ރާއްޖޭގެ ހުޅަނގުއުތުރުން، އިރުދެކުނު އަރަބިކަނޑުގައި އުފެދިފައިވާ ބާރުގަދަ ކޮޅިގަނޑު، އިތުރަށް ބާރުގަދަ ކޮޅިގަނޑަކަށް ބަދަލުވެ ތޫފާނަކަށް ބަދަލުވާނެކަމަށް ބެލެވެނީ ހޮނިހިރު ދުވަހުގެ ފަތިހު ކަމަށް މޫސުމާއި ބެހޭ ގައުމީ އިދާރާގެ އެސިސްޓެންޓް މީޓިއޮރޮލޮޖިސްޓް އަބްދުﷲ ހާފިޒް ވިދާޅުވެއްޖެއެވެ.
މެޓް އޮފީހުން ހުކުރު ދުވަހު ބުނެފައިވަނީ މި ކޮޅިގަނޑު ކުރިއަށް އޮތް 12 ގަޑިއިރުގެ ތެރޭގައި އިތުރަށް ބާރުގަދަ ކޮޅިގަނޑަކަށް ބަދަލުވެ އަދި އޭގެ 24 ގަޑިއިރު ފަހުން ތޫފާނަކަށް ބަދަލުވެދާނެ ކަމަށެވެ. އަދި މި ތޫފާނުގެ ނުސީދާ އަސަރު ރާއްޖެއަށް ކުރާނެ ކަމަށެވެ.
މޫސުމާ ބެހޭ ގައުމީ އިދާރާއިން ބުނީ ލަފާކުރެވޭ ގޮތުގައި މިކޮޅިގަނޑު ޖެހެމުން ދާނީ ހުޅަނގުއުތުރަށް ރާއްޖެއާއި ދުރަށް ކަމަށެވެ. މި ކޮޅިގަނޑާ ގުޅިގެން ރާއްޖޭގެ އަތޮޅުތަކުގެ މަތީގައި ގިނަ އަދަދަކަށް ބޯ ވިއްސާރަވިލާ އުފެދެމުން ދާ ކަމަށެވެ. އަދި ކުރިއަށް އޮތް 3 ދުވަހުވެސް ރާއްޖޭގެ ސަރަހައްދުގައި ޚާއްސަކޮށް އުތުރާއި މެދުރާއްޖެތެރޭ ވައިގަދަވެ ކަނޑުތައް ވަރަށް ގަދަވާނެކަމަށް ލަފާކުރެވޭ ކަމަށެވެ.
ރާއްޖޭގެ މޫސުމާއި ބެހޭ ގޮތުން "ރާއްޖެއެމްވީ"އަށް މައުލޫމާތު ދެއްވަމުން ހާފިޒް ވިދާޅުވީ ކުރިޔަށް އޮތް ދެ ދުވަހުވެސް ރާއްޖޭގެ މޫސުން ގޯސްވާނެކަމަށެވެ. އަދި މޫސުން ރަނގަޅުވާނެކަމަށް ބެލެވެނީ ހޯމަ ދުވަހުން ފެށިގެންކަމަށް ހާފިޒް ވިދާޅުވިއެވެ.
މީގެއިތުރުން އުތުރާއި މެދު ރާއްޖެތެރެއަށް މޫސުން ގޯސްވާނެކަމަށް ލަފާކުރެވޭއިރު ދެކުނުގެ ހިސާބުތަކަށްވެސް މިތޫފާނުގެ އަސަރުކުރާނެކަމަށް ހާފިޒް ވިދާޅުވިއެވެ. އަދި އުދައިގެ އަސަރު ކުރުމުގެ ފުރުސަތު މުޅި ރާއްޖެއަށް އެބައޮތްކަމަށާއި ނަމަވެސް ފުރުސަތު ބޮޑީ އުތުރާއި މެދު ރާއްޖެތެރެއަށް ކަމަށް ހާފިޒް ވިދާޅުވިއެވެ. އެއީ އުތުރުގެ އަތޮޅުތަކާއި މެދު ރާއްޖޭގެ އަތޮޅުތަކުގައި އެވްރެޖްކޮށް ވައި ބާރުވާނެކަމަށް ލަފާކުރެވޭތީކަމަށް ހާފިޒް ވިދާޅުވިއެވެ.
މެއި މަހުގެ 10 ވަނަ ދުވަހުން ފެށިގެން ރާއްޖެއަށް ކުރަންފެށި ވިއްސާރައާއެކު މި މަހުގެ 12 ވަނަ ދުވަހު ރާއްޖެއަށް ހުޅަނގު މޫސުން ވަނީ ފެށިފައެވެ. އެގޮތުން ވޭތުވެ ދިޔަ 24 ގަޑިއިރު ވެސް ރާއްޖޭގެ ބޮޑުބަޔަކަށް ވިއްސާރަކޮށް ބައެއް ރަށްތަކަށް ބޯކޮށް ވާރޭވެހުނެވެ. އެންމެ ގިނައިން ވާރޭވެހިފައިވަނީ ލ. ކައްދޫއަށެވެ. އެގޮތުން ކައްދޫއަށް 59 މިލިލީޓަރުގެ ވާރޭ ވެހިފައިވާ ކަމަށް މޫސުމާ ބެހޭ ގައުމީ އިދާރާގެ ތަފާސްހިސާބުތައް ދައްކައެވެ.
މީގެ އިތުރުން ގއ. ގެމަނަފުއްޓާއި ހއ. ކެލާއަށް ވެސް ބޯކޮށް ވާރޭ ވެހިފައިވެއެވެ. އަދި ރާއްޖޭގެ އެހެން ހިސާބުތަކަށް ވެސް ބޯކޮށް ވާރޭވެހި ބައެއް ރަށްތަކުގައި ފެންބޮޑުވުމުގެ ހާދިސާތައް ހިނގައި ބައެއް މީހުންގެ މުދަލާއި ތަކެއްޗަށް ވަނީ ގެއްލުން ލިބިފައެވެ.
