ކޮވިޑް-19އާ ދެކޮޅަށް ޖަހާ ކޮވިޝީލްޑް ވެކްސިން ޖެހުން 16 ހަފްތާއަށް ފަސްކުރެވިދާނެ ކަމަށް ހެލްތު އެމަޖެންސެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
ކޮވިޝީލްޑް ވެކްސިންގެ ދެވަނަ ޑޯޒު ޖަހަން ޖެހެނީ ފުރަތަމަ ޑޯޒު ޖަހާތާ 8 ހަފްތާއާއި 12 ހަފްތާއާ ދެމެދުގައެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވީ ކޮވިޝީލްޑް ވެކްސިންގެ ދެވަނަ ޑޯޒު ޖެހުން 16 ހަފްތާއާ ހަމައަށް ފަސްކުރެވޭނެ ކަމަށް ޓެގް ޓީމުން ނިންމާފައިވާ ކަމަށެވެ. އެގޮތަށް ނިންމީ އެ ޓީމުން ކުރި ދިރާސާއަކަށް ފަހު ބައެއް ބޮޑެތި އެހެން ގައުމުތަކުގައި ވެސް އެގޮތަށް ކަންތައް ކޮށްފައި ހުރީމަ ކަމަށް މަބްރޫކް ވިދާޅުވިއެވެ. އެގޮތުން ސްޕެއިން އާއި ކެނެޑާ ފަދަ ގައުމުތަކުގައި އެ ގޮތަށް ކަންތައް ކޮށްފައިވާ ކަމަށް މަބްރޫކް ވިދާޅުވިއެވެ.
ޓެގް ޓީމުން މިހެން ނިންމާފައި މިވަނީ އިންޑިއާއިން ރާއްޖެއަށް ހަދިޔާކޮށްފައިވާ ކޮވިޝީލްޑް ވެކްސިން މާލެ ސަރަހައްދުގައި ޖެހުން ހުއްޓާލާފައިވަނިކޮށެވެ. ވެކްސިން ޖެހުން ހުއްޓާލީ ރާއްޖޭގައި ހުރި ވެކްސިން ޑޯޒުތައް ހުސްވާން ގާތްވެ ދެން ވެކްސިން ލިބޭނެ ދުވަހެއް ޔަގީން ނުވާތީއެވެ. އެކަމަކު ވެކްސިން ގެނައުމުގެ މަސައްކަތް މިހާރު ކުރަމުން އަންނަ ކަމަށް އެޗްޕީއޭއިން ބުނެފައިވެއެވެ.
މިވަގުތު ރާއްޖޭގައި ބާކީ ހުރީ ކޮވިޝީލްޑް ވެކްސިންގެ ހާހެއްހާ ޑޯޒެވެ. އެކަމަކު ވެކްސިންގެ ދެވަނަ ޑޯޒު ޖަހަން ޖެހޭ 20،000ށް ވުރެ ގިނަ މީހުން އަދިވެސް ބާކީ އެބަތިއްބެވެ. މިވަގުތު ވެކްސިން ޖަހަނީ ވަކި ހާއްސަ ހާލަތްތަކަކަށް ބަލައި އެޗްޕީއޭއިން ބަލާ އުސޫލެެއްގެ ދަށުން ވަކި ބަޔަކަށެވެ.
ދެވަނަ ޑޯޒު ގެންނަން މަސައްކަތްކުރަމުން އަންނަ ކަމަށް އެޗްޕީއޭއިން ބުނެފައިވާއިރު އިންޑިއާގައި ކޮވިޑް-19ގެ ހާލަތު ވަނީ ވަރަށް ބޮޑަށް ގޯސް ވެފައެވެ. އެ ގައުމުގައި ޕޮޒިޓިވްވާ އަދަދުތައް ކޮންމެ ދުވަހަކު ވެސް ދުނިޔޭގެ ރިކޯޑުތައް މުގުރަމުންދާއިރު، ބައެއް ސަރަހައްދުތަކަށް ވެކްސިން ލިބުމުގައި ވެސް ބޮޑެތި ދަތިތައް އެބަހުއްޓެވެ. އެކަމަކި ރާއްޖެއަށް ވެކްސިން ފޯރުކޮށްދޭނެ ކަމުގެ ޔަގީންކަން އެ ގައުމުގެ ސަރުކާރުން ވަނީ ދީފައެވެ.
