އިނގިރޭސި ވަލީއަހުދު ޕްރިންސް ޗާލްސް ކޮވިޑް-19ށް ޕޮޒިޓިވްވެވަޑައިގެންފިއެވެ.
ޕްރިންސް ޗާލްސްއަށް ކޮވިޑް-19 ޖެހިފައިވާކަން އެގައުމުގެ ޝާހީ ގަނޑުވަރުން ވަނީ ކަށަވަރު ކޮށްދީފައެވެ.
ބުރާސްފަތި ދުވަހު ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުގައި ޗާލްސް މިހާރު ހުންނެވީ އައިސޮލޭޝަންގައެވެ. އުމުރުފުޅުން 73 އަހަރުގެ ޗާލްސްގެ ފަރާތްޕުޅުން މިހާރު އަލާމާތްތަކެއް ފެނުނު ކަމުގައިވިއަސް ޗާލްސް ހާލުކޮޅު އަދި ރަނގަޅު ކަމަށެވެ.
މިއީ އިނގިރޭސިވިލާތުގެ ރާނީ އެލިބަޒަތުގެ ދަރިކަލުން ޕްރިންސް ޗާލްސް ކޮވިޑް-19ށް ޕޮޒިޓިވްވެވަޑައިގަތް ދެވަނަ ފަހަރެވެ. ފުރަތަމަ ޕޮޒިޓިވްވެވަޑައިގަތީ 26 މާރޗް 2020ގައެވެ.
އިނގިރޭސިވިލާތުގެ ކޮވިޑް-19ގެ ހާލަތަށް ބަލާއިރު، 2021 ވަނަ އަހަރުގެ ޑިސެމްބަރު މަހުގެ މެދުތެރެއިން ކޭސްތައް ވަރަށް ބޮޑަށް އިތުރުވެގެންދިޔައެވެ. ނަމަވެސް މިހާރު ވަނީ ކޭސްތައް ދަަށަށް ދާން ފަށާފައެވެ. މިހާތަނަށް އައިއިރު ކޮވިޑް-19ށް 18 މިލިއަނަށްވުރެ ގިނަ މީހުން ޕޮޒިޓިވްވެފައިވެއެވެ. އަދި 158 ހާހަށްވުރެ ގިނަ މީހުން ބަލީގައި މަރުވެފައިވާއިރު، 15 މިލިއަނަށްވުރެ ގިނަ މީހުން ބަލިން ރަނގަޅުވެފައިވެއެވެ.
