ކޮވިޑް-19 ބަލިމީހަކަށް އެމަޖަންސީ ހާލަތެއް މެދުވެރިވެއްޖެ ނަމަ އެމީހުންނަށް ގޮސް އެމަރޖެންސީ ފަރުވާ ހޯދޭނެ ވޯކް-އިން ފެސިލިޓީ ގާއިމްކުރުމުގެ މަސައްކަތް ފަށާފައިވާ ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު، މަބްރޫކް އަޒީޒް ވިދާޅުވީ، މި މަހުގެ 1 ވަނަ ދުވަހު މި ބަލީގައި އުމުރުން 10 އަހަރުގެ މިޝްކާ ނިޔާވުމުގައި އިހުމާލުތަކެއް ފާހަގަވުމާއި، ސިސްޓަމްގައި ހުރި ބައެއް މައްސަލަތައް ވެސް ފާހަގަވެފައިވާތީ، ކުރިއަށް އޮތް ތަނުގައި އެފަދަ ކަމެއް ތަކުރާރުވިޔަ ނުދިނުމަށް ގިނަ ފިޔަވަޅުތަކެއް އަޅައި، އުސޫލުތަކަށް ބަދަލުތައް ގެންނަން ފަށާފައިވާ ކަމަށެވެ. އޭގެ ތެރެއިން އެންމެ މުހިންމު އެއް ކަމެއްގެ ގޮތުގައި ފާހަގަކުރެއްވީ ވޯކް-އިން މެޑިކަލް ފެސިލިޓީތަކެވެ.
ކޮވިޑް-19 ބަލި މީހުންނަށް ފަރުވާ ދިނުމަށް ވަކި ޚާއްސަ ތަންތަން ކަނޑައަޅާފައިވާއިރު، ބަލި ޖެހިގެން އައިސޮލޭޝަންގައި ހުންނަ މީހެއްގެ ހާލު ދެރަވެއްޖެ ހާލަތެއްގައި އަވަސް ފަރުވާއަށް ބޭނުންވެއްޖެ ނަމަ އެޗްއީއޯސީއަށް ރިޕޯޓުކުރުމަށް ފަހު، ރެސްޕޮންޑް ކުރަންދެން ޖެހެނީ މަޑުކުރާށެވެ. އަދި ބަލި މީހުންނަށް ފަރުވާދޭ އެހެން ތަންތަނުން ކޮވިޑް-19 ބަލި މީހުން ފަރުވާ ހޯދަން ދިއުމަކީ މަނާ ކަމެކެވެ.
މަބްރޫކް ވިދާޅުވީ ކޮވިޑް-19 ބަލި މީހުންނަށް ވޯކް-އިން ކުރެވޭ ފެސިލިޓީތައް ގާއިމްކުރުމުގެ މަސައްކަތް މިހާރު ފަށާފައިވާ ކަމަށެވެ. އަދި ކޮވިޑް ބަލި މީހުންނަށް އެމަރޖެންސީ ފަރުވާއަށް ވަގުތުން އެތަންތަނަށް ދެވޭނެ ކަމަށާއި ފަރުވާ ހޯދޭނެ ކަމަށެވެ.
އޭނާ ވިދާޅުވީ، އެ ހާދިސާގެ އަލީގައި އެ ނޫނަސް އެކި ބަދަލުތައް ގެނެސްފައިވާ ކަމަށެވެ. އެގޮތުން ކޯލް ސެންޓަރާއި، އެމްބިއުލާންސް ޓްރިގަރ ސިސްޓަމް އަށް ވެސް ބަދަލުތައް ފެނެސްފައިވާކަން ފާހަގަކުރެއްވިއެވެ.
އަދި ކޮވިޑް ބަލީގެ މީހަކު ހޭނެތި ނޭވާލާން އުނދަގޫވެ އެފަދަ އެއްވެސް އުނދަގުލެއް ވެގެން ކޯލް ސެންޓަރަށް ގުޅައިފި ނަމަ، އެ ކޯލްއަކަށް ޖަވާބު ދިނުމަށްފަހު ކޯލް ކަނޑާނުލައި ވަގުތުން މެޑިކަލް ޓީމަށް ކޯލް ޓްރާންސްފަރ ކުރާ ގޮތަށް ކަނޑައަޅާފައިވާ ކަމަށެވެ.
މީގެ އިތުރަށް އެމްބިއުލާންސް ފޮނުވުން އަވަސްކުރުމުގެ ގޮތުން ވެސް މަސައްކަތްތަކެއް ފަށާފައިވާ ކަމަށް ވިދާޅުވިއެވެ.
މިޝްކާ ނިޔާވި މައްސަލާގައި އެންމެ ފުރަތަމަ ވެސް ހެލްތު މިނިސްޓްރީން ބުނީ އެމްބިއުލާންސް ޓްރިގަރ ކުރުމުގެ އުސޫލަށް ބަދަލުތައް ގެނެސްފައިވާ ކަމަށެވެ. އެކަމުގެ ތަފްސީލް ހިއްސާކުރައްވަމުން މަބްރޫކް ވިދާޅުވީ، ބަލި މީހަކު ގުޅާ ހިސާބުން ފެށިގެން އެމްބިއުލާންސް ޓްރިގަރ ކުރުމާ ދެމެދު ހިނގާ މަރުހަލާތައް ވީހާ ވެސް މަދުކޮށް، ވީހާވެސް އަވަހަށް އެމްބިއުލާންސް ފޮނުވޭނެ ގޮތް ހަމަޖައްސަމުން އަންނަކަމަށެވެ.
މީގެ އިތުރަށް މިޝްކާގެ ކޭސްއަށް ބަލާއިރު، ބަލި މީހާ ގުޅުމުން އެންޓަރ ކުރާ އައުޓް ބްރޭކް (އޯބީ) ސިސްޓަމް އަށް އެންޓަރ ކޮށްފައިނުވާކަން ފާހަގަވެފައިވާ ކަމަށާއި، ކުރިއަށް އޮތް ތަނުގައި ވެސް އޯބީ ސިސްޓަމް ފެއިލް ވެއްޖެ ނަމަ އެންގޭނެ އެހެން ޕްރޮސެސްއެއް ވެސް ކަނޑައަޅާފައިވާ ކަމަށް ވިދާޅުވިއެވެ.
