އިނގިރޭސި ވަލީއަހުދު ޕްރިންސް ޗާލްސްގެ އަނބިކަނބަލުން ކެމިލާ ކޮވިޑް-19ށް ޕޮޒިޓިވްވެވަޑައިގެންފިއެވެ.
އެކަމާގުޅިގެން އިނގިރޭސިވިލާތުގެ ގަނޑުވަރުން ނެރުނު ބަޔާނެއްގައި ބުނެފައިވަނީ, ކެމިލާ މިހާރު ހުންނެވީ އައިސޮލޭޝަންގައި ކަމަށެވެ. އަދި ސަރުކާރުގެ ކޮވިޑް-19ގެ ގައިޑްލައިނާ އެއްގޮތަށް އަމަލުކުރައްވަމުން ގެންދަވާކަމަށެވެ.
ކެމިލާ ކޮވިޑަށް ޕޮޒިޓިވްވެވަޑައިގެންފައިވާއިރު, އިނގިރޭސި ވަލީއަހުދު, އުމުރުފުޅުން 73 އަހަރުގެ ޗާލްސް ވަނީ މިދިޔަ ހަފުތާގައި ދެވަނަ ފަހަރަށް ކޮވިޑަށް ޕޮޒިޓިވްވެވަޑައިގެންފައެވެ. ޗާލްސްއާއި ކެމިލާގެ ސިއްހީ ހާލުކޮޅާގުޅޭގޮތުން އެއްވެސް މައުލޫމާތެއް ރަސްމީ ގެކޮޅުން ދީފައެއްނުވެއެވެ.
ޗާލްސްއާއި ކެމިލާ ވަނީ ކޮވިޑް-19 ވެކްސިންގެ ދެ ޑޯޒްގެ އިތުރުން, ބޫސްޓަރ ޑޯޒްވެސް ޖައްސަވާފައެވެ.
ޗާލްސް ކޮވިޑަށް ޕޮޒިޓިވްވެވަޑައިގަތުމުގެ ދެދުވަސްކުރިން ވަނީ ރާނީ އެލިޒަބަތާ ބައްދަލުކުރައްވާފައެވެ.
ޗާލްސް މީގެކުރިން ކޮވިޑަށް ޕޮޒިޓިވްވެވަޑައިގަތީ 2020 ވަނަ އަހަރުގެ މަރޗް މަހުއެވެ.
