ހދ. ނެއްލައިދޫއިން ކޯވިޑް ކޭސްތަކެއްފެނި، އެރަށަށް އަރައި ފޭބުން ހެލްތު ޕްރޮޓެކްޝަން އެޖެންސީން މަނާކޮށްފިއެވެ.

ނެއްލައިދޫ މޮނިޓަރިންއަށް ލާފައިވަނީ ހޮނިހިރު ދުވަހު ހަވީރު 17:14ގައެވެ. އެޗްޕީއޭއިން ފޮނުވި ލިޔުމުގައި ވަނީ އެއްވެސް މީހަކު އެ އެޖެންސީން ވަކިގޮތެއް އަންގަންދެން ރަށުން ފޭބުމާއި ރަށަށް އެރުން މަނާކޮށްފައިވާފައިވާ ކަމަށެވެ.

ހެލްތު ސެންޓަރުން މައުލޫމާތުދިން ގޮތުގައި އެރަށުން 5 މީހަކު ޕޮޒިޓިވްވެފައިވާއިރު އެރަށުގައި ހުންނަ ޑޮކްޓަރު ވެސް އެމީހުންގެ ތެރޭގައި ހިމެނެއެވެ.

އެ ހުރިހާ އެންމެވެސް މިހާރު ކަރަންޓީނު ކޮށްފައިވާއިރު، ގުޅުން ހުރި ފަރާތްތަކުގެ ސާމްޕަލްތަކެއް ނަގައި ޓެސްޓްކުރުމަށް ވަނީ ފޮނުވާފައެވެ. އެގޮތުން ޓެސްޓް ކުރުމަށް 42 ސާމްޕަލެއް ވަނީ ކުޅުދުއްފުއްޓަށް ފޮނުވާފައިވާކަމަށް ހެލްތު ސެންޓަރުން މައުލޫމާތުދެއެވެ.