ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށްދިން ދިން ނިރުބަވެރި ހަމަލާގައި ހައްޔަރުކުރެވިފައިވާ މީހުންގެ މައްޗަށް ދަޢުވާކުރެވޭނެ ދުވަހެއް އަދި ދަންނަވަން ނޭނގޭކަމަށް ފުލުހުން ބުނެފިއެވެ.

ރައީސް ނަޝީދަށް ދިން ހަމަލާއާ ގުޅިގެން ފުލުހުން ކުރަމުންދާ ތަޙުޤީޤުގެ އެންމެ ފަހުގެ މަޢުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުމުގައި ވާހަކަދައްކަވަމުން އެއިދާރާގެ ކްރައިމް އިންވެސްޓިގޭޝަން ކޮމާންޑްގެ ހެޑް އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒް ވަނީ މި މައްސަލައިގެ ތަޙުޤީޤު އަދި އޮތީ ވަރަށް ޅަފަތުގެ މަރުޙަލާއެއްގައިކަމަށް ވިދާޅުވެފައެވެ. ޖިނާއީ މައްސަލަތަކުގައި ދައުވާކުރަން ހުށަހަޅަން ވަކި ޓައިމްފްރޭމްތަކެއް ދީފައިވާކަން އޭސީޕީ ފާހަގަކުރެއްވިއެވެ. މި މައްސަލައަކީ ވަރަށް ގިނަ ކަންކަން ބަލާ ގިނަ ހޯދުންތައް ހޯދަންޖެހޭ މައްސަލައެއްކަމުގައިވާއިރު، މި މައްސަލައިގައި މިހާރު ކަޑަތުކުރަމުން މިދަނީ ތަޙުޤީޤުގެ "އަރލީ ސްޓޭޖްތައް" ކަމަށް ވިދާޅުވިއެވެ. މި ސަބަބައްޓަކައި ހައްޔަރުކުރެވިފައިވާ މީހުންގެ މައްޗަށް ދަޢުވާކުރެވޭނެ ދުވަހެއް ނޭންގޭކަމަށް އޭސީޕީ ވިދާޅުވިއެވެ.

ހަމަލާ ދިނުމުގެ ސަބަބުން ހެކި ނެގުމަށާއި، ތަޙުޤީޤީއިތުރު ކަންތައްތައް ފުރިހަމަކުރުމަށް ރައީސް ނަޝީދު ދިރިއުޅުއްވާ ގެކޮޅު ހުންނަ ސަރަހައްދު އާންމުންނަށް ނުވަދެވޭގޮތައް ބަންދުކޮށްފައި އޮންނަތާ 4 ދުވަހަށް ފަހު ހުޅުވާލާފައިވާކަމަށް އޭސީޕީ ރިޔާޒް ވިދާޅުވިއެވެ. އެތަން ހުޅުވާލީ އެސަރަހައްދުން އެކަމާ ގުޅުންހުރި ހުރިހާ އެއްޗެއް ނަގާފައި ކަމަށާއި، އަދިވެސް އެތާ ގެއަކުން ވެސް އެއާ ގުޅުންހުރި އެއްޗެއް ފެނިއްޖެ ނަމަ އެންގުމަށް އެދިފައިވެއެވެ. ރައީސް ނަޝީދަށް އަމާޒުކޮށްދިން ނިރުބަވެރި ހަމަލާއާއި އެމްއެމްޕީއާރްސީ ކޮރަޕްޝަން ކޭސްއާއި ގުޅުން ހުރިތޯ ނޫސްވެރިއަކު ކުރި ސުވާލަކަށް ޖަވާބުދެމުން އޭސީޕީ ރިޔާޒްވަނީ ފުލުހުން ތަހުޤީޤުކުރާ އިތުރު އެއްވެސް މައްސަލައަކާއި މި ކޭސްއާއި ގުޅުން ހުރިކަން ކަނޑައެޅިފައިނުވާކަމަށް ވިދާޅުވެފައެވެ.

