްޔިދު ޙަސަން ނަސްރުﷲ 2021ގައި ވަނީ، ރޮއިޓާސްއަށް މިކަން ކަށަވަރުވެސް ކޮށްދީފައެވެ. 

"ހިންދުސްތާންޓައިމްސް" ގެ މުރާސިލު، މަންދިނީ ޗިޓްރެ، 17 އޮކްޓޫބަރު 2023ގައި، އެ ނޫހުގެ އޮންލައިން އަދަދަށް "ހިޒްބުﷲ ޖަމާޢަތަކީ، ކިހިނެއް ކޮންގޮތަކުން އުފަންވި ޖަމާޢަތެއް؟" މިހެން، ސުވާލު އުފައްދަމުން، ލިޔެފައިވާ ފީޗާ ރިޕޯޓެއްގައި ބުނެފައިވާ ގޮތުގައި، ހިޒްބުﷲ ޖަމާޢަތަކީ އީރާނުގެ އުފެއްދުމެކެވެ.

އިރާނުގެ ރިވޮލިއުޝަނަރީގާޑުން ހިޒްބުﷲ ޖަމާޢަތް އުފެއްދީ 1982 ގައެވެ. އެއީ 1975 އާއި 1990 އާއި ދެމެދުގައި ލުބުނާނުގައި ހިނގަމުންދިޔަ ސިވިލް ވޯގެ ތެރެއިން، އިރާނުގެ މަދަދު ލިބިގެން ފެޅި ހަނގުރާމަމަތީ ކުރިއެކެވެ. 1979 އަކާއި ހަމައަށް އައިއިރު، މި ޖަމާޢަތް އަސްކަރީ ގާބިލްކަމުގެ ފިޔަފަޅައިގެން، ސަރަޙައްދަށް ފިރުކިގަތެވެ. މަގްސަދަކީ އިޒްރޭލާ ދެކޮޅަށް ޙަމަލާ ދިނުމެވެ. 1982ގެ ފަހުން، މި ޖަމާޢަތް ފެންނަމުންދިޔައީ، ލުބުނާނުގައި އޮތް ހަތިޔާރުއެޅި ބާރުގަދަ ޖަމާޢަތެއްގެ ގޮތުގައެވެ 

އިރާނުގެ މަދަދު ލިބިގެން މެދުއިރުމަތީގައި އުފެދިފައިވާ އަސްކަރީ ޖަމާޢަތްތަކަށް ހިޒްބުﷲއިން އެހީތެރިކަން ފޯރުކޮށްދެއެވެ. ސަޢުދީ އަރަބިޔާގެ މަސްދަރުތަކާ ޙަވާލާދީ، ހިޒްބުﷲގެ ޙަރަކާތްތަކާމެދު، ބުނެފައިވާ މީޑިއާގެ ބުނުންތަކުން، މި ގްރޫޕާމެދު ބުނަނީ، އޭގެ ތެރޭގައި އިރާގުގެ ތެރޭގައި ތިބި ހަތިޔާރުއެޅި މިފަދަ ޖަމާޢަތްތަކަށް ބޭނުންވާ ތަމްރީނު ޕްރޮގްރާމުތައް ވެސް، ހިޒްބުﷲ ޖަމާޢަތުން ހިންގާކަމަށެވެ.  އަދި ޔަމަނުގައި އިރާނުގެ އެހީ ލިބިގެން އުފެދިފައިވާ ހަތިޔާރުއެޅި ޖަމާއަތް "ހޫޠީން" ކުރާ ހަނގުރާމަތަކުގައި، ޙޫޠީންނާއި ގުޅިގެން، ހިޒްބުﷲ ، ބައިވެރިވެ، ހަނގުރާމަ ކުރާކަމަށް ތުހުމަތު ކުރެއެވެ. އެހެން ނަމަވެސް މިއީ ސާބިތުހިފޭ ހެކިތައްހުރި ވާހަކަތަކެއް ނޫނެވެ. އަދި މި ވާހަކަތައްވަނީ ހިޒްބުﷲ ޖަމާޢަތުންވެސް،ދޮގުކޮށްފައެވެ. 

