ސިނަމާލެ ބްރިޖްގައި ވެހިކަލް ބާރަށް ދުއްވާ އަދި ލޭނު ބަދަލުކުރާ މީހުންނަށް އަންނަ އާދިއްތަ ދުވަހުން ފެށިގެން ނަސޭހަތުގެ މެސެޖެއް ފޮނުވާނެ ކަމަށް ފުލުހުން ބުނެފިއެވެ.
ފުލުހުން ބުނީ މަގުމަތީގައި ސަލާމަތާއި ރައްކާތެރިކަން ކަށަވަރުކުރުމަށް ކުރާ މަސައްކަތުގެ ތެރެއިން ސިނަމާލެ ބްރިޖުގައި ދުއްވަން ހުއްދަކުރެވިފައިވާ ސްޕީޑަށްވުރެ ބާރަށް ދުއްވާ އުޅަނދުތަކާއި ގަވާއިދާ ހިލާފަށް ލޭން ބަދަލުކުރާ އުޅަނދުތައް ދެނެގަނެ، އަދި އުޅަނދެއް ދުއްވި ބާރުމިން އެނގޭގޮތަށް އެއުޅަނދެއް ރަޖިސްޓްރީ ކޮށްފައިވާ ފަރާތުގެ ފޯނަށް 15 އޯކްޓޫބަރު 2023 ވަނަ ދުވަހުން ފެށިގެން ނަސޭހަތުގެ މެސެޖެއް ފޮނުވާނެ ކަމަށެވެ.
ފުލުހުން ބުނީ އުޅަނދު ދުއްވި ބާރުމިން އަދި ލޭން ބަދަލުކުރިކަން ދެނެގަންނާނީ ސިނަމާލެ ބްރިޖުގައި ހަރުކޮށްފައިވާ ސްޕީޑް ބަލާ ކެމޭރާތައް މެދުވެރިކޮށް ކަމަށެވެ. މަގުމަތީގެ ސަލާމަތާއި ރައްކާތެރިކަމަށް ހެދިފައިވާ ގަވާއިދުތަކުގައި ކަނޑައަޅާފައިވާ ސްޕީޑަށްވުރެ ބާރަށް އުޅަނދު ނުދުއްވުމަށް ވެސް ފުލުހުން ވަނީ އިލްތިމާސްކޮށްފައެވެ.
ސިނަމާލެ ބްރިޖު އަދި ހައިވޭގައި ނުރައްކާތެރި އެކްސިޑެންޓްތައް ހިނގުން ވަރަށް ގިނަ އެވެ. އެގޮތުން މިމަހުގެ ތެރޭގައި ވެސް ނުރައްކާތެރި އެކްސިޑެންޓްތައް ހިނގައި މީހުންނަށް އަނިޔާވެފައިވެއެވެ.
