ޖޫން މަހުގެ 15 ވަނަ ދުވަހު އާދައިގެ މަތިން މުހައްމަދު ނަދީމް ތައްޔާރުވީ އޮފީހަށް ދިޔުމަށެވެ. ގޭގެ ތިރީގައި މަޑުކޮށްލައިގެން ހުއްޓާ އައީ ފޯން ކޯލެކެވެ. ގުޅީ ހުޅުމާލެ ހޮސްޕިޓަލުންނެވެ. ދަރިފުޅު އެކްސިޑެންޓް ވެގެން އުޅޭ ކަމަށް ބުންޏެވެ. އަދި ވަރަށް އަވަހަށް ހޮސްޕިޓަލަށް އައުމަށް އެދުނެވެ. އޭރު ވެސް ދަރިފުޅު ކުރިމަތިލާން ޖެހުނީ ކިހާވަރެއްގެ ނުރައްކާތެރި އެކްސިޑެންޓަކާ ކަމެއް ނަދީމަކަށް އިހުސާސެއް ނުކުރެވެއެވެ.

ނަދީމް ހޮސްޕިޓަލަށް ދިޔައިރު އޭނާގެ 19 އަހަރުގެ ދަރިފުޅު އަހްމަދު ނޫރު ނަދީމް އޮތީ ލެއިން ތަތްތެޅިފައެވެ. ދަރިފުޅުގެ ހެޔެއް ނެތެވެ. ގައިގެ އެކި ތަންތަނަށް ހުރީ ބިއްލޫރި ހެރިފައެވެ. އަތާ ފަޔާ އަރިކައްޓާއި މޫނަށް ވެސް ބިއްލޫރި އެތިކޮޅުތައް ހެރިފައި ހުއްޓެވެ.

ނުރޫގެ ފައިގެ ފަލަމަސްގަނޑުގެ ކަށިގަނޑު ބިންދައިގެންގޮސް އޮތީ ބޭރަށް ނިކުމެފައެވެ. ދަތް ދޮޅީގެ ދެފަރާތުން ބިންދައިގެން ގޮސް ދަތްދޮޅި ވެސް އޮތީ އެލިފައެވެ. ލޮލަށް ވެސް ހުރީ ލޭ އަރާފައެވެ. ފުއްޕާމޭ ޖެހުނު ގޮތަކުން ފިތި، ފުއްޕާމެއަށް ވެސް ވަނީ ގެއްލުން ލިބިފައެވެ. ކަނދުރާގެ ޑިސްކްގައި ހުރީ ރެނދެއްލާފައެވެ. މިއީ ހައްތަހާވެސް އެކްސިޑެންޓުގައި ދަރިފުޅަށް ލިބުނު އަނިޔާތަކެވެ. ޑޮކްޓަރުން ހިއްސާކުރި މައުލޫމާތެވެ.

ހުޅުމާލެ ދެވަނަ ފިޔަވަހީގެ ގުލްހަޒާރުމާ ހިންގުމާއި ދުނބުރިގަސް މަގު ގުޅުނު ކަންމަތިން މި އެކްސިޑެންޓް ހިނގީ އެމްޓީސީސީގެ ބަހަކާ ސައިލެއް ޖެހި ޖޫން 15 ވަނަ ދުވަހުގެ ހެނދުނު 8:51 އެހާއިރުއެވެ. ސައިކަލު ދުއްވަން އިނީ ނޫރެވެ. އޭނާ ގެއިން ދިޔައީ ސައިކަލުގެ ލޯގަނޑު ދޫވެފައި ހުރުމުން އެ ރަނގަޅުކުރުމަށެވެ. އެހެންނަމަވެސް އެ ދަތުރުވެގެންދިޔައީ ނޫރަށް ވޭންދެނިވި ދަތުރަކަށެވެ. ހުޅުމާލެ ހޮސްޕިޓަލުން ނޫރަށް އިމަރޖެންސީގައި ފަރުވާދިނުމަށްފަހު އައިޖީއެމްއެޗަށް ބަދަލުކުރިއެވެ. އޭރުވެސް ލިބުނު އަނިޔާތަކުގެ ސަބަބުން ނޫރު ހެޔެއް ނާރައެވެ. އައިޖީއެމްޗެއްގައި އޮތްތާ އެއްދުވަސް ފަހުން ނޫރު ހޭއެރިއެވެ. އެހެންނަމަވެސް ހާލު ރަނގަޅެއް ނޫނެވެ. އޮތީ ވެންޓިލޭޓަރުގައެވެ. ނޫރު ވެންޓިލޭޓަރަށް ލާން ޖެހުނީ ފުއްޕާމެއަށް ލިބުނު ގެއްލުންތަކުގެ ސަބަބުންނެވެ.

