ދެން ޑައިންއިން ނުކުރެވޭނެ، ޑެލިވަރީ ކުރެވޭނީ ދަންވަރު 12 ޖަހަންދެން!
ފިޔަވަޅުތައް ތަންފީޒުކުރުމަށް ފުލުހުންނާއި ސިފައިން ގުޅިގެން ޚާއްސަ އޮޕަރޭޝަންއެއް 12 މެއިގައި ވަނީ ފަށާފައި
ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް
ކޮވިޑްއިން ރައްކާތެރިވުމަށް އަޅާފިޔަވަޅުތަކުގެ ދަށުން ޑައިން އިން ހުއްޓާލާ، ޑެލިވަރީކުރެވޭނީ ދަންވަރު 12 ޖަހަންދެންކަމަށް ފުލުހުން ބުނެފިއެވެ.
ހެލްތް އިމަޖެންސީ އޮޕަރޭޝަން ސެންޓަރ އެޗްއީއޯސީގެ ނޫސްވެރުންގެ ބައްދަލުވުމުގައި ކޮވިޑްގެ ހާލަތު ކުރުމަށް ކުރާ މަސައްކަތްތަކުގެ މަޢުލޫމާތު ހިއްސާކުރައްވަމުން ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް ވަނީ މި މަސައްކަތް ކުރުމަށް ފުލުހުންނާއި ސިފައިން ގުޅިގެން ޚާއްސަ އޮޕަރޭޝަންއެއް 12 މެއިގައި ފަށާފައިވާކަމަށެވެ. މި އޮޕަރޭޝަންގައި ފުލުހުންގެ ހުރިހާ ވަސީލަތްތައް ބޭނުންކުރަމުންދާއިރު، މާލެ ސަރަހައްދުގައި ތަންފީޒުކުރަންޖެހޭ ފިޔަވަޅުތަކުގެ ތަފްސޫލު ހިއްސާކުރެއްވިއެވެ. އެގޮތުން ބުދަ ދުވަހުން ފެށިގެން ހަވީރު 4ން ފަތިހު 4ށް ބޭރުގައި އުޅުން މަނާކޮށްފައިވާއިރު، ޑައިންގެ ޚިދުމަތް ހުއްޓާލާ ޑެލިވަރީއާއި ޓޭކްއަވޭގެ ޚިދުމަތް ދެވޭނެކަމަށް އަބްދުﷲ ޝަރީފް ވިދާޅުވިއެވެ. މީގެ އިތުރުން ޖިމްތަކާއި ކަސްރަތު ކްލާސްތަކާއި، ސަނަމާތަކާއި، ސެލޫންތަކާއި ބަންދުކުރުމަށް އަންގާފައިވާއިރު މިކަންކަންވެސް ފުލުހުން ބަލަމުންދާކަމަށް ވިދާޅުވިއެވެ.
ބޭރަށް ނިކުމެއުޅުން މަނާގަޑިތަކުގައި ބޭރަށް ނިކުންނަމަ ފުލުހުންގެ ޕޯޓަލްއިން ހޯދަން ވަނީ އެދިފައެވެ. އަދި ޔުނީފޯމްއެޅި އޮފީސްތަކުގެ މުއައްޒަފުން ބޭރަށް ނިކުންނަނަމަ އޮފީހުގެ ޔުނީފޯމްގައި އޮފީސް ކާޑުއެކު ނިކުތުމަށް އަބްދުﷲ ޝަރީފް ހަނދާންކޮށްދެއްވިއެވެ. ފިހާރަތަކާއި، ކެފޭ ރެސްޓޯރެންޓްތަކުން އެތަންތަނަށް ނުވަދެ ޓޭކްއަވޭގެ ޚުދުމަތް ހަވީރު 4 ޖަހަންދެން ދިނުމަށް ނިންމާފައިވާއިރު، ޕޯޓަލްއިން ހުއްދަހޯދުމަށްފަހު ޑެލިވަރީގެ ޚިދުމަތް 12 ޖަހަންދެން ދެވޭނެކަމަށް ވިދާޅުވިއެވެ.
