ހައިކޯޓުގެ އިސްފަނޑިޔާރު ހާތިފް ހިލްމީ ޝަރަފުވެރިކަމާއެކު ފަނޑިޔާރުކަމުގެ މަގާމުން ވަކިވެވަޑައިގަންނަވަން ނިންމަވައިފިއެވެ.
ހާތިފް ފަނޑިޔާރުކަމުގެ މަގާމުން ވަކިވެވަޑައިގަންނަވަން ހަމަޖެހިފައިވަނީ މި ހިނގާ ނޮވެންބަރު މަހުގެ 18 ވަނަ ދުވަހުއެވެ.
ހާތިފް ފަނޑިޔާރުކަމުގެ މަގާމުން ވަކިވެވަޑައިގަންނަވަން ނިންމެވުމާގުޅިގެން ދިވެހިރާއްޖޭގެ ހައިކޯޓުގެ އިސްފަނޑިޔާރުގެ މަސްއޫލިއްޔަތު، ފަނޑިޔާރު އަލްއުސްތާޒު ހުސައިން ޝަހީދުއާ ވަގުތީގޮތުން ހަވާލުކުރަން ނިންމަވާފައިވާކަން ޖުޑީޝަލް ސަރވިސް ކޮމިޝަން (ޖޭއެސްސީ)ން ވަނީ ހާމަކޮށްފައެވެ.
ޖޭއެސްސީން އާއްމުކުރި ނޫސްބަޔާނެއްގައި ވަނީ; "ފަނޑިޔާރުންގެ ރިޓަޔަރމަންޓް ގަވާއިދު"ގެ ދަށުން ދިވެހިރާއްޖޭގެ ހައިކޯޓުގެ އިސްފަނޑިޔާރު އަލްއުސްތާޒު ހާތިފް ހިލްމީ ޝަރަފުވެރިކަމާއެކު ފަނޑިޔާރުކަމުގެ މަގާމުން ވަކިވެވަޑައިގެންނެވުމާ ގުޅިގެން، 18 ނޮވެންބަރު 2022 ވަނަ ދުވަހުން ފެށިގެން ދިވެހިރާއްޖޭގެ ހައިކޯޓުގެ އިސްފަނޑިޔާރުގެ މަސްއޫލިއްޔަތު ވަގުތީގޮތުން ފަނޑިޔާރު އަލްއުސްތާޒު ހުސައިން ޝަހީދުއާ ހަވާލުކުރުމަށް އެ ކޮމިޝަނުންވަނީ ނިންމާފައިވާކަމަށެވެ.