އެމެރިކާވެސް ހިމެނޭގޮތުން، ޔޫރަޕުގެ ބައެއް ގައުމުތައްވަނީ ހިޒްބުﷲގެ ހަނގުރާމަވެރި ވިންގަކީ ޓެރަރިސްޓު ޖަމާޢަތެއް ކަމަށް ލޭބަލް ކޮށްފައެވެ. 1983ގައި ބޭރޫތުގައި ހުރި އެމެރިކާގެ މެރިން ހެޑްކުއާޓަރަށް، ޖާނުން ފިދާވެގެން ދިން ބޮމުގެ ޙަމަލާގެ ޒިންމާ އެމެރިކާއިންވަނީ އިޒްބުﷲއާއި މަތިކޮށްފައެވެ. 

މި ޙަމަލާގައި މެރިން ހެޑްކުއާޓަރުގެ 241 ސާވިސްމަނުންވަނީ، މަރުވެފައެވެ. މި ޙަމަލާއަށްފަހު، ހިޒްބުﷲގެ މިލިޓަރީ ވިންގަކީ ޓެރަރިސްޓު ޖަމާޢަތެއް ކަމަށް، ލޭބަލް ކުރިނަމަވެސް، ހިޒްބުﷲގެ ސިޔާސީ ވިންގު، މި ލިސްޓަކު ނުހިމަނައެވެ. އެހެން ކަމުން ހިޒްބުﷲގެ ސިޔާސީ ވިންގަކީ، ދުނިޔެ ބަލައިގެންފައިވާ ގޮތްޕެކެވެ. 

މަންދަނީ ޗިޓްރެ، ހިންދުސްތާން ޓައިމްސްގައި، މި އޮކްޓޫބަރު 17ގައި ލިޔެފައިވާ ފީޗާ އާޓިކަލްގައި ހާމަކޮށްފައިވާ ގޮތުގައި، ހިޒްބުﷲ ޖަމާޢަތަށް އިރާނުން ހަތިޔާރާއި، މާލީ ގާބިލްކަން ވެސް ފޯރުކޮށްދެއެވެ. އެމެރިކާ މަސްދަރުގެ ގޮތުގައި ޙަވާލާދީ، މި ރިޕޯޓުގައި ބުނެފައިވަނީ، އިރާނުން މި ޖަމާޢަތަށް ސަތޭކައެތަކެއް މިލިއަން ޑޮލަރު، ކޮންމެ އަހަރަކުހެން،ހޭދަކުރެއެވެ. އެހެން ނަމަވެސް މި ތުހުމަތުތަކާމެދު، ހިޒްބުﷲ އިން، ބަހެއް ބުނެފައި ނުވާތީ، މިއީ ޙަގީގަތެއް އޮތް ތުހުމަތެއްކަން ޔަޤީނެއް ނޫނެވެ. 

ޔަޤީންވާ ކަމަކީ، މެދުއިރުމަތީގައި، ފަލަސްޠީނުގެ ރައްޔިތުންގެ ޙައްގުތައް ނިއުޅައިގެންފައިވާ އިޒްރޭލުން ހިންގަމުން ގެންދާ ލާއިންސާނީ ޢަމަލުތަކާ، ހިޒްބުﷲ އިން އަބަދުވެސް ދެކޮޅުހަދާކަމެވެ. ފަލަސްޠީނުގެ ރައްޔިތުންގެ ޙައްގުގައި ހިޒްބުﷲއިން، ހަތިޔާރުހިފާ ކަމެވެ. އިޒްރޭލާ ދެކޮޅަށް ހިޒްބުﷲއިން ދޭ ޙަމަލާތަކަކީ ވެސް، ފަލަސްޠީނުގެ ރައްޔިތުންނާ ދެކޮޅަށް އިޒްރޭލުންދޭ އިންސާނިއްޔަތާ ޚިލާފު ޙަމަލާތަކުގެ ރައްދު ކަމެވެ. ހިޒްބުﷲއިން، ބުނަމުން ގެންދަނީ ވެސް، ގާޒާއަށް އިޒްރޭލުންދޭ ހަމަލާތަކަށް ބަލަން ނުތިބޭނެ ކަމަށާއި، ރަނގަޅު ވަގުތު އައުމާއެކު، މި ހަނގުރާމައިގެ ތެރެއަށް އެ ޖަމާޢަތްވަދެ، ގާޒާގެ ހަމާސް ޖަމާޢަތަށް ވާގިވެރިވެދޭނެ ކަމަށެވެ.