ރައީސް ނަޝީދަށް އަމާޒުކޮށް ދިން ހަމަލާ ދިނުމުގެ ތުހުމަތު ކުރެވޭ 3 މީހަކު ވަނީ މިހާތަނަށް އައިރު ހައްޔަރުކޮށްފައެވެ. މި މައްސަލައާއި ގުޅިގެން ހައްޔަރުކޮށްފައިވަނީ 21 އަހަރުގެ މުޖާޒް އަހުމަދު، މއ. ފޭރުގެ، އާއި ގއ. ކޮނޑޭއަށް އުފަން 32 އަހަރުގެ ތަހުމީން އަހުމަދެވެ. ތަހުމީން އަހުމަދަކީ އައިއީޑީ ހަރުކުރެވިފައިވާ ސައިކަލުގެ ވެރިފަރާތް ކަމަށް ފުލުހުން ބުނެއެވެ. މީގެ އިތުރުން ރައީސް ނަޝީދަށް ހަމަލާދިން އައިއީޑީ ގޮއްވާލިކަމަށް ތުހުމަތުކުރެވޭ ވ. ތިނަދޫ، ހިޔާ 25 އަހަރުގެ އަދުހަމް އަހުމަދު ރަޝީދުވެސް ވަނީ ހުޅުމާލެއިން ހައްޔަރުކޮށްފައެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އޭސީޕީ ރިޔާޒް ވަނީ މިވަގުތައް މި މައްސަލައިގައި ތަހުޤީޤަށް ހައްޔަރުކުރަން ޖެހޭ އެންމެން ހައްޔަރުކޮށް ނިމިފައިވާކަމަށް ވިދާޅުވެފައެވެ. އެހެންނަމަވެސް އިތުރު ބަޔަކުވެސް މިކަން ހިންގުމުގައި އުޅުނުކަމަށް ބެލެވި "ޕަރސަން އޮފް އިންޓްރެސްޓް"ގެ ގޮތުގައި އިތުރަށް ބަލަމުންދާކަމަށް ފުލުހުން ބުނެއެވެ. އޭސީޕީ ރިޔާޒް ވަނީ ތަހުގީގާއި ގުޅިގެން ހޯދޭ ހޯދުންތައް އެކަށީގެންވާ ގޮތުގައި ތަފްސީލުކޮށް ހާމަކުރަމުންދާނެކަމަށް ވިދާޅުވެފައެވެ. އެގިތުން މި މައްސަލަ އެކި އޭންގަލްތަކުން ދަނީ ބަލަަމުންދާއިރު، ރައީސް ނަޝީދު ގެއިން ނުކުމެވަޑައިގެންނެވި ގަޑި އަދުހަމްއަށް އެނގުނު ގޮތް މިވަގުތު ބަލަމުންދާކަމަށް ވިދާޅުވިއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ފުލުހުންގެ ތަރުޖަމާނު ޗީފް ސުޕްރިންޓެންޑެންޓް އޮފް ޕޮލިސް ޔޫނުސް ސޮބާ ވަނީ، ކޮވިޑް ކޮންޓްރޯލްކުރުމާއި ނިރުބަވެރި ޙަމަލާގެ ތަޙުޤީޤުކުރުމަށް ފުލުހުންގެ ހުރިހާ ވަސީލަތްތަކެއް ބޭނުންކުރަމުންކަމަށް ވިދާޅުވެފައެވެ. ތަހުޤީޤަށް ބޭނުންވާ ހުރިހާ ވަސީލަތެއް ބޭނުންކުރެވޭނެ އިންތިޒާމު ކޮމިޝަނަރ އޮފް ޕޮލިސް ވަނީ ހަމަޖައްސަވާފައިވާއިރު، ކޮވިޑް ކޮންޓްރޯލްކުރުމާއި ނިރުބަވެރި ޙަމަލާގެ ތަޙުޤީޤުކުރުމަށް ފުލުހުންގެ ހުރިހާ ޑިޕާޓްމެންޓްތަކަކުން މިވަގުތު މަސައްކަތްކުރަމުންދާކަމަށް ފުލުހުންގެ ތަރުޖަމާނު ވިދާޅުވިއެވެ.

ނޫސްވެރިންގެ ބައްދަލުވުން ނިންމަވާލައްވަމުން އޭސީޕީ ރިޔާޒް ވަނީ، މިވަގުތު ފުލުހުންގެ ތަޙުޤީޤުގެ ޕްރައިމަރީ ފޯކަސްހުރީ ތުހުމަތުކުރެވޭ ފަރާތްތަކުގެ މައްޗަށް ހެއްކާ ޤަރީނާއާއެކު ޝަރީޢަތައް ދަޢުވާކުރަން ހުށަހަޅާ އަދުލު އިންސާފު ޤާއިމުކުރުންކަމަށް ވިދާޅުވެފައެވެ. މި އަމާޒަށް ވާސިލުވުމަށް ތަޙުޤީޤަށް ބުރޫނާރާނެ ވަރަށް ދެފުށް ފެންނަގޮތައް މަޢުލޫމާތު ވަގުތުން ވަގުތައް ހާމަކުރަމުންދާނެކަމަށް އޭސީޕީ ރިޔާޒް ވިދާޅުވިއެވެ.