މެއި 6 ހަމަލާ: ތަހުމީނަށް ކުރާ ދައުވާގައިވެސް، ޝަރީއަތުގެ ކުރީގެ މަރުހަލާ ނިންމާލައިފި
މުއްދަތުގެ ފަހުން ހެކި ހުށަހަޅާފައިވަނީ ތަހުމީނުގެ އިހުމާލަކުން ނޫން
ކުރީގެ ރައީސް ނަޝީދަށް އަމާޒުކޮށް ދިން ހަމަލާއާ ގުޅިގެން ދައުވާ އުފުލާފައިވާ ތަހުމީނު އަހުމަދު
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން ތަހުމީނު އަހުމަދުގެ މައްޗަށް އުފުލާފައިވާ ދައުވާތަކުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލާގައި އެންމެ ފަހުން އަޑުއެހުމެއް ބާއްވާފައިވަނީ މިހިނގާ މެއި މަހުގެ 10 ވަނަ ދުވަހުއެވެ. އެ އަޑުއެހުމުގައި ތަހުމީނުގެ ވަކީލު ވަނީ އޭނާގެ ފަރާތުން ހުށަހަޅާފައިވާ ހެކިތައް ބަލައިގަތުމަށް އެދިފައެވެ.
އެ އަޑުއެހުމުގައި ގާޒީ ވިދާޅުވީ، މުއްދަތުގެ ފަހުން ހެކި ހުށަހަޅާފައިވަނީ ތަހުމީނުގެ އިހުމާލަކުން ނޫންކަމަށާއި، އެއީ އޭނާގެ އޭރުގެ ވަކީލުގެ އިހުމާލުން ވީކަމެއް ކަމަށްވާއިރު، މައްސަލައިން ދިފާއުވުމުގެ ފުރުސަތު އޭނާއަށްވެސް ލިބިދޭންޖެހޭކަމަށެެވެ.
އޭގެ އިތުރުން، ކުރީގައި ހުށަހަޅާފައިވާ ހެކިތައް ބަލައިގަތުމާމެދު ދައުލަތުންވެސް އިއުތިރާޒު ނުކުރާތީ ގާޒީ ވަނީ ތަހުމީނުގެ ފަރާތުން ހުށަހަޅާފައިވާ ދިފާއީ ހެކި ބަލައިގެންނެވުމަށް ނިންމަވާފައެވެ.
އަދި ދައުލަތުން އެ ދުވަހު ވަނީ ވަކި ވަކި ހެކިންނާމެދު އިއުތިރާޒެއް އޮތްނަމަ 3 ދުވަސް ތެރޭގައި ކޯޓަށް އަންގާނެކަމަށް ބަޔާންކޮށްފައެވެ.
އެ ދުވަހު ގާޒީ ވިދާޅުވީ، އެ ހެކިތަކާ ގުޅޭގޮތުން ދައުލަތުން ހުށަހަޅާ ހުށަހެޅުމާމެދު ދެފަރާތުން ވާހަކަ ދެއްކުމުގެ ފުރުސަތު ދެއްވުމަށްފަހު އެކަންކަމާ ގުޅޭގޮތުން ގޮތެއް ނިންމަވާނެކަމަށެވެ.
ވުމާއެކު، އާދިއްތަ ދުވަހުގެ އަޑުއެހުމުގައި ވަނީ އެބައި ކުރިއަށް ގެންގޮސްފައެވެ. އެގޮތުން ދައުލަތުން ވަނީ ހާދިސާ ހިނގި ތަނުގައި ނެތްކަމުގެ ދިފާއުގައި ތަހުމީނުގެ ފަރާތުން ހުށަހަޅާފައިވާ 2 ހެތްކަކަށް އިއުތިރާޒުކޮށް ހުށަހެޅުން ހުށައަޅާފައެވެ. އެގޮތުން ތަހުގީގު މަރުހަލާގައިވެސް އެ ކަންކަން އެއްވެސް ވަރަކަށް ހާމަކޮށްފައި ނުވާކަމަށާއި، ޓެރަރިޒަމްގެ މައްސަލައާ ގުޅޭގޮތުން ސުވާލު ކުރުމުންވެސް ހަނު ހުރެފައިވާކަމަށް ދައުލަތުގެ ވަކީލު ވިދާޅުވިއެވެ.
އެ ހުށަހެޅުމަށް ދިފާއުންވެސް ވަނީ ރައްދު ދީފައެވެ.
ދެފަރާތުން ދެއްކެވި ވާހަކަތަކަށް ރިއާޔަތް ކުރައްވައި ގާޒީ ނިންމެވީ އޭގެ ތެރެއިން އެއް ހެތްކެއް ބަލައިގެންނެވުމަށެވެ. ނަމަވެސް އެ ހެކި ހުށަހަޅާފައިވާ ސަބަބުތަކުގެ ތެރެއިން ދެވަނަ ސަބަބު ބަލައިނުގެންނެވުމަށްވެސް ގާޒީ ނިންމެވިއެވެ.
ކްރިމިނަލް ކޯޓުގައި މިހާރު މި މައްސަލަ ބައްލަވަނީ ގާޒީ ސޮފްވަތު ހަބީބެވެ.
