ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ކޮވިޑް-19ށް ނެގެޓިވްވެއްޖެއެވެ.

ކޮވިޑް-19 ގެ އަލާމާތްތައް ހުރެގެން ޓެސްޓު ކުރުމަށްފަހު ގޭގައި އެކަހެރިވެވަޑައިގެންނެވީ މި މަހުގެ ތިން ވަނަ ދުވަހުއެވެ.

ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނީ ބައްޔަށް ނެގެޓިވްވުމާ ގުޅިގެން އާދިއްތަ ދުވަހުން ފެށިގެން ކޮވިޑްއާ ގުޅޭ ގޮތުން މައުލޫމާތު ދިނުމަށް ބާއްވާ ނޫސްވެރިންގެ ބައްދަލުވުމުގައި މަބްރޫކް ބައިވެރިވެވަޑައިގަންނަވާނެ ކަމަށެވެ.

ރާއްޖޭގެ ކޮވިޑް-19ގެ ހާލަތާއި ކުރެވެމުންދާ މަސައްކަތްތަކުގެ ތަފްސީލުގެ ހާމަކުރުމުގެ އިތުރުން ނޫސްވެރިންގެ ސުވާލުތަކަށް މިނޫސްވެރިންގެ ބައްދަލުވުމުގައި މަބްރޫކް ޖަވާބު ދެއްވައެވެ. އަދި އެޗްއީއޯސީގެ ޑޮކްޓަރުންނާއި ސަރުކާރުގެ އެކި މުއައްސަސާތަކުގެ މިނިސްޓަރުންނާއި އިސްބޭފުޅުން ނޫސްވެރިންގެ ބައްދަލުވުމުގައި ބައިވެރިވަޑައިގަންނައެވެ. ކޮންމެ ދުވަހަކު ކަހަލަ ގޮތަކަށް ނޫސްވެރިންގެ ބައްދަލުވުންވާއިރު، ހުރިހާ ނޫސްވެރިންނަށް ވެސް ސުވާލުކުރުމުގެ ފުރުސަތުދެއެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރުވަނަ ރާޅާއެކު ހާލަތު ވަނީ ވަރަށް ގޯސްވެފައެވެ. މާލެސިޓީގެ އިތުރުން އަތޮޅުތެރޭގެ ގިނަ ރަށްތަކުން ކޭސް ފެނިފައިވާއިރު، އެޗްއީއޯސީގެ މަސައްކަތްތައް ވަނީ ފުޅާކޮށްފައެވެ. އަތޮޅުތަކުގެ ހާލަތު ބެލުން އިތުރަށް ހަރުދަނާ ކުރުމަށާއި ކޯޑިނޭޝަން އިތުރަށް ރަނގަޅު ކުރުމަށްޓަކައި ކޮންމެ އަތޮޅަކަށް ސަރުކާރުގެ ފަރާތުން ބޭފުޅަކު ވަނީ އައްޔަކޮށްފައެވެ. އެބޭފުޅުންގެ ޒިންމާއަކީ އެޗްޕީއޭއާ ކައުންސިލްތަކާ ދެމެދު ހިނގާ މުއާމަލާތްތަކާއި، ކުރެވޭ މަޝްވަރާތަކާ ގުޅިގެން ނިންމާ ކަންކަން ފަސޭހަ ކުރުމަށް ސަރުކާރުގެ ފަރާތުން އަދާކުރަން ޖެހޭ ދައުރު އަދާކުރުމެވެ. މި ބޭފުޅުންނަކަށް، ކައުންސިލްތަކުން އަދާކުރަންޖެހޭ ޒިންމާ އަދާކުރާކުރުމުގެ ބާރާއި، ރަށްރަށުގެ ކަންކަން ނިންމުމުގެ ބާރެއްވެސް ނޯންނާނެއެވެ.