ޗައިނާގެ ސަންސީނޯ ބަޔޮލޮޖިކްސްއިން ކޮވިޑް-19ށް އުފެއްދި ވެކްސިނަށް ދުނިޔޭގެ ސިއްހަތު ޖަމްއިއްޔާއިން އިމަޖެންސީ ހުއްދަ ދީފިއެވެ.
ސަންސީނޯ ބަޔޮލޮޖިކްސްގެ ކޮންވިޑީޝިއާ ވެކްސިނަށް ދުނިޔޭގެ ސިއްހަތު ޖަމިއްޔާއިން އިމަޖެންސީ ހުއްދަ ދީފައި ވަނީ ބުރާސްފަތި ދުވަހުއެވެ.
ކޮންވިޑީޝިއާ ވެކްސިނަކީ ކޮވިޑް-19ށް އުފެއްދި ވެކްސިންތަކުގެ ތެރެއިން ދުނިޔޭގެ ސިއްހަތު ޖަމްއިއްޔާގެ ހުއްދަ ލިބުނު 11 ވަނަ ވެކްސިނެވެ. މިވެކްސިނަކީ އުމުރުން 18 އަހަރުން މަތީގެ މީހުންނަށް ދިނުމުގެ ހުއްދަ އޮންނަ ވެކްސިނެކެވެ.
މިވެކްސިނަކީ ކޮވިޑްގެ ސިމްޓޮމެޓިކް ކޭސްތަކަށް 64 އިންސައްތަ ކާމިޔާބު، އަދި ބަލީގެ ނުރައްކާ ކުޑަކުރުމަށް 92 އިންސައްތަ ކާމިޔާބު ވެކްސިނެއް ކަމަށް ސަންސީނޯއިން ފާހަގަކުރެއެވެ.
މީގެކުރިން ދުނިޔޭގެ ސިއްހަތު ޖަމްއިއްޔާއިން ހުއްދަ ދީފައިވާ ވެކްސިންތަކުގެ ތެރޭގައި، ފައިޒަރ އަދި ބަޔޯއެންޓެކްގެ ވެކްސިނާއި މޮޑާނާގެ ވެކްސިންގެ އިތުރުން އެސްޓްރަޒެނެކާ ކޮވިޑް ވެކްސިން، އަދި ޖޯންސަން އެންޑް ޖޯންސަންގެ ކޮވިޑް ވެކްސިންގެ އިތުރުން ނޮވަވެސްކެގެ ވެކްސިން ހިމެނެއެވެ.
