ހެލްތު މިނިސްޓަރު އަހްމަދު ނަސީމް ކޮންމެ ދުވަހަކު ވެސް ހެލްތް އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ގެ މަސައްކަތްތަކުގައި އުޅުއްވާ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.
ހެލްތް މިނިސްޓަރު އެޗްއީއޯސީގެ މަސައްކަތުގައި ހަރަކާތްތެރިވަމުންދާކަން މަބްރޫކް ފާހަގަކުރައްވާފައި މިވަނީ ކޮވިޑް-19ގެ ހާލަތު އިންތިހާއަށް ގޯސްވެފައިވާ މިދަނޑިވަޅުގައި މިނިސްޓަރު ނަސީމް ނުފެންނަނީ ހައިރިސްކް ބޭފުޅަކަށް ވާތީ އެކަހެރި ކޮށްފައި ހުރުމުން ކަމަށް ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއިލް ވިދާޅުވުމާއި ގުޅިގެން ބައެއް މީޑިއާތަކުގައި ރިޕޯޓުކޮށްފައިވަނިކޮށްށެވެ.
އެކަން ދޮގުކުރައްވާ މަބްރޫކް ވިދާޅުވީ ހެލްތް މިނިސްޓަރު މިވަގުތު ހުންނެވީ ދަރުބާރުގޭގައި ކަމަށާއި، ކޮންމެ ދުވަހެއްގައި ވެސް ގިނަ ވަގުތު ހޭދަކުރައްވަނީ އެޗްއީއޯސީގެ މަސައްކަތްތަކުގައި ކަމަށެވެ.
ކޮވިޑް-19ގެ ހަތަރުވަނަ ރާޅާއެކު ބަލީގެ ހާލަތު ގޯސްވެފައިވާ މިދަނޑިވަޅުގައި އެއްވެސް ވަރަކަށް މިނިސްޓަރު ނަސީމް އެޗްއީއޯސީގެ ނޫސްވެރިންގެ ބައްދަލުވުންތަކުން މައުލޫމާތު ނުދެއްވާތީ ބައެއް އާއްމު ރައްޔިތުން ދަނީ އެކަމާއި މެދު ސުވާލު އުފައްދަމުންނެވެ. ނަމަވެސް މަބްރޫކް ވިދާޅުވީ މިނިސްޓަރު އަމިއްލަ ހައިސިއްޔަތުން ދަރުބާރުގެއަށް ވަޑައިގެން ވަރަށް ގިނަ ވަގުތު މަސައްކަތުގައި ހޭދަ ކުރައްވާ ކަމަށެވެ.
ބަލީގެ ހާލަތު ގޯސްވެ ކޮވިޑް-19ގެ ކޮންޓްރޯލް ރާއްޖެއިން ގެއްލިފައިވާ ކަމަށް އެޗްއީއޯސީގެ ޑޮކްޓަރުން ދަނީ ވިދާޅުވަމުންނެވެ. މިފަހުން ކޮންމެ ދުވަހަކު ވެސް 1000ށް ވުރެ މަތިން މީހުން ޕޮޒިޓިވްވަމުންދެއެވެ. ކޮވިޑްގެ ކޭސްތައް ފެނި 60ށް ވުރެ ގިނަ ރަށްތައް މިހާރު އޮތީ މޮނިޓަރިންގެ ހާލަތުގައެވެ. މީގެ އިތުރުން ބަލީގައި ނިޔާވި މީހުންގެ އަދަދުތައް އިތުރުވެ މެއި މަހުގެ މިހާތަނަށް 62 މީހަކު ވަނީ ނިޔާވެފައެވެ. އަދި އެނދުގެ ކެޕޭސިޓީ ފުލް ވެދާނެކަމުގެ އިންޒާރު ވެސް ވަނީ ދީފައެވެ.
