ބެލުންތައް ދަނީ ކުރިއަށް، ގެސްޓް ހައުސްތަކާއި ފިހާރަތައް ވެސް ބަލާނެ: މަބްރޫކް

ކޮވިޑް-19 ކޮންޓްރޯލް ކުރުމަށް ކުރަމުންދާ މަސައްކަތުގެ ދަށުން މާލެސިޓީގައި މާސް އިންސްޕެކްޝަނެއް ކުރިއަށްދާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

ހޯމަ ދުވަހު އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒު ވިދާޅުވީ މާލޭގައި މާސް އިންސްޕެކްޝަނެއް މިހާރު ކުރިއަށްދާ ކަމަށެވެ. އެގޮތުން މިހާތަނަށް 65 ގެސްޓްހައުސްއެއް، ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ފަރާތުން އިންސްޕެކްޓް ކޮށްފައިވާއިރު ގައިޑްލައިނާ ޚިލާފުވެފައިވާ އެއް ތަނެއް ފާހަގަކުރެވިފައިވާ ކަަމަށް މަބްރޫކް ވިދާޅުވިއެވެ.

އޭނާ ވިދާޅުވީ ފާހަގަކުރެވުނު މައްސަލަތައް ހައްލު ކުރުމަށް އަންގައި އެކަން ޓޫރިޒަމް މިނިސްޓްރީގެ ސަމާލުކަމަށް ވެސް ގެނެސްފައިވާ ކަމަށެވެ. އެކަންކަން ރަނގަޅު ނުކޮށްފިނަމަ ފިޔަވަޅު އަޅާނެ ކަމަށްވެސް ވިދާޅުވިއެވެ.

މީގެ އިތުރުން މަބްރޫކް ވިދާޅުވީ އިތުރު ވިޔަފާރިތަކަށް ބަލާއިރު 40 ތަނެއް ހޯމަ ދުވަހު ބަލާފައިވާ ކަމަށެވެ. އެގޮތުން 25 ތަނެއް ގައިޑްލައިނާ އެއްގޮތަށް ކަންތައްތައް އިންތިޒާމް ކޮށްފައިވާއިރު، 15 ތަނެއްގައި ރަނގަޅު ކުރަން ޖެހޭ ކަންކަން ފާހަގަކުރެވިފައިވާ ކަމަށެވެ. އަދި ދެވަނަ ފަހަރަށް ބަލާއިރު، ރަނގަޅު ނުކުރާނަމަ ޖޫރިމަނާ ކުރާނެ ކަމަށް ވިދާޅުވިއެވެ.

ކޮވިޑް-19ގެ ހަތަރު ވަނަ ރާޅާއެކު މާސް އިންސްޕެކްޝެއް ކުރިއަށް ގެންދާއިރު، މީގެ ކުރިން ވެސް މާލޭގެ އިތުރުން އަތޮޅުތެރޭގެ ރަށްރަށުގައި ވެސް އިންސްޕެކްޝަންތައް ކުރިއަށް ގެންގޮސްފައިވެއެވެ. އަދި ގަވާއިދާ ޚިލާފުވާ ތަންތަނާއި މެދު ފިޔަވަޅު ވެސް އަޅާފައިވެއެވެ. އެޗްޕީއޭއިން އާންމުކޮށްފައިވާ ޖޫރިމަނާކުރާ އުސޫލުގައި ވާގޮތުން ފުރަތަމަ ފަހަރު ޖޫރިމަނާކުރަނީ 5000 ރުފިޔާއިންނެވެ. އަދި ދެވަނަ ފަހަރު 25،000 ރުފިޔާއިން ޖޫރިމަނާ ކުރެވޭއިރު، އެންގުމާ ޚިލާފުވެ ކަންކަން ރަނގަޅު ނުކުރާނަމަ، ތިންވަނަ ފަހަރަށް 50،000 ރުފިޔާއިން ޖޫރިމަނާކުރާނެއެެވެ. ހަތަރުވަނަ ފަހަރުގެ ޖޫރިމަނާއަކީ 75،000 ރުފިޔާއެވެ. ފަސްވަނަ ފަހަރު ޖޫރިމަނާ ކުރާނީ އެއްލައްކަ ރުފިޔާއިންނެވެ.