ޓްރީ ޓޮޕް ހޮސްޕިޓަލުން އެލާރޖީ ފަރުވާއަށް އިމިއުނޯތެރަޕީގެ ޚިދުމަތް ތައާރަފް ކޮށްފިއެވެ.
ޓްރީ ޓޮޕް ހޮސްޕިޓަލުގެ ކަރުންމަތީ (އީ.އެން.ޓީ) އަދި ނޭވާލާ ނިޒާމުގެ (ރެސްޕިރޭޓަރީ) ބަލިތަކަށް ޚާއްސަ ޑިޕާޓްމަންޓުގެ ފަރާތުން ތައާރަފްކުރާ އިމިއުނޯތެރަޕީގެ ޚިދުމަތަކީ ސްކިން ޕްރިކް އެލާރޖީ ޓެސްޓިން އަށްފަހު އެލާރޖީއެއްގެ އަސަރު ހުރިނަމަ އެއަށް ދެވޭ ފަރުވާއެވެ.
ސްކިން ޕްރިކް އެލާޖީ ޓެސްޓު ހަދަނީ ތަފާތު ވައްތަރުގެ ކުނޑިއަށާޢި ކާ އެއްޗިއްސަށް އަދި ހިރަފުހަށް އެލާރޖިކް ވޭތޯ ބެލުމަށެވެ. ސްކިން ޕްރިކް އެލާރޖީ ޓެސްޓިން ޚިދުމަތުގެ އެހީގައި ކުޑަ ވަގުތުކޮޅެއް ތެރޭގައި އެއްވެސް އެލާރޖީއެއްގެ އަސަރެތް ހުރިތޯ ތަހުލީލު ކުރެވޭނެއެވެ. މި ޓެސްޓުގެ ނަތީޖާ ޕޮޒިޓިވް ވެއްޖެނަމަ އިމިއުނޯތެރަޕީގެ ޚިދުމަތުގެ ލަފާ ޑޮކްޓަރު ދެއްވާނެއެވެ.
އިމިއުނޯތެރަޕީގެ ބޭނުންކުރާނެ ގޮތުގެ އިރުޝާދު ހޯދުމަށް އެޕޮއިންޓްމެންޓް ހައްދަން ޖެހޭ ކަމަށާއި، މި ޚިދުމަތުގެ ފުރަތަމަ ލަފާއިން ފެށިގެން، ދިގު މުއްދަތަކަށް ތެރަޕީ ކުރިއަށް ގެންދަން ޖެހޭނަމަ ފުރިހަމަ އެއްބާރުލުން ދޭނެ ކަމަށް ޓްރީ ޓޮޕުން ބުނެއެވެ.
ޓްރީ ޓޮޕް ހޮސްޕިޓަލުން ސްކިން ޕްރިކް އެލާރޖީ ޓެސްޓިން އަދި އިމިއުނޮތެރަޕީގެ ޚިދުމަތް ފޯރުކޮށްދެނީ 5 އަހަރުން މަތީގެ މީހުންނެވެ. މި ޚިދުމަތް ފޯރުކޮށްދިނުމުގައި އިސްކޮށް އުޅުއްވަނީ ކަރުންމަތީ ބަލިތަކުގެ (އީ.އެން.ޓީ) ސްޕެޝަލިސްޓް، ޑރ. ޗަންދްރަޝޭކަރް ރަވަލް އާއި ފުއްޕާމޭގެ ޚާއްސަ، ޑރ. ރަގުލާން ރާޖާލިންގަމެވެ.
ޓްރީ ޓޮޕް ހޮސްޕިޓަލަކީ ރާއްޖޭގެ ގިނަ ބައެއްގެ އިތުބާރު ހޯދައިފައިވާ، ޒަމާނީ ފެންވަރަށް ސިއްހީ ޚިދުމަތް ފޯރުކޮށްދެމުން އަންނަ އެއް ހޮސްޕިޓަލެވެ.
