ޕެންޑިންގ ސާމްޕަލްތަކާއެކު އަންގާރަ ދުވަހު 1465 މީހުން ޕޮޒިޓިވް

އަންގާރަ ދުވަހު 1465 މީހަކު ކޮވިޑް-19ށް ޕޮޒިޓިވްވެއްޖެއެވެ.

އަންގާރަ ދުވަހުގެ ރޭ ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވީ ބެކްލޮގް ސާމްޕަލްތަކާއެކު އަންގާރަ ދުވަހު 1465 މީހަކު ޕޮޒިޓިވްވެފައިވާ ކަމަށެވެ.

Advertisement

މަބްރޫކް ވިދާޅުވީ މާލެ ސަރަހައްދުން 1213 މީހުން، އަތޮޅުތެރޭގެ ރަށްތަކުން 244 މީހަކު ޕޮޒިޓިވްވެފައިވާ ކަމަށެވެ. އަދި ފާއިތުވި 24 ގަޑިއިރު 3703 ސާމްޕަލެއް ވަނީ ނަގާފައެވެ.

18،221 އެކްޓިވް ކޭސް ހިމެނޭއިރު، 268 މީހަކަށް ހޮސްޕިޓަލްގައި ދަނީ ފަރުވާ ދެމުންނެވެ.

ރާއްޖޭގައި މިހާތަނަށް 47،421 މީހަކު ޕޮޒިޓިވްވެފައިވެއެވެ. އަދި ބަލިން ރަނގަޅުވެފައިވަނީ 29،086 މީހުންނެވެ. 105 މީހަކު މިބަލީގައި ނިޔާވެފައިވެއެވެ.

ރާއްޖޭގެ ކޮވިޑްގެ ހާލަތު އިތުރަށް ތަފްސީލް ކޮށްދެއްވާ މަބްރޫކް ވިދާޅުވީ ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި 7 މީހަކަށް ފަރުވާ ދެމުންދާ ކަމަށެވެ. އޭގެ ތެރެއިން 5 މީހުންނަށް ފަރުވާ ދެމުންދަނީ ވެންޓިލޭޓަރުގައި ކަމަށެވެ. މަބްރޫކް ވިދާޅުވީ ދަރުމަވަންތަ ހޮސްޕިޓަލްގެ 17 ވަނަ ފަންގިފިލާގައި 8 މީހުން، ދަރުމަވަންތަ ހޮސްޕިޓަލްގެ 16 ވަނަ ފަންގިފިލާގައި 3 މީހުން އަދި އައިޖީއެމްއެޗްގެ ހިޔާ ވިންގް 4 މީހަކަށް ފަރުވާ ދެމުންދާ ކަމަށެވެ.

ހުޅުމާލެ މެޑިކަލް ފެސިލިޓީގައި 196 މީހުންނަށް ފަރުވާ ދެމުންދާކަން ފާހަގަކޮށް މަބްރޫކް ވިދާޅުވީ ވޯޑުގައި 187 މީހުންނަށް ފަރުވާ ދެމުންދާއިރު، އައިސީޔޫގައި 4 މީހަކަށް ފަރުވާ ދެމުންދާ ކަމަށެވެ. އަދި އައިސީޔޫގައި ވެންޓިލޭޓަރުގެ އެހީގައި އިތުރު 5 މީހަކަށް ފަރުވާ ދެމުންދާ ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ ހުޅުމާލެ ހޮސްޕިޓަލްގައި 29 މީހުން، އައްޑޫސިޓީ ހޮސްޕިޓަލްގައި 2 މީހުން، ބ.އޭދަފުށީގައި 4 މީހުން، ށ.ފުނަދޫގައި 9 މީހުން އަދި ލ.ގަމުގައި 6 މީހަކަށް ފަރުވާ ދެމުންދާ ކަމަށެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރުވަނަ ރާޅާއެކު ކޮންމެ ދުވަހަކު ދަނީ ގިނަ ބަޔަކު ޕޮޒިޓިވްވަމުންނެވެ. ހާލަތު ގޯސްވެ އެޑްމިޓް ކުރާ ރޭޓް މަތިވަމުންދާއިރު، ބެޑް ކެޕޭސިޓީ ފުލް ވެދާނެކަމުގެ އިންޒާރު ވެސް އެޗްއީއޯސީން ދީފައިވެއެވެ.