ދައްޕަރު މައްސަލާގައި ރައްޔިތުންގެ ވިސްނުމާ ސަރުކާރުން ދެކޮޅު ނުހަދާނެ - މަބްރޫކް

ދައްޕަރު މައްސަލައިގައި ހއ. ފިއްލަދޫ ރައްޔިތުންގެ ވިސްނުމާ ސަރުކާރުން ދެކޮޅު ނުހަދާނެކަމަށް ރައީސް އޮފީހުގެ ތަރުޖަމާނު މަބްރޫކް ޢަޒީޒް ވިދާޅުވެއްޖެއެވެ.

ސަރުކާރުގެ ވިސްނުން ހުރީ ހއ. ފިއްލަދޫ އިޚުތިޞާޞްގެ ދަށުން ވަކިކުރި ދައްޕަރު ރިއަލް އެސްޓޭޓް ޓޫރިޒަމަށް ތަރައްގީ ކުރަން ކަމަށް, ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވުމާ ގުޅިގެން ބައެއް ފަރާތްތަކުން އެކަމުގެ ހަގީގަތް އޮޅުވާލައި ވާހަކަތަކެއް ދައްކަމުންދާ މި ދަނޑިވަޅުގައި, ރާއްޖެ އެމްވީއަށް މައުލޫމާތު ދެއްވަމުން މަބްރޫކް ވިދާޅުވީ ދައްޕަރު މައްސަލައިގައި ފިއްލަދޫ ރައްޔިތުންގެ ވިސްނުމާ ދެކޮޅަށް ސަރުކާރުން އެއްވެސް މަސައްކަތެއް ނުކުރާނެ ކަމަށެވެ. އަދި މި މައްސަލާގައި ކައުންސިލާ މަޝްވަރާތަކެއް ކުރެވެމުންދާ ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ ދައްޕަރުގައި ރިއަލް އެސްޓޭޓް ޓޫރިޒަމް ތަރައްގީ ކުރުމަށް ރޭވިފައިވާ ކަމަށެވެ. ކުރިން ވެސް ދައްޕަރުގައި ޓޫރިޒަމް ތަރައްގީ ކުރުމަށް ސަރުކާރުން މަސައްކަތް ކޮށްފައިވާކަން ފާހަގަކުރައްވައި މަބްރޫކް ވިދާޅުވީ, އެމަސައްކަތުގެ ތެރެއިން ބިން ހިއްކި ދެރަށް ގުޅިފައިވާ ކަމަށެވެ. އަދި ރިއަލް އެސްޓޭޓް ޓޫރިޒަމް އެރަށުގައި ފުޅާކޮށް، ޓޫރިޒަމްގެ އާ ޕްރޮޑަކްޓެއް ޑިވެލޮޕް ކުރުމަކީ އަމާޒެއް ކަމަށެވެ. ނަމަވެސް މިމައްސަލާގައި ފިއްލަދޫ ކައުންސިލްގެ ކަންބޮޑުވުންތަކެއް ހުރުމާއެކު، ރައީސް އޮފީހުން އެކަމާގުޅޭގޮތުން ކައުންސިލާ މަޝްވަރާތަކެއް ކުރަމުން އަންނަ ކަމަށެވެ.

ލާމަރުކަޒީ އުސޫލުން ކަންކަން ހިންގުމަކީ މުހިންމު ކަމެއްކަން ސަރުކާރުން ގަބޫލު ކުރާކަން ފާހަގަ ކުރައްވައި މަބްރޫކު ވިދާޅުވީ، ފިއްލަދޫގެ އިޚްތިޞާޞްގެ ތެރެއިން ދައްޕަރު ނެގުމާގުޅިގެން ކޮންމެވެސް ވަރަކަށް ކައުންސިލާ ވާހަކަ ދައްކާފައިވާ ކަމަށެވެ. އަދި މިހާރު ވެސް ރައީސް އޮފީހުން ކައުންސިލާ އެކަމާ ގުޅޭގޮތުން މަޝްވަރާތަކެއް ކުރަމުން އަންނަ ކަމަށް މަބްރޫކު ވިދާޅުވިއެވެ.

މީގެ އިތުރުން މަބްރޫކް ވިދާޅުވީ ސަރުކާރުން ތަރައްގީ ކުރުމަށް ކުރާ އެންމެ ބޮޑު މަސައްކަތަކީ ލާމަރުކަޒު ކުރުން ކަމަށެވެ. ބޮޑެތި އިމާރާތްތައް އެޅުމުގެ ބަދަލުގައި ރާއްޖޭގެ ހުރިހާ ސަރަހައްދެއްގައި ސަރވިސްތައް ލިބޭ ގޮތަށް ޚިދުމަތްތައްފުޅާ ވެގެންދިއުމަކީ ހަގީގީ ތަރައްގީ ކަމަށް މަބްރޫކް ސިފަކުރެއްވިއެވެ.