މަސްވެރިންނަށް ދޭ ޚިދުމަތްތައް ފަސޭހަ ނިޒާމެއްގެ ތެރެއިން ފޯރުކޮށްދިނުމަށް "ހޯސާ" އެޕްލިކޭޝަން ލޯންޗުކޮށްފިއެވެ.

މި އެޕްލިކޭޝަން ލޯންޗުކޮށްފައިވަނީ ދިވެހިރާއްޖޭގެ މަސްވެރިންގެ ދުވަހުގެ މުނާސަބަތުގައި، ގދ. ފަރެސްމާތޮޑާގައި ބޭއްވި ރަސްމީ ޖަލްސާގައެވެ. މި އެޕްލިކޭޝަން ލޯންޗުކޮށްދެއްވީ ފިޝަރީޒް މިިނިސްޓަރު ޑރ. ހުސައިން ރަޝީދު ހަސަންއެވެ.

"ހޯސާ" އެޕްލިކޭޝަނަކީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕްލެކްސްގެ ފަރާތުން ތައާރަފުކޮށްފައިވާ އެޕްލިކޭޝަނެކެވެ.

މި އެޕްލިކޭޝަންގެ ސަބަބުން މަސްވެެރިން އެމީހުން ބާނާ މަސް ކިރުމަށް ކިއު ނަންބަރެއް ނެގުމަށް މަޑުކުރަންޖެހޭ ވަގުތު މަދުވެ، އެޕްލިކޭޝަން މެދުވެރިކޮށް ކޮންމެ ތަނަކު ހުރެގެން ވެސް ކިއު ނަންބަރެއް ނެގޭނެއެވެ. އަދި މަސް ކިރާ ޕޮއިންޓުތައް ހޯދުމާއި ކިއު ނަންބަރު ބަލާލުމާއި، ފައިސާގެ މުއާމަލާތްތައް ވެސް އެޕްލިކޭޝަން މެދުވެރިކޮށް ފަސޭހަކަމާއެކު ކުރިއަށްގެންދެވޭނެއެވެ.

މިފްކޯއިން ބުނީ ސަރވިސް ބިލްތައް ވެސް މިހާރު އެޕްލިކޭޝަން މެދުވެރިކޮށް ފެންނަމުންދާނެ ކަމަށެވެ. ފައިސާ ލިބިފައި ހުންނަ ބިލްތައް ވެސް އެޕްލިކޭޝަނުން ފެންނާނެއެވެ. މީގެ އިތުރުން ދޯނީގެ ލައިސެންސާއި، ރެޖިސްޓްރޭޝަން ސެޓްފިކެޓް އަދި ހައިޖިން ސެޓްފިކެޓު ވެސް މަސްވެރިންނަށް ފަސޭހަކަމާއެކު މި އެޕަށް އަޕްލޯޑުކޮށްލެވެއެވެ.

މި އިންގިލާބީ ބަދަލާއެކު މަސްވެރިކަމުގެ މުޅި ސިނާއަތް ބަދަލުވެގެންދާނެ ކަމަށް މިފްކޯއިން ދެކެއެވެ. އަދި މި އެޕްގެ ސަބަބުން ސަރުކާރަށް ވެސް ޕޮލިސީލަތައް އެކުލަވާލުވުމުގައި ފަސޭހަވެގެންދާނެ ކަމަށް މިފްކޯއިން ބުނެއެވެ.

މި އެޕް ޕްލޭސްޓޯރުންނާއި އެޕް ސްޓޯރުން ހިލޭ ފޯނަށް އަޅާލެވެއެވެ.