ޓްރީ ޓޮޕް ހޮސްޕިޓަލުން ކޮވިޑް-19 ހެލްތު ސްކްރީނިން ޕެކޭޖެއް ތައާރަފްކޮށްފި

ޓްރީ ޓޮޕް ހޮސްޕިޓަލުން ކޮވިޑް-19 ކެއަރ ޕެކޭޖުގެ ނަމުގައި ޚާއްސަ ހެލްތު ސްކްރީނިން ޕެކޭޖެއް ތައާރަފްކޮށް ޚިދުމަތް ދޭން ފަށައިފިއެވެ.

ޓްރީ ޓޮޕުން ބުނީ ކޮވިޑް-19 ހެލްތް ސްކްރީނިން ޕެކޭޖަކީ ކޮވިޑް-19 ޖެހިފައިވާ މީހުންގެ ސިއްހީ ހާލަތު ހުރިހާ ގޮތަކުން ބަލައި އެ ހާލަތު ބުނެދިނުމަށް ޚާއްސަކޮށްގެން ފަރުމާކުރެވިފައިވާ ޕެކޭޖެއް ކަމަށެވެ. މި ޕެކޭޖު ވަނީ ކޮވިޑް-19 ޖެހުމަށްފަހު އަމިއްލަ ސިއްހަތުގެ މައްސަލަތައް ބަލައި ތަހުގީގުކޮށް އަދި ރިހެބިލިޓޭޝަންގެ އެހީއަށް ބޭނުންވާ މީހުންނަށް ޚާއްސަކުރެވިފައެވެ.

ކޮވިޑް-19 ކެއަރގައި މައިގަނޑު 2 ޕެކޭޖެއް ހިމެނެއެވެ. އެއީ ސްޓޭންޑަޑް ޕެކޭޖާއި ކޮމްޕްރީހެންސިވް ޕެކޭޖެވެ. މި ޕެކޭޖުތަކަށް އެދެވޭނީ ކޮވިޑް-19 ޖެހުނުތާ މަދުވެގެން 2 ހަފުތާ ހަމަވުމަށް ފަހުއެވެ. ސްޓޭންޑަޑް ޕެކޭޖު ޚާއްސަ ކުރެވިފައިވަނީ ކޮވިޑް-19 ޖެހުނު ނަމަވެސް ބަލީގެ އެއްވެސް އަލާމާތެއް ފެނިފައިނުވާ މީހުންނަށެވެ. ކޮމްޕްރީހެންސިވް ޕެކޭޖް ޚާއްސަ ކުރެވިފައިވަނީ ކޮވިޑް-19 ޖެހި އަދި ބަލީގެ އަލާމާތްތައް ފެނިފައިވާ މީހުންނަށެވެ.

ޓްރީ ޓޮޕުން ބުނީ މި ޕެކޭޖްގައި ހިމެނިގެން ހެދޭ ޑައިގްނޮސްޓިކް ޓެސްޓުތަކުގެ ތެރޭގައި ލޭގެ ލެބް އިންވެސްޓިގޭޝަން، ސްޕައިރޯމެޓްރީ، އީސީޖީ، ޗެސްޓް އެކްސްރޭ އަދި ވައިޓަލްސް ޗެކްކުރުން ފަދަ ޓެސްޓުތައް ހިމެނޭ ކަމަށެވެ. ފުރަތަމަ ޑޮކްޓަރުގެ އެސެސްމަންޓަށް ފަހު އިތުރު ސްޕެޝަލިސްޓް ޑޮކްޓަރުންނަށް ދެއްކުމަށް ރިފަރެލް ހަމަޖެހިގެންދާނެ ކަމަށް ޓްރީ ޓޮޕުން ބުނެއެވެ. އެގޮތުން ހިތުގެ ޚާއްސަ ޑޮކްޓަރުން، ފުއްޕާމޭގެ ޚާއްސަ ޑޮކްޓަރުން ނުވަތަ އެތެރެހަށީގެ ޚާއްސަ ޑޮކްޓަރުނަށް ދެއްކުމަށް 3 ދުވަހުގެ މުއްދަތަކަށް ހުޅުވާލެވިފައިވާ ސްޕެޝަލިސްޓް ރިފަރެލެއް ލިބޭނެއެވެ.