ބިންވެރިޔާ ސްކީމުގެ ދަށުން މާލޭ ސަރަޙައްދުން ގޯތިލިބޭ މީހުންނަށް އޯގަސްޓު މަަހުގެ 15 ވަނަ ދުވަހުން ފެށިގެން ގޯތިތައް ޙަވާލު ކުރަން ފަށާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.

ކުޑަފަރީގައި ބޭއްވި ބަނދަރު ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ، ރައްޔިތުންނަށް ބޭނުންޖެހިފައިވާ އެންމެ މުހިއްމު އެއް ކަމަކީ ބޯހިޔާވަހިކަމުގެ ދަތިކަން ޙައްލުކުރުން ކަމަށެވެ.

ސަރުކާރުން ގޯއްޗާއި ފްލެޓު އަޅަމުންދަނީ އެކަމަށް އެކަށީގެންވާ ދިރާސާތައް ހެދުމަށްފަހުކަމަށް ރައީސް ވިދާޅުވިއެވެ.

ރައީސް ވިދާޅުވީ، މާލެއިން ދޫކުރަން ނިންމި ގޯތި ދިނުމުގެ މަސައްކަތް އޮތީ އެންމެ ފަހުގެ މަރުޙަލާގައިކަން ފާހަގަ ކުރައްވައި ރައީސް ވިދާޅުވީ، ސަރުކާރުގެ ވިސްނުމަކީ މިހިނގާ އޯގަސްޓު މަަހުގެ 15 ވަނަ ދުވަހުން ފެށިގެން ގޯތިތައް ޙަވާލު ކުރަން ފެށުން ކަމަށެވެ.

ޕްލޭނިންގ މިނިސްޓްރީން މިހާރު ގެންދަނީ ގޯތި ލިބޭ މީހުންގެ ދާއިމީ ލިސްޓް ނެރުމަށް ތައްޔާރުވަމުންނެވެ. އެގޮތުން މިހާރު ކުރިއަށްދަނީ ބިންތަކުގެ މިން ކަނޑައެޅުމާއި، ބިން ދޭނެ ސަރަޙައްދުތައް ކަނޑައެޅުމުގެ މަސައްކަތްކަމަށާއި، ލިސްޓު ނެރުމަށްފަހު އެމީހަކަށް ގޯތި ލިބޭނީ ކޮން ތާކުންތޯ ކަނޑައަޅަންގުރުއަތުނެގުން އޮންނާނެކަމަށް މިނިސްޓްރީން ބުނެއެވެ.

"ބިންވެރިޔާ" މަޝްރޫޢުގެ ދަށުން ގޯތި ލިބޭ މީހުންގެ ލިސްޓު އާއްމުކޮށްފައިވަނީ ޖޫން މަހުގެ 26 ވަނަ ދުވަހުއެވެ. ވަގުތީ ލިސްޓަށް ޝަކުވާ ހުށަހެޅުމުގެ މުއްދަތު ހަމަވިއިރު، 800 ޝަކުވާ ހުށަހަޅާފައިވާ ކަމަށް ޕްލޭނިންގ މިނިސްޓްރީން ވަނީ ބުނެފައެވެ.