މީގެ އިތުރުން ޓެކްސީގެ ޚިދުމަތް މިވަގުތު ދެވޭނީ އިމަޖެންސީތަކާއު، ޒަރޫރީ ކަންކަމަށްދާ ފަރާތްތަކަށް އެކަނިކަން ފާހަގަކުރައްވާ އަބްދުﷲ ޝަރީފް ވަނީ ޓެކްސީއަށް އަރާ ކަސްޓަމަރުގެ މިކަންކަން ޓެކްސީ ޑްރައިވަރުންނާއި ސެންޓަރުތަކުން ކަށަވަރުކުރުމަށް އެދިފައެވެ. މިއާ ޚިލާފަށް ކަންތައްކުރާނަމަ ޓެކްސީ ޕާމިޓް ބާތިލުކުރާނެކަމުގެ އިންޒާރު އޭނާ ދެއްވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް ވަނީ އާންމުން ސަމާލުކަންދޭންޖެހޭ ބައެއް އިތުރު ކަންތައްތައްވެސް ފާހަގަކުރައްވާފައެވެ. އެގޮތުން ޕަބްލިކް ޓްރާންސްޕޯޓް މިހާލަތުގައި ދޭނީ ހަވީރު 4 ޖެހުމާއި ހަމައަށްކަން ހަނދާންކޮށްދެއްވިއެވެ. އަދި ޕެޓްރޯލް ޝެޑްތައްވެސް އަސުރު ނަމާދަށްފަހު ބަންދުވާނެކަމަށް ވިދާޅުވިއެވެ.
ޑައިން އިން ހުއްޓާލާ، ޑެލިވަރީކުރެވޭނީ ދަންވަރު 12 ޖަހަންދެންކަމަށް ފުލުހުން ބުނެފައިވާއިރު، ޕޮޒިޓިވްވާ މިންވަރު ދަށް ނުވެއްޖެނަމަ ކެފޭ ރެސްޓޯރެންޓްގެ އެތެރޭގައި ޚިދުމަތް ދިނުން ރޯދައަށްފަހު މެދުކަނޑާލަންޖެހިދާނެކަމުގެ އިންޒާރު އެޗްއީއޯސީއިން މީގެ ކުރިންވެސް ވަނީ ދީފައެވެ. ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް އޭރު ވަނީ ރޯދައަށް ފަހު ކޭސް ލޯޑަށް ބަދަލު ނައިސްފިނަމަ ހަރުކަށި އިތުރު ފިޔަވަޅުތައް އަޅާނެކަމަށް ވިދާޅުވެފައެވެ. އެގޮތުން ކޭސްލޯޑް ދަށް ނުވެއްޖެނަމަ ކެފޭ ރެސްޓޯރެންޓްގެ އެތެރޭގައި ޚިދުމަތް ދިނުން ރޯދައަށްފަހު މެދުކަނޑާލަންޖެހިދާނެކަމަށް ވިދާޅުވިއެވެ.
އެޗްއީއޯސީއިން މީގެ ކުރިންވެސް ވަނީ ކެފޭ ރެސްޓޯރެންޓްތަކުގައި ކޮވިޑާ ގުޅިގެން އެކަށައަޅަންޖެހޭ މިންގަނޑާ ޚިލާފަށް ޚިދުމަތްދެމުން އަންނަކަން ފާހަގަކުރެވޭކަމަށް ބުނެފައެވެ. އެގޮތުން ރެސްޓޯރެންޓްތަކަށް ގޮސް އެއްވެސް ވަރަކަށް މާސްކް ނާޅާ ތިބުމާއި، އިޖުތިމާޢީ ގައިދުރުކަމުގެ މިންގަނޑަށް ވެސް ތަބާނުވާކަން ވަނީ ފާހަގަކޮށްފައެެވެ. މިކަން ހައްލުކުރުމަށް ކެފޭ ރެސްޓޯރެންޓްތަކުގެ އިންސްޕެކްޝަން އަލުން ވަރުގަދަކުރާނެކަމަށް މަބްރޫކް ވަނީ ވިދާޅުވެފައެވެ.
