ވެރިކަން ބަދަލުވާ މަރުހަލާއަށް ވަގުތު ދެއްވުމަށް އިންތިހާބީ ރައީސް އަދި މާލެ ސިޓީގެ މޭޔަރު ޑރ. މުހައްމަދު މުއިއްޒުގެ މަސްއޫލިއްޔަތުތައް ޑެޕިއުޓީ މޭޔަރު އަހުމަދު ނަރީޝާއި ހަވާލުކުރައްވައިފިއެވެ.
މިކަން ހާމަކުރައްވާފައިވަނީ ބުދަ ދުވަހު ބޭއްވި މާލޭ ސިޓީ ކައުންސިލްގެ 4 ވަނަ ދައުރުގެ 119 ވަނަ ރަސްމީ އާއްމު ޖަލްސާގައެވެ. މި ޖަލްސާގައި ވާހަކަފުޅުދައްކަވަމުން މުއިއްޒު ވިދާޅުވީ ވޭތުވެދިޔަ ދުވަސްތަކުގައި ކައުންސިލަށް ހޮވި މިއަދާހަމައަށް ދެއްވި އެއްބާރުލެއްވުމަށް، އަދި ބުރަ މަސައްކަތަށް ޝުކުރު ދަންނަވާ ކަމަށެވެ. މުއިއްޒު ވިދާޅުވީ މާލޭގެ ކަންތައްތައް ރައްޔިތުން އެދޭގޮތަށް ކުރިއަށް ގެންދިއުމަށް ކައުންސިލުން ފުރިހަމަ އެއްބާރުލުން ދެއްވި ކަމަށެވެ.
މުއިއްޒު ވިދާޅުވީ 17 ނޮވެމްބަރާއި ހަމައަށް ގާނޫނީ ގޮތުން މޭޔަރުކަމުގެ މަގާމުގައި ހުންނަވާނެ ކަމަށާއި، އެހެންނަމަވެސް ގާނޫނީ ބޭފުޅުންނާއި، ލޯކަލް ގަވަރމަންޓް އޮތޯރިޓީ މެދުވެރިކޮށް ބެއްލެވި އިރުގައި، ޒިންމާތައް ޑެޕިއުޓީ މޭޔަރާއި ހަވާލުކުރެއްވޭނެ ކަމަށެވެ. އަދި އެއީ އެންމެ އިންސާފުވެރި ގޮތް ކަމަށާއި، ވެރިކަން ބަދަލުވުމުގެ މަރުހަލާގެ މަސައްކަތަށް ވަގުތު ދެއްވަން ބޭނުންފުޅުވާ ކަމަށެވެ.
އެގޮތަށް ހައްދަވަނީ 17 ނޮވެމްބަރުގައި ރައީސްކަމުގެ މަސައްކަތް ފައްޓަވާއިރު ފުރިހަމައަށް ތައްޔާރުނުވެވިދާނެ ކަމުންނާއި، ބޭނުންފުޅުވަނީ ވެރިކަން ބަދަލުވުމުގެ މަރުހަލާއަށް އެއްކޮށް ވަގުތު ދެއްވުމަށް ކަމަށެވެ.
މުއިއްޒު ވިދާޅުވީ ޓްރާންސިޝަން ހިނގާގޮތާއި، ކޮމިޓީތައް ހިނގާގޮތް އަދި ޑިރެކްޓަރ ޖެނެރަލް ކުރައްވާ މަސައްކަތަށް އެހީތެރިކަންދެއްވާ، މުޅި މަސައްކަތް ހުރިހާ ތަނަކުން ހޯދާ މައުލޫމާތު އެއްކޮށް އެނަލައިޒްކޮށް ޕްލޭން ހައްދަވަން ބޭނުންފުޅުވާ ކަމަށެވެ. އަދި މެނިފެސްޓޯ އޮތް ނަމަވެސް މެނިފެސްޓޯގެ ޑީޓެއިލް ލެވެލްގެ ޕްލޭނެއް ހަދައިގެން ކުރިއަށް ގެންދިއުމަށް ގަސްދުކުރައްވާތީ އެކަމަށް ފުލް ޓައިމްދެއްވަން ބޭނުންފުޅުވާ ކަމަށެވެ.
އެހެންކަމުން ކައުންސިލްގެ ޑޭ-ޓު-ޑޭގެ ޒިންމާތަކަށް ވަގުތު ނުދެވޭނެތީ. މާލޭގެ ރައްޔިތުންނަށް އެންގެ ހައްގުގޮތެއް ނޫން އެކަމަށް ވަގުތު ނުދެވޭކަމުގައިވާނަމަ. އެހެންވީމާ ޑެޕިއުޓީ މޭޔަރަށް ޒިންމާތައް ހަވާލުކޮށް ކުރިއަށް ގެންދިއުމަށް ފުރުސަތު ދީފައި، ޗުއްޓީ ދެން ނެގެން އޮތް ގާނޫނީ ގޮތުން މިވަގުތަށް ހާއްސަ ހާލަތުގެ ގޮތުން އެލްޖީއޭގެ ލީގަލް ޓީމުން ލަފާދެއްވީ ހާއްސަ ހާލަތެއްގެ ގޮތުގައި އެ މަސައްކަތް ކުރުމަށް ޗުއްޓީއަށް ދެވިދާނެކަމަށް އެއީ ރަސްމީ މަސައްކަތަކަށް ވާތީމާލެ ސިޓީގެ މޭޔަރު ޑރ. މުހައްމަދު މުއިއްޒު
މުއިއްޒު ވިދާޅުވީ ޓްރާންސިޝަންގެ މަސައްކަތުގައި ފުލްޓައިމްކޮށް މަސައްކަތް ކުރެވޭ ގޮތަށް، ކައުންސިލްގެ މަސައްކަތް ކައުންސިލްގެ 4 ވަނަ ދައުރުގެ 119 ވަނަ ރަސްމީ އާއްމު ޖަލްސާއަށްފަހު ޑެޕިއުޓީ މޭޔަރަށް ހަވާލުކުރައްވެމަށް ގަސްދުކުރައްވާ ކަމަށެވެ.
މާލޭގެ މޭޔަރުގެ މަގާމާ މުއިއްޒު ހަވާލުވެވަޑައިގެންނެވީ 17 މެއި 2021 ގައެވެ.
17 ނޮވެމްބަރުގައި މޭޔަރު މުއިއްޒު ރައީސުލްޖުމްހޫރިއްޔާ ކަމުގެ މަގާމާއި ހަވާލުވެވަޑައިގެން ހުވާކުރައްވާ ހިސާބުން މޭޔަރުކަމުގެ މަގާމު ހުސްވެ، އެ މަގާމުގެ ބައި އިލެކްޝަން ބާއްވަން ޖެހޭނެއެވެ. ލާމަރުކަޒީ ގާނޫނުގައިވާ ގޮތުގައި، މޭޔަރުގެ މަގާމު ހުސްވުމުން އެލްޖީއޭ އިން އެކަން އިލެކްޝަންސް ކޮމިޝަނަށް އަންގާތާ 60 ދުވަހުގެ ތެރޭގައި އައު މޭޔަރަކު ހޮވުމަށް ބައި-އިލެކްޝަނެއް ބާއްވަން ޖެހޭނެއެވެ.
