އެއަރޕޯޓް ހިންގަން ބޭރުގެ ބަޔަކަށް ނުދޭނެ އަދި އެއަރ ޓްރެފިކް ބަލަހައްޓާނީ ދިވެހި ދައުލަތުން - ސަރުކާރު
ހަނިމާދޫ އިންޓަނޭޝަނަލް އެއާޕޯޓުވެސް ބޭރު ބަޔަކާ ހަވާލުކުރުމުގެ ވިސްނުން ސަރުކާރުން ނުގެންގުޅޭ
ހަނިމާދޫ އެއަރޕޯޓް - ބޭރުގެ ބަޔަކަށް އެއަރޕޯޓް ހިންގަންދޭކަމަށް ބުނެ ގިނަ ބަޔަކު އަންނަނީ ކަންބޮޑުވުން ފާޅުކުރަމުން
ދައުލަތުގެ އެއްވެސް އެއާޕޯޓެއް އަމިއްލަ ފަރާތަކާއި ހަވާލުކުރުމުގެ ވިސްނުމެއް ނެތް ކަމަށާއި، އެެއަރ ޓްރެފިކް ކޮންޓްރޯލް ބަލަހައްޓާނީ ދިވެހި ދައުލަތުން ކަމަށް ސަރުކާރުން ބުނެފިއެވެ.
ބޭރުގެ 100 އިންސައްތަ ހިއްސާވާ ކުންފުނިތަކަށް ރާއްޖޭގެ އެއާޕޯޓުތައް ހިންގޭ ގޮތަށް ފޮރިން ޑައިރެކްޓް އިންވެސްޓްމެންޓް ޕޮލިސީއަށް އަލަށް ގެނައި އިސްލާހު ގެޒެޓްގައި ޝާއިއު ކުރުމާއެކު ގިނަ ފަރާތްތަކަކުން އަންނަނީ ކަންބޮޑުވުން ފާޅު ކުރަމުންނެވެ. އެގޮތުން އިންޑިއަން އެގްޒިމް ބޭންކުން ހދ. ހަނިމާދޫ އިންޓަނޭޝަނަލް އެއާޕޯޓަށް އިންވެސްޓް ކުރަން ނިންމާފައިވާ ދަނޑިވަޅެއްގައި ސަރުކާރުން ފޮރިން އިންވެސްޓްމަންޓް ޕޮލިސީ އަށް އިސްލާހު ގެނައުމުން ބޭރުގެ ކުންފުނިތަކުގެ ބާރުގެ ދަށަށް އެއާޕޯޓްތައް ދިޔުމަށް މަގުފަހި ވެގެން ދާނެ ކަމަށް ބައެއް ފަރާތްތަކުން ބުނެފައިވެއެވެ.
މިކަމާ ގުޅޭ ގޮތުން ރައީސް އޮފީހުގެ ތަރުޖަމާނު މަބްރޫކް އަޒީޒް 'ރާއްޖެއެމްވީ' އަށް ވިދާޅުވީ، އެހެން އެއާޕޯޓުތަކެކޭ އެއްގޮތަށް އެހެން އެއާޕޯޓު ތަކެކޭ އެއްގޮތަށް ހަނިމާދޫ އިންޓަނޭޝަނަލް އެއާޕޯޓުވެސް ބޭރު ބަޔަކާ ހަވާލުކުރުމުގެ ވިސްނުން ސަރުކާރުން ނުގެންގުޅޭ ކަމަށެވެ.
މިކަމާ ގުޅޭގޮތުން އިކޮނޮމިކް މިނިސްޓަރު ފައްޔާޒް އިސްމާއީލް ކުރެއްވި ޓްވީޓެއްގައި ވިދާޅުވީ، ހަނިމާދޫ އެއާޕޯޓު އެގްޒިމް ބޭންކުގެ ލޯން ފެސިލިޓީއެއްގެ ދަށުން ތަރައްގީ ކުރި ނަމަވެސް އެއާޕޯޓުގެ މިލްކުވެރިކަން ލިބިގެން ވަނީ ދިވެހި ސަރުކާރަށް ކަމަށެވެ. އަދި އެއާޕޯޓު ހިންގާނީ ސަރުކާރުން ނުވަތަ ސަރުކާރުން ހަވާލު ކުރާ ބަޔަކު ކަމަށް ވެސް ވިދާޅުވިއެވެ.
ފޮރިން ޑައިރެކްޓް އިންވެސްޓްމެންޓް ޕޮލިސީގެ އެނެކްސް 1 ގެ ކްލާސް ކޯޑް H3 އަށް ގެނައި އިސްލާހުގައި ވާގޮތުން އެއާވޭ ޓާމިނަލް ފަދަ އެއާޕޯޓު ޓާމިނަލް ފެސިލިޓީތައް ހިމެނޭގޮތަށް ބޭރުގެ ކުންފުނިތަކަށް އެއާޕޯޓު ހިންގާ އޮޕަރޭޓް ކުރެވޭނެއެވެ. އަދި އެއާޕޯޓާއި އެއާޓްރެފިކް ކޮންޓްރޯލްކުރުމާއި، އެއާފީލްޑުގައި ގްރައުންޑް ސާވިސްގެ ޚިދުމަތް ވެސް ފޯރުކޮށްދެވޭނެއެވެ.
މި އިސްލާހާ ގުޅިގެން ފައްޔާޒް ވިދާޅުވީ، ޕޮލިސީއަށް އަލަށް ގެނެވުނު އިސްލާހާއެކުވެސް އެއާޓްރެފިކް އޮޕްރޭޓް ކުރުން، ބޭރުގެ ފަރާތްތަށް ހިމެނޭގޮތަށް އެއްވެސް އަމިއްލަ ފަރާތަކަށް ލިބިގެނެއް ނުދާނެ ކަމަށެވެ.
އަލަށް ގެނައި އިސްލާހުގައި އޮޅުން އަރާފައި ހުރި ކަންކަން ސާފުކޮށްދިނުމުގެ ގޮތުން، މިހާރު ގެޒެޓް ކޮށްފައިވާ އިސްލާހުގެ އިބާރާތަށް ބަދަލު ގެނައުމަށްފަހު އަލުން ޝާއިއު ކުރުމަށް މިހާރު ސަރުކާރުން ވަނީ ނިންމާފައެވެ.