ގަޔަށް ހެރިފައި ހުރި ބިއްލޫރި ކޮޅުތައް ނަގަން 6 ގަޑީއިރުގެ އޮޕަރޭޝަނެއް ކުރަންޖެހުނު ކަމަށް ނޫރުގެ ބައްޕަ ނަދީމް ބުންޏެވެ. އަދި ނޫރު ކުޑަކޮށް ސްޓޭބަލްވުމުން ޑޮކްޓަރުން ކޯ ކަށިގަނޑުގެ އޮޕަރޭޝަން ކުރިއެވެ. އެއީ ފަސް ގަޑީއިރުގެ އޮޕަރޭޝަނެކެވެ. އޭގެ ދެ ދުވަސްފަހުން ފައިގެ ފަލަ މަސްގަނޑުގެ އޮޕަރޭޝަން ކުރިއެވެ. އައިޖީއެމްއެޗުން އޮޕަރޭޝަންކޮށް ނިމުނުތަނާ ދެ ދުވަސް ފަހުން ނޫރު ވަރަށް ގަދައަށް ހުން އަންނަން ފެށިއެވެ. ހާލު ރަނގަޅެއް ނުވިއެވެ. ހުން ތިރި ނުވެގެން ޓްރީޓޮޕް ހޮސްޕިޓަލަށް ބަދަލުކުރިއެވެ.

ޓްރީޓޮޕްގައި ވެސް ނޫރު ބޭއްވީ ވެންޓިލޭޓަރުގައެވެ. ވެންޓިލޭޓަރުން ނެގިތާ މިހާރު ހަތަރު ދުވަސްވީއިރު ދަރިފުޅު އޮތީ އަދިވެސް އައިސީޔޫގައެވެ. ވެންޓިލޭޓަރުން ނެގިފަހުން ނޫރަށް ކުޑަކޮށް ވާހަކަ ދެއްކެވެއެވެ. އެހެންނަމަވެސް އަނގަ އޮޕަރޭޝަން ކޮށްފައި ހުރުމުން ވާހަކަ ދެއްކުމުގައި އުނދަގޫތަކެއް އިހުސާސް ކުރެވެއެވެ. ދެހަފްތާ ފަހުން ނޫރަށް ބުނެވުނީ މައިންބަފައިން ކައިރީގައި އެންމެ ވާހަކައެކެވެ. އެއީ އިންތިހާއަށް ތަދު އިހުސާސް ކުރެވޭ ވާހަކައެވެ.

ނޫރަކީ އެ އާއިލާގައި ހުރި ހަމައެކަނި ބޮޑު ފިރިހެން ދަރިފުޅެވެ. ނޫރުގެ ދެން ތިބެނީ ދެ ކޮއްކޮއެވެ. އެއީ އުމުރުން 15 އަހަރުގެ އަންހެން ކުއްޖަކާ 9 އަހަރުގެ ކުޑަ ފިރިހެން ކުއްޖެކެވެ. މިޒާޖުގެ ގޮތުން ނޫރަކީ އެންމެނާއި ވެސް ގުޅޭ އަހްލާޤް ރަނގަޅު ކުއްޖެކެވެ. ގްރޫޕު ހަދައިގެން މީހުންނާއެކު ބޭރުގައި އުޅޭ ކުއްޖެއް ނޫންކަމަށް ނަދީމް ބުންޏެވެ. އާއިލާއެކު ވަގުތު ހޭދަކުރާ މައިންބަފައިންނާއި ކަންތައްތައް ހިއްސާ ކުރާ ކުއްޖެއް ކަމަށް ވެސް ބުންޏެވެ.

ރާއްޖެއިން ނޫރަށް ދެވެން ހުރި ހުރިހާ ފަރުވާއެއް ދީނިމިފައިވާއިރު ޑޮކްޓަރުން ލަފާ ދެނީ ވީހާވެސް އަވަހަކަށް ނޫރު ގޮވައިގެން ރާއްޖެއިން ބޭރަށް ދިޔުމަށެވެ. އެ މަސައްކަތް ކުރަމުން އަންނައިރު ނޫރުގެ ބޭސްފަރުވާއަށް އަދިވެސް އިތުރަށް ފައިސާ ބޭނުންވެއެވެ. ނޫރުގެ އާއިލާއިން އެދެނީ ހެޔޮއެދޭ ފޯރުންތެރިފަރާތްތަކުން ވެދެވެން އޮތް މިންވަރަކުން ފައިސާގެ އެހީތެރިކަން ފޯރުކޮށްދިނުމަށެވެ. ނޫރުގެ އެކްސިޑެންޓާއެކު އާއިލާއަށް ކުރިމަތި މިވީ ހިތްދަތި ދުވަސްތަކެކެވެ. ނަދީމް ބުނީ ފުރަތަމަ ތިން ދުވަހު ނުވެސް ނިދޭ ކަމަށެވެ. ނިދަން އުޅުނަސް ލޯ މައްޗަށް ސިފަވަނީ ނޫރު ކަމަށެވެ. ނޫރުގެ މަންމަ އައިޝަތު ވަހީދާގެ ހާލަކީ ވެސް ހަމަ އެއީއެވެ. އެދެމަފިރިންގެ ހުރިހާ ވެސް އުންމީދަކީ "ލޮލުގެ ނޫރަށް" އަވަސް ޝީފާއެއް މާތްﷲ މިންވަރު ކުރެއްވުމެވެ. އަދި މި ހިތާމަވެރި ހާލަތުގައި ދެމަފިރިންނަށް މާތްﷲ ކެތްތެރިކަން މިންވަރުކޮށް ދެއްވުމެވެ.

ނޫރަށް އެހީތެރިކަން ފޯރުކޮށްދިނުމަށް:

ބީއެމްއެލް ޑޮލަރު އެކައުންޓް: 7770000105490 (މުޙައްމަދު ނާދިމް)

ބީއެމްއެލް ދިވެހި ރުފިޔާ އެކައުންޓް: 7770000012859 (އައިޝަތު ވަހީދާ)